Est 8 | BxrBBL2024 | STEP | Тэрэ үдэртөө Ахашвероош хаан иудейнүүдэй хара дайсан Һамаанай гэр байра, зөөри хогшолые Эстээр хатанда бэлэг болгон үгэбэ. Эстээр Мордохайтай ямар хамаа харилсаатай байһанаа хаанда ойлгуулжа, хаан Мордохайе ордондоо уриба.

‏ Esther 8

Еврейнүүдэй абарагдаһан тухай

1 Тэрэ үдэртөө Ахашвероош хаан иудейнүүдэй хара дайсан Һамаанай гэр байра, зөөри хогшолые Эстээр хатанда бэлэг болгон үгэбэ. Эстээр Мордохайтай ямар хамаа харилсаатай байһанаа хаанда ойлгуулжа, хаан Мордохайе ордондоо уриба. 2 Һамаанһаа бусаажа абаһан тамгатай бэһэлигээ хаан тайлан абажа, Мордохайда үгөө һэн. Эстээр Һамаанай зөөри зөөшын эрхилэгшээр Мордохайе томилбо.

3 Тиигээд Эстээр дахин хааниие бараалхан, хүлдэнь һүгэдэн уйлажа, Агаагай удам угсаа болохо Һамаанай иудейнүүдэй урдаһаа һэдэгшэ ёро муу үйлэ хэрэгүүдые болюулхыень гуйба. 4 Хаан Эстээр руу алтан баягаа шэглүүлжэ, Эстээр бодоод, хаанай урда зогсон:

5 – Минии эрхим хаан, хэрбээ һанаандатнай минии таараһан, үршөөл хайра доротнай байгаа һаамни, эзэн хаанайм бүхы можо нютагуудаар ажаһуугша иудейнүүдые усадхахаар Агаагай удам угсаа болохо Һаммидаатын Һамаанай һэдэн гаргаһан тогтоолые болюулха тухай зарлиг гаргажа болохо гү? 6 Үгы һаа, түрэл арадыем усадхажа байхыень би миин хаража, тэсэжэ оройдоошье шадахагүй байнаб. Түрэл саданарайнгаа хосоржо байхые амархан хаража шадахагүйб, – гэжэ хэлэбэ.

7 Тиихэдэнь Ахашвероош хаан Эстээр хатанда, иудей Мордохайда:

– Түрэл арадтнай болохо иудейнүүдэй урдаһаа үйлэдэһэн хэрэгүүдэйнь түлөө би Һамааниие үлгэжэ, эд зөөрииень Эстээртэ үгөө һэм. 8 Теэд хуулиин ёһоор хаанай тамгаар тамгалжа, хаанай нэрээр гаргаһан зарлигые болюулха арга намда байхагүй. Зүгөөр байдал хубилгахын тула иудейнүүд тушаа минии нэрээр шэнэ зарлиг гаргажа, минии бэһэлиг-тамгаар тамгалхада болохо. Тэрэ зарлиг соо юу бэшэхэеэ та бүгэдэ өөһэдөө шиидэнэ бэзэт, – гэжэ хэлэбэ.

9 Иигэжэ иудейнүүдэй он тоололгоор гурбадахи һарын, иудей хэлээр «сиваан» һарын хорин гурбанда хаанай бэшээшэд дуудуулагдажа, Перс ба Мидиин улас түрын Энэдхэгһээ Эфиопи улас түрэ хүрэтэр оршодог зуун хорин долоон можо нютагаар ажаһуугааша бүхы иудейнүүдтэ, улас түрын засаг баригшадта барандань, можо аймагай захирагшадта, ноёд, түшэмэлнүүдтэ зорюулһан зарлигые Мордохайн хэлэгшын ёһоор бэшэбэ. Энэ зарлиг улас түрын бүхы можо нютагуудаар ажаһуугааша үндэһэ яһатан бүхэнэй хэлэн дээрэ, өөһэдынь үзэг бэшэгээр бэшэгдэбэ. Энээнһээ гадна зарлиг иудей хэлэн дээрэ үзэг бэшэгээрнь бэшэгдэбэ. 10 Мордохай Ахашвероош хаанай нэрээр зарлиг бэшүүлээд, хаанай тамгаар тамгалуулжа, моридойнь байрада тэжээгдэһэн хурдан моридые унаһан элшэнэрээр тараалгаба.

11 Хаанай нэрээр бүтээгдэһэн энэ зарлигай ёһоор бүхы хотонуудаар ажаһуугааша иудейнүүд сугларжа, өөһэдыгөө хамгаалха эрхэтэй болобо. Энэ юун бэ гэбэл, хэрбээ ямар нэгэн угсаатанай гү, али нютаг можын зоной иудейнүүдые дайража, эхэнэр, хүүгэдтэ добтолжо, эд зөөрииень буляажа абахаяа һанаа һаань, иудейнүүд мүн лэ тэдээндэ добтолжо, бүхы зонииень алажа усадхаад, эд зөөрииень олзолхо эрхэтэй болоо бэлэй. 12 Зарлигай ёһоор иудей он тоололгын арбан хоёрдохи гэхэ гү, али иудей хэлээр адаар һарын арбан гурбанда, гансахан үдэрэй туршада энэ үйлэ ябадал улас түрөөр болохо ёһотой һэн. 13 Тэрэ үдэр дайсанһаа үһөөгөө абахаар иудейнүүдэй бэлэн байхын тула хуулиин хүсэтэй буулгабари бэшэгүүдые хан түрын бүхы можо нютагуудаар зарлажа, бүхы үндэһэ яһатанда үргэнөөр дуулган тарааха шиидхэбэри гаргагдаа һэн. 14 Хаанай захиралтын ёһоор хурдан моридые унагша элшэнэр зарлиг тараахаяа яаралтай шуумайба. Энээнһээ гадна ниислэл хото Сүүзэдэ зарлиг тунхаглагдаба.

15 Энээнэй удаа хүхэ, сагаан үнгэтэй хаанай һайхан хубсаһа үмдэнхэй, алтан томо титим толгойдоо табинхай, шад улаан үнгэтэй миндаһан нэмэргэ нэмэрэнхэй Мордохайн хаанай ордонһоо гаража ерэхэдэ, ниислэл хотынхид баярлан, хашхаралдажа байжа угтаба. 16 Энэ үдэр иудейнүүдтэ ехэ гэрэл туяатай, баяр баясхалантай, аза жаргалтай, алдар хүндэтэй үдэр болоо һэн.

17 Хаанай энэ зарлигай зарлагдаһан газар бүхэндэ иудейнүүд үргэн ехэ баяр тэмдэглэн, найр наада хэдэг байба. Энэ улас түрын ондоо үндэһэ яһатадай олохон зон иудейнүүдһээ айжа, иудейбди гэжэ өөһэдыгөө нэрлэдэг болоо бэлэй.