Est 5 | BxrBBL2024 | STEP | Энээнэй һүүлээр гурбан хоногой удаа Эстээр хатан хубсаһаа үмдөөд, эзэн хаанай ордоной дотоо хашаа руу зүбшөөлгүйгөөр оробо. Энэ үедэ хаан ордоной хойморто, орохо үүдэнэй шанха урдаһаа хараһан талада табяатай хан шэрээ-сэнтиидээ заларжа байгаа.

‏ Esther 5

Эстээр хатан хаанда хандахаяа зүрхэлбэ

1 Энээнэй һүүлээр гурбан хоногой удаа Эстээр хатан хубсаһаа үмдөөд, эзэн хаанай ордоной дотоо хашаа руу зүбшөөлгүйгөөр оробо. Энэ үедэ хаан ордоной хойморто, орохо үүдэнэй шанха урдаһаа хараһан талада табяатай хан шэрээ-сэнтиидээ заларжа байгаа. 2 Ордоной шанха урда хашаа соо зогсожо байгааша Эстээрые харахалаараа эзэн хаан таалан хүлеэжэ абахаар байһанаа элирхэйлэн, тэрээн тээшэ алтан баягаа шэглүүлбэ. Тиихэдэнь Эстээр дүтэлжэ, баягай үзүүртэ гар хүрэбэ. 3 Хаан тэрээндэ:

– Эстээр хатан, шамда юун хэрэгтэйб? Намда ямар гуйлтатайбши? Хан түрынгөө хахадыньшье шамда үгэхөөр бэлэмби, – гэжэ хэлэбэ.

4 – Эзэн хаан, танай һанаанда таарамжатай һаань, танда зорюулжа минии бэлдэһэн найрта Һамаантай хамта морилыт, – гэжэ Эстээр хэлэбэ.

5 Хаан түшэмэлнүүдээ дуудан:

– Һамааниие түргэн дуудагты! Эстээрэй хэлэһэнэй ёһоор болог, – гэбэ. Тиигээд Эстээрэй бэлдэһэн найрта хаан Һамаантай хамта ерэбэ. 6 Үзэмэй дараһан архи уужа һуухадаа, хаан Эстээртэ хандан:

– Юу хүсэнэбши, тэрэнииешни бүтээхэб. Ямар гуйлтатайбши? Хан түрынгөө хахадыеньшье хамаагүй үгэхэб, – гэжэ хэлэбэ.

7 Эстээр харюудань:

– Намда нэгэл гуйлта хүсэл бии. 8 Эзэн хаан, танай һанаанда таараад байгаа һаамни, минии гуйлта, хүсэлые та бэелүүлхээр байгаа һаа, үглөөдэр минии бэлдэгшэ найрта Һамаантай хоюулаа ерыт даа. Үглөөдэр би танда бүхы юумээ хэлэхэб, – гэбэ.

Һамаан Мордохайе саазалха һанаатай

9 Тэрэ найрһаа Һамаан сээжэ тэнигэр, сэдьхэл дүүрэн гараба. Ордоной гол хаалгын дэргэдэ һуугааша Мордохайтай тэрэ дайралдаба ха. Мордохай тэрэниие хараад, бодобошьегүй, һууриһаа хүдэлбэшьегүй. Тиихэдэнь Һамаан Мордохайда ехэ уурлаа бэлэй.

10 Гэбэшье Һамаан бэеэ барижа, тэрээндэ юушье хэлэнгүй, гэр тээшээ ошобо. Гэртээ ерээд, тэрэ хани нүхэдөө, Зээрэш гэдэг һамгаяа ерүүлбэ ха. 11 Һамаан тэдээндэ баян дэлгэр байдалаа, олон хүбүүдтэй байһанаа, хаанай тэрэниие үндэрөөр сэгнэжэ, хан түрын бүхы захирагша, ноёдһоо дээгүүр тушаалда табиһан тухай хөөрэн байгаа бэлэй.

12 Һамаан:

– Тэрээнһээ гадна Эстээр хатан эзэн хаанда зорюулан найр бэлдэхэдээ, гансал намайе уряа. Үглөөдэр би хаантай хамта баһа тэрэнэй найрта уряалтайб. 13 Гэбэшье хаанай ордоной хаалгын дэргэдэ һуугааша Мордохай иудейн минии нюдэндэ үзэгдэжэ байгаа сагта би хэзээдэшье сэдьхэл дүүрэн байжа шадахагүйб, – гэбэ.

14 Зээрэш һамганиинь ба бүхы нүхэдынь тэрээндэ:

– Табин тохой үндэртэй үлгэхэ бахана бодхуула. Үглөөдэр хааниие бараалхахадаа, Мордохайе тэрээндэ үлгэжэ алаг гэжэ хэлээрэй. Тиигээд хаантай хамта хүхюутэй юумэд найрта ошооройт, – гэһэн зүбшэл үгэбэ.

Энэ зүбшэл Һамаанда һайшаагдажа, тэрэ үлгэхэ бахана бодхуулба.