‏ Exodus 15

Моисейн илалтын дуун

1Моисей болон Израиль угсаатан Эзэндэ магтаал дуу дуулаба: – Эзэндэ магтаал дуулаял,
Тэрэ агуу үндэр!
Сэрэгшые моритойнь далай руу шэдэбэл!
2Хүсэн түгэлдэр Эзэн минии Бурхан,
Алдар соломни, абарални бологшо
Ашата Бурхамни!
Элинсэгэйм, эсэгым Бурхан болоо.
Эгүүридэ Тэрэнэй соло дуудахалби!
3Дайн байлдаанда хатуу Эзэн!
Тэрэнэй нэрэ – Эзэн!
4Фараоной дайшалхы тэргэнүүдые, сэрэгыень далайда шэнгээгээ,
шэлдэг сэрэгшэдыень Хулһата далай соо һалган хосороогоо.
5Гүн уһан тэдэниие залгяа:
шулуун мэтэ тэдэ далайн оёор руу шэнгээ.
6Эзэн! Гартнай шанга, хүсэтэй!
Эзэн! Гартнай дайсаниие нэрбээ!
7Алдар солынтнай жабхалан
эсэргүүсэгшэдэй һүр һүлдые һүнөөгөө.
Урдаһаатнай бодогшод уур хилэнгэйтнай галда
хагдандал шатажа һалаа.
8Үлеэхэдэтнай, уһа долгин хүбхыбэ,
хана мэтэ хажуу тээшээ эбхэрэн зогсобо,
Хулһата далайн уһанай эрьюулгэ
хуурай газарай хайрта адли болобо.
9«Хүсэһүүб даа наанаһаашни намнажа,
хайшаа намһаа зугадабаш, – гэһэн
харата дайсанай бодол тэнюун, –
ойронь хүрэжэ гамгүй хюдахадаа,
олзодо одоол садахамни хаяа,
эритэ мэсынгээ үзүүртэ оруулжа,
эльгэ сэдьхэлээ ханаха сагни ерээл».
10Үлеэхэдэтнай, уһан долгин дайсаниие хушаа,
шэдэһэн туулган мэтэ уһанда тэдэ шэнгээ.
11Эзэнтэй жэшэхээр бурхад үгыл!
Хутагтанарай дунда Тан шэнги
хүсэ шадалтай хэншье олдохогүй!
Алдар солоороо һүр дарагша, эди шэдиин Эзэн!
12Гараа дэлгэхэдэтнай – газар дайсадые үрэбхеэ!
13Абарагша угсаатанаа үршөөлдэ хүртөөн,
арюун нангин газартаа
абаашаха гэжэ дахуулбаш.
14Арадууд бүгэдөөрөө дуулан,
айжа һүрдэжэ байнал!
Пилиштын зон һалганан байна,
15Эдоомой түшэмэлнүүд шэшэрэлдээ,
Моһаабай удамаршад айдаһаа хүрэнхэй,
Ханаһаан ороной зон ухаагаа алдатараа һүрдэнхэй.
16Айжа һүрдэжэ байг тэдэ!
Танай хүсэтэ гар доро
шулуун шэнги шэмээгүй болог!
Эзэн, энэ Өөрын болгоһон
арадтнай алад гаража ябанал!
17Нангин хададаа тэдэниие нютагжуулхат,
Өөрын һууха байшан тэндэ баряат,
тахил үргэлэй һүмэ бодхоот!
18Эзэнэй хаан түрэ
хэтын хэтэдэ үргэмжэлэгдэхэ!

19Фараоной морин сэрэгэй далайда ороходо, Эзэн урдаһаань уһа долги салгидуулан эбхэрүүлээ. Харин Израилиин зон далайн оёороор хуурай газарай хайр дээгүүр ябаһандал гараа!

Мириамай илалтын дуун

20Аһарооной эгэшэ, мэдэлшэ Мириам хэсэ сохижо захалба. Бүхы эхэнэрнүүд хойноһоонь ябажа, хэсэ сохин, хатар дэлгэбэ. 21Мириам мэдэлшэ дуугаа дуулаба:

– Эзэндэ магтаал дуулаял!

Һүр жабхаланта хүсэеэ Тэрэ харуулба!

Сэрэгшые моритойнь далай руу шэдэбэ!

Сүл губида тэнэн ябалга

22Хулһата далайһаа Моисей Израиль угсаатаниие Шүүр губи тээшэ дахуулан ябаба. Шүүр губида гурбан үдэрэй туршада хаанашье уһа оложо ядаба. 23Мараа гэжэ газарта уһан олдоходоо, уужа болохоор бэшэ гашуун байба. 24Зон гэмэрэлдэжэ эхилбэ, «юу ууха зонбибди?» гэжэ Моисейһээ асууба. 25Моисей Эзэндэ зальбарба, Эзэн модо тэрээндэ харуулба. Моисейн модонһоо мүшэр хухалжа уһа руу хаяхадань, уһаниинь уухаар амтатай болобо. Тэрэ газарта Бурхан хуули тогтоол тэдээндэ үгөө агша бэлэй, тэрэл газарта туршаха туршалгаар шалгаа агша бэлэй.

26Эзэн айладхаба:

– Танай Бурхан болохо Эзэнэй үгэ дуулажа, Тэрээндэ таатай юумэ үйлэдэжэ, хэлэһэн зарлигынь соносожо, буулгаһан хуулииень тогтоожо байбалтнай, египет угсаатанда хүргэһэн үбшэн тахал таанадта хэзээдэшье хүргэхэгүйб. Би эмшэлэгшэ Эзэн гээшэб!

27Израиль угсаатан Элиим гэжэ газарта ерэбэ. Тэндэнь арбан хоёр аршаан булаг ба хурмын далан модон бии бэлэй. Аршаанай дэргэдэ тогтобо.