‏ Exodus 12

Паасхын һайндэрые тогтоолго

1Египедэй газарта байхадаа Эзэн Моисей Аһароон хоёрто зарлиг болоо бэлэй:

2– Энэ һара хадаа хамагай эхин һара, жэлэй түрүүшын һара болуужаг. 3Израилиин бүхы зондо хэлээрэйгты: энэ һарын арбанай үдэртэ бүлэ бүхэн нэгэ хурьга абуужаг. 4Нэгэ хурьга эдижэ барахагүй багахан бүлэтэй һаа, хүнэйнгөө тоогоор хүршэтэеэ хамһажа абахада болоно. Нэгэ хурьга хэды зон эдинэб, шадал соогоо болуужаг. 5Ямаршье дутагдал гажуугүй жэлтэй эрэ хурьган байха зэргэтэй. Хурьганай орондо эшэгэ абахада баһа болохо. 6Тус һарын арбан дүрбэн болоходо үдэшын боро хараанаар хурьгаяа үүсэлэн гаргаха ёһотой. Израилиин ниигэмдэ хабаатай зон булта тиигэхэ ушартай. 7Шуһанһаань абажа, эдихэ гэрэйнгээ үүдэнэй хоёр тотогодо болон хүндэлэбшэдэ түрхихэт. 8Мяхыень тэрэ һүниндөө гал дээрэ хууража эдеэрэйгты, эһээлтэгүй талхантай, гашуун ногоотой холижо эдихэ хэрэгтэй. 9Дутуу хуураад түүхэйгөөр гү, али уһан соо шанаад эдижэ болохогүй, тархи тагалсагтайнь, гэдэһэ дотортойнь галда хууража, һайтар болгоод лэ эдихэ хэрэгтэй. 10Үглөө болоторнь орхижо болохогүй, үлөө һаань, шатаагты. 11Эдихэдээ, бүһэеэ бүһэлээд, гуталаа үмдөөд, харгын тулуур гартаа баряад шамдажа эдихэ ёһотойт. Энэ хадаа Эзэниие хүндэлһэн Паасхын һайндэр гээшэ.

12Харин Би тэрэ һүниндөө Египет орониие һэтэ гаража, тэндэхи хамаг зоной гэр бүлэдэ түрэһэн ехэ хүбүүдэйнь, малайнь түрүүшын эрэ түлнүүдэй ами таһалан нэрбэхэб. Египедэй бурхан шүтөөнгүүдые бүгэдые хэһээхэ Эзэн мүн гээшэб. 13Харин танай байһан гэрнүүдтэ шуһан тэмдэг байгуужаг, шуһа харахадаа, хажуугаартнай гарахаб. Египедэй зониие һүнөөхэдэм, үхэл таанадай хажуугаар гараха.

14Энэ үдэрые дурсажа байгты. Хойшодоо үеын үедэ энэ Эзэнэй һайндэр гэжэ тэмдэглэжэ байгты. Энэтнай таанадта хэтын тогтоол болоно. 15Долоон үдэр эһээбэригүй талхаар болгоһон хилээмэ эдигты, анханһаа эхилжэ эһээбэри гэртээ үгы хэгты. Энэ долоон хоног соо эһээһэн юумэ эдиһэн хүн Израилиин хүн гэжэ бэшэ нэрлэгдэхэгүй.

16Түрүүшын үдэр нангин суглаагаа үнгэргэгты, мүн долоодохи үдэртэнь баһал тиигэгты. Эдэ үдэрнүүдтэ ямаршье ажал хэжэ болохогүй, гансал эдеэ хоолоо бэлдэхэдэ болохо.

17Эһээлтэгүй талханай һайндэр гэжэ тэмдэглэгты. Энэ үдэр Би таанадые Египедһээ гаргаһан болоноб, ушар тиимэһээ хэтын тогтоол болгон энэ һайндэр хойшодоо үеын үедэ тэмдэглэжэ ябаха болонот.

18Түрүүшэ һарын арбан дүрбэдэхи үдэрэй үдэшэһөө хорин нэгэнэй үдэшэ болотор эһээнгүй бариһан хилээмэ эдидэг байхат. 19Долоон хоногой туршада танай гэртэ эһээбэри гэжэ байха ёһогүй, эһээһэн талхан зүйл амандаа хэһэн ямар ерүүлшье, тэрэ нютагайшье хүн байг илгаагүй, иимэ хүн Израилиин хүн гэжэ тоологдохоёо болихо. 20Эһээһэн юумэ бү эдигты, хаанашье ябахадаа эһээбэригүй талха эдидэг бологты.

21Моисей Израилиин аха захатаниие суглуулжа, зарлиг болобо:

– Гэр бүлэ бүхэн хурьга эшэгэ шэлэжэ, үүсэлэн гаргаг – Паасха бэлдэг. 22Иссопоор хэгдэһэн арюудхан сүршэдэг шүүр абажа, амһарта соо байһан шуһанда норгоод, үүдэнэй хоёр тотого ба хүндэлэбшэ шуһаар будаха ёһотойт. Үглөөгүүр болотор хэншье гэрһээ бү гараг. 23Египет ороной ууган хүбүүдэй ами хороохо гэжэ ябаһан Эзэн тотого, хүндэлэбшэдэ байһан шуһа харахадаа, хажуугаартнай гараха, усадхагша элшые таанадта оруулхагүй.

24Энэ хадаа нангин тогтоол болохонь дамжаггүй, таанар болон үри һадаһантнай сахижа ябуужаг. 25Эзэнэй найдуулһан орон нютагта ороодшье энэ ёһолол сахигты. 26Үри хүүгэдэйнгээ «энэ ямар ёһолол гээшэб?» гээд һурабал, 27«Египет зоной ами хорооходоо, Израилиин зоной гэрнүүдые алгасан гаража, манай бүлэнүүдые хайрлаһан Эзэндэ зорюулһан Паасхын үргэл гээшэ» гэжэ хэлэхэт.

Арад зон Эзэнэй урда үбдэглэн дохижо ёһолбо. 28Израиль угсаатан Эзэнэй Моисей Аһароон хоёрто айладаһые бүгэдыень бүтээбэ.

Ууган хүбүүдэй ба малай түрүүшын түлэй үхэл

29Һүниин тэндэ Эзэн Египедэй хан шэрээдэ һууһан фараоной ууган хүбүүнһээ эхилээд, түрмэдэ һууһан гэмтэнэй түрүүшын хүбүүн хүрэтэр адли илгаагүй хамаг гэр бүлын ехэ хүбүүдэй, мүн үхэр малай түрүүшын түлэй ами хороожо орхибо. 30Фараон һүни бодобо, тэрэнэй түшэмэлнүүд, албатан арад бултадаа бодобо. Египет орондо уй ехэ уйлаан, гай ехэ хүлгөөн болобо. Үхэлэй ороогүй гэр Египедтэ байбагүй.

31Фараон тэрэл һүниндөө Моисей Аһароон хоёрые дуудажа ерүүлээд, тэдээндэ хэлэбэ:

– Ябагты, минии арад зоной дундаһаа гарагты! Израиль угсаатаниие абаашажа, хэлэһэн тахилаа хэгты. 32Бодо малаа, жэжэ томыень бултыень абагты. Ябагты, үреэл хэшэгээ намда хүртөөгты!

33Орон нютагһаамнай түргэн ябагты гэжэ Египедэй зон израильшуудые баалажа захалба; танай ябаагүй һаа, бидэ бултадаа үхэхэмнай гэлдэбэ. 34Эһэжэ үрдеэгүй талхаяа хубсаһандаа монсогойлжо уяад, зон гараба.

35Моисейн хэлэһээр, Израилиин зон Египедэй зонһоо алта мүнгэн зүүдхэл хэрэгсэлнүүдые, хубсаһа хунар эрижэ абаба. 36Эзэн египет зоной сэдьхэл зөөлэрүүлбэ – тэдэ израильшуудай эриһэн лэ юумыень үгэбэ. Египедһээ тэдэ олзо ехэтэй гараа бэлэй.

Израильшууд Египедһээ гаран ошоно

37Израиль угсаатан Раамсээсһээ Суккоот тээшэ гараба. Багашуулгүйгөөр зургаан зуу мянган ябаган эрэшүүл гэжэ тоолоо бэлэй. 38Ондоошье угсаатан тэдээнтэй ябалсаба, олон тоото эбэртэ бодо, томо жэжэ малаа абажа гараба.

39Египедһээ үлдүүлхэдээ, харгыдаа эдихэ эдеэ бэлдэжэ үрдеэгүй, яаралтай гараһан тэдэ эһэжэ үрдеэгүй талхаяа болгожо эдибэ.

40Израиль угсаатан Египедтэ дүрбэн зуун гушан жэлэй туршада һуугаа бэлэй. 41Дүрбэн зуун гушан жэлэй үнгэрһэн хойно энэ һүни Эзэнэй сэрэг шэнгеэр жагсаһан арад Египедһээ мултаран гаража ошобо.

42Энэ хадаа Египедһээ гаргаһан Эзэндэ мүргэн хонохо һэримжэтэй һүни болоо. Израиль угсаатанда хэтэдээ Эзэндэ мүргэн нойргүй хонохо һүнинь мүн.

Паасхын ёһо гурим

43Эзэн Моисей Аһароон хоёрто зарлиг болобо:

– Энэ Паасхын ёһо гээшэ: ондоо угсаата хэншье эдихэ ёһогүй. 44Мүнгөөр худалдажа абаһан богоолой бэлгэ отолболшни, тэрэ эдихэ зэргэтэй. 45Хүлһэншэ ерүүл хүн тэрэниие эдихэ ёһогүй. 46Эдиһэн гэрһээ мяха гаргажа болохогүй, гансаханшье яһыень бү хухалагты. 47Израилиин зон бүгэдөөрөө сахин бэелүүлхэ ёһотой. 48Танайда ерүүл хүн Эзэндэ зорюулагдаһан Паасхын һайндэр һайндэрлэхэ гээ һаань, тэрэнэй гэр бүлын бүхы эрэнүүдэй бэлгэ отолоорой, тэрэнэйл һүүлээр һайндэрлэхэ эрхэтэй тэрэ болохо. Танай орон нютагта түрэһэн хүн мэтэ болохо. Бэлгэеэ отолуулаагүй хүн һайндэрлэхэ ёһогүй. 49Удамайшье хүндэ, танай дунда һуудаг ерүүлшье хүндэ хуули адли байха зэргэтэй.

50Эзэнэй Моисей ба Аһароондо зарлиг болоһоорнь израильшууд бүтээбэ. 51Тэрэ үдэр Эзэн Израиль угсаатаниие Египедһээ сэрэг шэнгеэр жагсаан гаргаба.