Est 4 | BxrBBL2024 | STEP | Мордохай энээн тушаа дуулахадаа, ехэ гашуудажа, хубсаһаа шуу татажа, гашуудалай хубсаһа үмдэжэ, толгой дээрээ үнэһэ сасажа, хотын гудамжада гаража, шангаар уйлан, гашуудан ябаба.

‏ Esther 4

Эстээр Һамаанай түсэбүүдтэ һаад хэнэ

1 Мордохай энээн тушаа дуулахадаа, ехэ гашуудажа, хубсаһаа шуу татажа, гашуудалай хубсаһа үмдэжэ, толгой дээрээ үнэһэ сасажа, хотын гудамжада гаража, шангаар уйлан, гашуудан ябаба. 2 Иигэжэ тэрэ эзэн хаанай ордоной гол хаалгын хажууда ерэбэ. Гашуудалай хубсаһа үмдэһэн хүн тиишээ орожо болохогүй байһан ушарһаа тэрэ үүдэнэй дэргэдэ ерээд зогсобо. 3 Хаанай зарлиг шагнаһан бүхы газар нютагуудай иудейнүүд угаа ехээр гашуудан уйлажа, эдеэ хоолшье эдихэ уухаа болёод, олонхинь гашуудалай удархай хубсаһа үмдэнхэй, үнэһэ тооһон соо хэбтэжэ байгаа бэлэй.

4 Шэбэгшэ эхэнэрнүүдэй, зараса тайган түшэмэлнүүдэй ерэжэ, Мордохай тухай хөөрэхэдэ, Эстээрэй сэдьхэл угаа зобобо. Гашуудалай удархай хубсаһаа һэлгэхыень ондоо хубсаһа тэрэ Мордохайда эльгээбэ, харин тэрэнь абабагүй. 5 Тиихэдэнь өөрыень харгалзалхаяа хаанай табяаша түшэмэл тайган Һатаахые Эстээр дуудажа, ямар ушарһаа иимэ гай гашуудал боложо байһые мэдээд ерэхыень Мордохайда эльгээбэ.

6 Иигэжэ хаанай ордоной гол хаалгануудай урда тээ оршогшо хотын үргэн талмай дээрэ Мордохайтай уулзахаар Һатаах ерээ бэлэй. 7 Мордохай тохёолдоһон бүхы байдалые хөөрэжэ үгөөд, Һамаанай иудейнүүдые усадхаһанайнгаа түлөө эзэн хаанай сан руу хэды шэнээн мүнгэ оруулхаар дуугарһан тухайнь хүрэтэр хэлэбэ. 8 Энээнһээ гадна ниислэл хото Сүүзэдэ зарлан тарааһан тэрэ үнөөхи иудейнүүдые усадхаха тухай зарлигай нэгэ буулгабариие Мордохай Һатаахта үгэжэ, Эстээртэ абаашажа, бүгэдые тайлбарилжа үгэхыень хэлэбэ. Мүн эзэн хааниие заабол бараалхажа, өөрын арад үндэһэтэнэй түлөө тэрээнһээ үршөөл хайра гуйхые Мордохай Эстээртэ захиба.

9 Һатаах бусажа ерээд, Мордохайн хэлэһэн юумые Эстээртэ дамжуулба. 10 Эстээр тэрэниие Мордохай руу һөөргэнь ябуулжа, иимэ юумэ дуулгахыень дамжуулба:

11 – Эзэн хаанай тогтооһон хуулиин ёһоор өөрынь дуудаагүй сагта эрэ, эмэ ямаршье хүн дотоо хашаадань орожо, хаантай уулзахые оролдобол, саазалуулдаг. Хаанай түшэмэл бүхэн, нютаг можонуудаар ажаһуугша хүн бүхэн энээниие һайн мэдэдэг, харин нэгэл ушарта амиды үлэжэ болохо: хэрбээ зүбшөөлгүйгөөр орожо ерэһэн хүн руу эзэн хаан алтан таягаараа заабал, тэрэ хүнэй ами наһан абарагдаа гэһэн удхатай. Гэбэшье намайе эзэн хаан һүүлэй гушан хоногой туршада нэгэшье дуудаагүй.

12 Эстээрэй үгэнүүдыень Мордохайда дамжуулхада, 13 тэрэ Эстээртэ иимэ харюу эльгээбэ:

– Хаанай ордондо байгаа хадаа бүхы иудейнүүд сооһоо гансаарханаа амиды мэндэ гарахаб гэжэ ши бү һана! 14 Иимэ үе сагта шинии амаа хаагаад байгаа һаа, иудейнүүдые абарха арга ондоо газарһаа ерэхэ. Харин шинии гал гуламта үгы хэгдэхэ. Тиигээдшье иимэ сагта хэрэгтэй болохо гэжэ шинии хаанай ордондо орожо, хатан болоһон ушар байгаа юм аалам, хэн мэдэхэб.

15 Эстээр энээниие шагнаад, Мордохайда иимэ харюу эльгээбэ:

16 – Та мүнөө ниислэл хото Сүүзэдэ байгааша иудейнүүдые бултыень суглуулаад, минии түлөө гурбан хоног юушье эдин уунгүй масаглажа, Эзэн Бурханһаа туһаламжа гуйгты! Тэрэ үедэ бишье зараса эхэнэрнүүдтэеэ хамта мүн лэ эдеэ хоол барингүй байхаб. Энээнэй һүүлээр хэды буруушье юумэ хэжэ байгаашье һаа, би хааниие бараалхан орохоб. Үхэхэ ёһотой һаа, үхүүжэб!

17 Мордохай ошожо, Эстээрэй хэлэһэнэй ёһоор хэрэг бүтээгээ бэлэй.