Exo 13 | BxrBBL2024 | STEP | Эзэн Моисейдэ зарлиг болобо:

‏ Exodus 13

Ууган хүбүүе, малай түрүүшын түлые Бурханда зорюулга

1 Эзэн Моисейдэ зарлиг болобо:

2 – Израилиин зоной дунда эхын умайһаа унаһан ехэ хүбүүе, малай түрүүшын түлые Намда зорюулдаг бологты: эдэш Минии болоно.

Эһээлтэгүй талханай һайндэр

3 Моисей угсаата арадтаа хэлэбэ:

– Египедһээ, богоол байһан газарһаа гараһан энэ үдэрые һанажа ябагты, тэндэһээ таанадые Эзэн хүсэ хүсэлэн гаргаа һэн. Эһээгдэһэн юумэ бү эдигты. 4 Авиив һарада ^{▼▼ Хабарай авиив (хожомынь нисаан) һара (мартын тэнһээ апрелиин тэн болотор) жэлэй эхин гэжэ тоологдодог һэн. Египедһээ гаралгын дурасхаалда Эзэн тэрээниие нэгэдэхи һара гэжэ тодорхойлһон байгаа юм.} мүнөөдэр гараба гээшэт.

5 Ханаһаан, хээт, эмоор, хиив ба евүүс угсаатанай анхан һууһан, һү тарагаар, бал тоһоор билтаржа байһан газар үгэхэб гэжэ эсэгэнэртэтнай Эзэн тангариглаһан юм. Эзэнэй тиишэнь таанадые оруулхада, энэ һарада алдангүй иимэ мүргэл хэдэг байхат: 6 долоон үдэртэ эһээлтэгүй талха эдихэт, долоодохи үдэрынь Эзэндэ зорюулагдаһан үдэр гээд сахихат. 7 Эһээлтэгүй талха долоон хоногто эдихэ ёһо болохо жэшээтэй, эһээлтэтэй талха, хүрэнгэ гэртээшье, ойро дүтэшье байлгажа болохогүй. 8 Тэрэ үдэр хүбүүндээ хэлэгты: энэ хадаа Египедһээ гарахадам Эзэнэй хэһэн аша туһын дурасхаалынь болоно.

9 Энэ хадаа Эзэнэй зарлиг тогтоохын тулада гар дээрэш тэмдэг, нюдэнэйш урда хүшөө болохо ёһотой. Эзэнэй зарлиг хуули үгэ хэлэндэш хододоо байха ёһотой, юуб гэхэдэ, Эзэн хүсэ хүсэлэн, Египедһээ шамайе гаргаһан байна.

10 Тогтоогдоһон сагта жэл бүри энэ тогтоол гүйсэдхэдэг байгты.

11 Үбгэ эсэгэнэртэш үгэхэм гэжэ тангариглаһан Ханаһаан орондо Эзэнэй шамайе асарһан хойно 12 анха түрэһэн ууган хүбүүдээ Тэрээндэ зорюулан үгэхэ ёһотойш. Малай түрүүшын эрэ түл баһал Тэрэнэй болохо. 13 Элжэгэнэй түрүүшын тугалай түлөө хурьга үгэжэ абадаг байхаш, абахагүй һаа, амаргал хүзүүень булгалха ёһотойш. Хүнэй ууган хүбүүдэй түлөө – өөрынгөө хүбүүнэй түлөө – түлөөһэ үгэдэг байхаш ^{▼▼ Ууган хүбүүнэй түлөө мүнгэ түлэжэ, Эзэндэ үргэл болгон үргэхэһөө сүлөөлхэдэ болохо байгаа.}.

14 Хожом хэзээ нэгэтэ хүбүүншни «Энэ юун гэһэн удхатайб?» гэжэ асууба гэлэй, тэрээндэ иигэжэ харюусахаш: «Эзэн хүсэтэ гараараа Египедэй дарлалтаһаа маанадые гаргаһан юм. 15 Фараоной үсэд бодолоор маанадые табингүй тамалхадань, Эзэн Египедэй зоной ууган хүбүүдэй, малайнь түрүүшын түлнүүдэй ами хороогоо. Тэрэ гэһээр лэ анхан түрэһэн малай эрэ түл Эзэндэ үргэнэб, өөрын ууган хүбүүнэй түлөө түлөөһэ үгэдэг заншалтай хүмби. 16 Энэ хадаа шамда гар дээрэ отолһон, сохо дээрэ шатааһан шарха мэтэ сараа тамга болохо жэшээтэй. Юуб гэхэдэ, Эзэн ашата хүсөөрөө маанадые Египедһээ гаргаа».

Хулһата далай гаталалга

17 Израилиин зониие фараоной табихадань, Бурхан тэдэниие Пилиштын газараар ябуулбагүй – энэнь даншье богони харгы байгаа. Эзэн иигэжэ сэдьхэбэ: тэндэхи арадтай дайлалдаха болохобди гэжэ харахадаа зүрхэ алдаад, Египет руугаа бусахадаа болохо. 18 Тиин Эзэн тэдэниие тойруу харгыгаар, Хулһата далайн хажуудахи сүл губи тээшэ ябуулба. Дайшалхы жагсаалаар Египедһээ гараһан Израиль угсаатан зааһан тээшэнь шэглээ бэлэй.

19 Моисей Египедһээ Иосифой яһа бэеынь абажа гараа һэн. Амиды байхадаа, Иосиф Израилиин хүбүүдһээ тангариг абаһан гэхэ: «Эзэнэй хэзээ нэгэтэ һаналаа хүсэлдүүлэн, Египедһээ таанадые гаргаха сагайнь ерэбэл, минии яһа хүүр эндэ орхижо бү байгты, абажа гарахат».

20 Суккоодһоо гаража, Израилиин зон сүл губиин захадахи Этаам гэжэ газарта тогтобо. 21 Эзэн Өөрөө тэдэнэй урда ябаа: үдэр, һүнигүй ябахынь тула үдэртөө зам заажа, үүлэн бахана мэтэ, һүниндөө зам гэрэлтүүлжэ, гал бахана мэтэ. 22 Үдэрынь үүлэн болодог, һүнинь гал болодог бахана урдань ходо үзэгдэжэ, Израиль угсаатаниие орхингүй замдань хүтэлэн ябаба.