Est 3 | BxrBBL2024 | STEP | Эдэ бүгэдын удаа Ахашвероош хаан Агаагай удам угсаа болохо Һаммидаатын Һамааниие бусад түшэмэл ноёдһоо үндэр албан тушаалда томилбо.

‏ Esther 3

Еврейнүүдые усадхаха гэжэ Һамаан түсэблэнэ

1 Эдэ бүгэдын удаа Ахашвероош хаан Агаагай ^{▼▼ Агааг – амалээгүүдэй хаан байжа магадгүй; 1 Хаан 15:8 хара.} удам угсаа болохо Һаммидаатын Һамааниие бусад түшэмэл ноёдһоо үндэр албан тушаалда томилбо. 2 Эзэн хаанай буулгаһан зарлигай ёһоор ордоной бүхы түшэмэлнүүд Һамааниие ёһолон хүндэлжэ, үбдэг һүгэдэн унажа байгаа. Гансал Мордохай тэрэнэй урда һүгэдэдэггүй, унажа байдаггүй һэн.

3 Ордоной бусад түшэмэлнүүд тэрээндэ:

– Юундэ хаанай зарлигые дүүргэнэгүйбта? – гэдэг бэлэй.

4 Үдэр бүри тэдэ иигэжэ тэрээндэ хэлэхэдэнь, Мордохай «би иудей хүн гээшэб» гэжэ хэлээд, һүгэдэн байхаһаа арсадаг байба. Мордохай яагша ааб гэжэ харахын тула тэдэ энээн тухай Һамаанда хоблон мэдүүлбэ. 5 Энээниие мэдэһэнэй удаа Мордохайн урдань үнэхөөр һүгэдэнгүй байһые хаража, Һамаан ехэ уурлаба. 6 Мордохайн иудей үндэһэтэн байһые мэдэһэн Һамаан ганса өөрыень бэшэ, харин Ахашвероош хаанай улас түрэдэ оршон һуугаа бүхы иудейнүүдые усадхаха гэжэ һанаба ха.

7 Еврей зоной литэ тоололгоор жэлэй нэгэдэхи һарада, ондоогоор хэлэбэл, нисаан гэдэг һарада, Ахашвероош хаанай шэрээдэ заларһанһаа хойшо арбан хоёрдохи жэлдэ Һамаан мэдэлшэдһээ иудейнүүдые хэзээ усадхаха тухай зүблэн асуужа, тэдэнь һара, үдэр бүхэн тушаа шоо хаяба. Тиихэдэнь «Арбан хоёрдохи гэхэ гү, али адаар гэдэг һарада» гэжэ шоо харуулба.

8 Энээнэй удаа Һамаан Ахашвероош хаанда орожо:

– Манай улас түрын бүхы аймаг, бүхы үндэһэ яһатадай дунда таранхай нэгэл зүрюу һанаатай үндэһэтэн бии. Тэдэнэй хуули ёһонууд ондоо, тэдэ хаанай хуули зарлиг сахинагүй. Эзэн хаан, та тэдэниие хэһээнгүй миин бү орхиита. 9 Энээниие зүб гэжэ һанабал, тэдэниие усадхаха тушаа зарлиг буулгыт. Тиигэбэл, хаанай санда оруулхаяа сангай түшэмэлнүүдтэ арбан мянган талаант сагаан мүнгэ үгэхэб, – гэбэ.

10 Тиихэдэнь Ахашвероош хаан тамгатай багажаа тайлаад, иудейнүүдые усадхаха тухай зарлиг тамгалхыень Агааг хаанай удам угсаа болохо Һаммидаатын Һамаанда, иудейнүүдэй дайсанда, үгэжэ:

11 – Мүнгые ши өөртөө абаарай! Тэрэ үндэһэтэн тушаа асуудал мүн лэ өөрын дураар шиидхэ, – гэбэ.

12 Еврейн он тоололгын нэгэдэхи һарын арбан гурбанда Һамаанай гаргаһан тогтоолой ёһоор хаанай бэшээшэд дуудагдажа, дээдэ тушаал эзэлэгшэдтэ, аймаг можо бүхэнэй толгойлогшонорто өөр өөрынь хэлэн дээрэ бэшэг бэшэбэ. Ахашвероош хаанай нэрэһээ бэшэг бэшэгдэн, хаанай тамгаар батадхагдаба. 13 Энэ зарлигай ёһоор иудей он тоололгын арбан хоёрдохи һарын, ондоогоор хэлэбэл, адаар һарын арбан гурбанда, нэгэ үдэрэй туршада хүгшэн залуу гэжэ илгангүй, хүүгэд, эхэнэр гэжэ хайрлангүй, бүхы иудейнүүдые алажа хюдаад, эд зөөрииень хуряан абаха ёһотой байба. Хаанай элшэнэр улас түрын бүхы можо аймагуудаар иимэ бэшэгүүдые абаашаба. 14 Тэрэ үдэртэ арад түмэнэй бэлэн байхын тула тус тогтоол бүхы аймаг можонуудаар бүхы үндэһэ яһатанда тунхаглан уншагдаха ёһотой байба. 15 Хаанай зарлигай ёһоор элшэнэр шамдан ябажа, зарлиг тарааба. Зарлиг мүн лэ ниислэл хото Сүүзэдэ тунхаглагдаба. Эзэн хаан Һамаан хоёрой амар тайбан үзэмэй дараһан архи уужа һуухада, ниислэл хотын арад түмэн хүл хөөрсэгэнөөн боложо, ехэ һүрдэбэ.