Exo 16 | BxrBBL2024 | STEP | Элиимһээ Синай тээшэ зориходоо, Израиль угсаатан тэдэ хоёрой хоорондо байдаг Сиин губида ерэбэ. Египедһээ гараһан сагһаа хойшо хоёрдохи һарын арбан табанай үдэр бэлэй.

‏ Exodus 16

Сагаан будаа ба бүднэ шубууд

1 Элиимһээ Синай ^{▼▼ Бурханай Израиль угсаатанда һургаал заабари үгэһэн хада олонхи ушарта Синай гэжэ, харин 3-дахи бүлэгтэ Хорээб гэжэ нэрлэгдэнэ. Эндэ бэшэлгын хоёр заншал гарана.} тээшэ зориходоо, Израиль угсаатан тэдэ хоёрой хоорондо байдаг Сиин губида ерэбэ. Египедһээ гараһан сагһаа хойшо хоёрдохи һарын арбан табанай үдэр бэлэй. 2 Губида байхадаа, Израилиин хүбүүд Моисей Аһароон хоёрто гэмэрэлдэжэ эхилбэ.

3 – Египедтэ Эзэнэй гарһаа үхөө һаамнай дээрэ һэн ха, – гэлдэбэ. – Тэндэ мяхатай тогоо тойроод һуугша һэмди, дуран соогоо талха эдигшэ бэлэйбди. Арад зоноо үлэсхэлэндэ дайруулжа үхүүлхэ гэжэ энэ сүл губида асарба гүт?

4 Эзэн Моисейдэ айладаба:

– Би таанадта бороогой ороһон шэнгеэр огторгойһоо талха оруулхаб. Үдэр бүри зон гаража, үдэрэйнгөө эдихэ хоол суглуулдаг байха. Минии тогтооһон эрилтэ байха, тэрэниие сахина гү гэжэ Би Өөрөө хинахаб. 5 Долоон хоногой зургаадахи үдэртэнь урда үдэрһөө хоёр дахин ехые суглуулһанаа тэдэ хараха.

6 Моисей ба Аһароон Израилиин хүбүүдтэ хэлэбэ:

– Египедһээ таниие Эзэн дахуулан гаргаа гэжэ энэ үдэшэндөө ойлгохот. 7 Үглөөдэр үглөөгүүр Эзэнэй һүр соло харахат. Юуб гэхэдэ, таанадай гэмэрэлдээн Тэрээндэ дуулдаба. Харин бидэ хэн гээшэбибди? Юундэ манда гэмэрхэ болобот?

8 – Үдэшэндөө Эзэн мяха үршөөхэ, харин үглөөдэр садатараа хилээмэ эдихэт. Юуб гэхэдэ, танай гэмэрэлдээе Тэрэ дуулаа. Харин бидэ хэн гээшэбибди? Маанадые бэшэ, Эзэниие муушална гээшэт, – гэжэ Моисей хэлэбэ.

9 – Израилиин ниигэмые Эзэнэй урда зогсохо гэжэ зонхило. Юуб гэхэдэ, тэдэнэй гэмэрэлдээн Тэрээндэ дуулдаа, – гэжэ Моисей Аһароондо хэлэбэ.

10 Эдэ үгэнүүдые Аһарооной Израилиин зондо дамжуулхадань, тэдэ губи тээшэ харасаа шэглүүлбэ. Тэндэхи зэрэлгээтэ огторгойдо Эзэнэй һүр һүлдэ үүлэн түхэлөөр үзэгдөө һэн.

11 Эзэн Моисейдэ айладаба:

12 – Би Израиль угсаатанай гэмэрэлдээ сонособоб. Тэдээндэ иигэжэ хэлэ: «Үдэшэндөө мяха, үглөөдэрынь садатараа талха хилээмэ эдихэт. Таанадай Бурхан болодог Эзэн гэжэ тиихэдэ мэдэхэт».

13 Үдэшэлэн тоогүй олон бүднэ шубууд ниидэжэ ерэбэ. Зоной тогтоһон хүреэн соогуур дүүрэн шубуун бии болобо.

Үглөөгүүр хүреэень тойроод шүүдэр унаһан байба. 14 Шүүдэрэй хатахада, губида хюруу унаһан шэнги, гэшхэхэдэ шар-шар гэһэн нимгэхэн сэн бун газар хушаһан байба. 15 Израилиин хүбүүд ойлгожо ядан, бэе бэеһээ энэ юун гээшэб гэжэ асуужа байба. Моисей хэлэбэ:

– Таанадай эдихэ будаа Эзэн үршөөбэ гээшэ. 16 Гэбэшье заабаритай байха: үлүү хомхойронгүй, хүн бүхэнэй үдэр соол эдихэ зэргээр суглуулха шухала гээд Эзэн айладхаа.

17 Израиль угсаатан хэлэһээрнь болоо бэлэй. Шадаха зэргээрээ – хэн ехые, хэн багые – будаа суглуулба, 18 харин гайха ехэ, суглуулһанаа хэмжэхэдэнь, ехые суглуулһан хүн үлүү юумэгүй байгаа, багые суглуулһан хүн дутагдалгүй байгаа. Бүлэ бүхэндэ хэрэгтэй хэмжээн лэ сугларһан байба.

19 – Суглуулһанаа үглөө эдихэбди гэжэ орхижо бү байгаарайгты, – гэжэ Моисей заабарилба. 20 Үгыень дуулаагүй заримашуул олдоол һааб даа. Будаа үлээжэ, үглөө болотор орхиходонь, будаадань хорхой бии болоһон байба. Моисей тэдээндэ ехэтэ уурлаба. 21 Үглөө бүри гэр бүлэдөө хүрэхэ хэмжээгээл зон суглуулдаг болобо. Суглуулаагүй будаань үдэрэй наранда хайлашаха юм. 22 Зургаадахи үдэртөө хоёр дахин ехэ хэмжээнэй сагаан будаа суглуулба. Энээн тухай удамаршад Моисейдэ дуулгаба.

23 – Эзэн энээн тухай айладаа агша һэн. Үглөө ажал хэхэгүй амарха үдэр, Эзэнэй табиһан нангин үдэр суббото мүн болоно. Дуратайгаа жэгнэгты, дуратайгаа шанагты, үлэһыень үглөө болотор орхиходош хамаагүй, – гэжэ Моисей хэлэбэ.

24 Моисейн зүбшөөһөөр, зон үлүү эдеэгээ үглөө болотор үлөөбэ һэн ха. Тэрэнь гутабагүй, хорхой бии болобогүй.

25 – Энээнээ мүнөөдэр эдигты. Энэ үдэр хадаа Эзэнэй табиһан нангин гараг гээшэ, газарта юушье олохогүйт. 26 Зургаан үдэр суглуулдаг байхат. Долоодохи үдэртэ Бурханай табиһан субботодо юумэ олохогүйт, – гэбэ Моисей.

27 Зарим зоной долоодохи үдэртэ баһал суглуулха һанаатай гарахадань, юуншье олдобогүй. 28 Эзэн Моисейдэ иигэжэ айладаба:

– Хэзээ болотор Минии тогтооһон тогтоол, хуулинуудые эбдэхэбта? 29 Ойлгоногүй аалта: Би, Эзэн, гараг тогтоогооб, тиимэһээ зургаадахи үдэртэнь хоёр үдэрэй эдеэ үгэнэб. Субботодо хүн бүхэн гэртээ һууха, хайшаашье гараха ёһогүй.

30 Израиль угсаатан гарагай долоондо гэртээ һуужа амардаг болобо. 31 Эзэнэй үгэһэн сагаан будаань халуун үбһэнэй үрэһэн шэнги аад, бал тоһотой боорсогой амтатай байгаа һэн. Тэрэниие израильшууд манна гэжэ нэрлээ. 32 Моисей иигэжэ хэлэбэ:

– Эзэн иигэжэ зарлигтаа: үдэр соо нэгэ хүнэй эдихэ хэмжээнэй сагаан будаа үеһөө үедэ дурасхаал болгон хадагалагдажа байха зэргэтэй. Египедһээ сүл губида ерээд үлэн хооһон зобожо байхадатнай, Эзэнэй үгэһэн эдишые хүн бүхэн үзэжэ байг.

33 – Алтан домбо соо нэгэ хоомэр сагаан будаа хээд, Эзэнэй урда таби, үеһөө үедэ хадагалагдажа байха зэргэтэй, – гэжэ Моисей Аһароондо хэлэбэ. 34 Эзэнэй Моисейдэ захирһаарнь, Аһароон Хэлсээнэй ханзын хажууда амһарта соо сагаан будаа хадагаламжада табиба.

35 Израиль угсаатан Бурханай зааһан нютагта ерэтэрээ, Ханаһаан нютагай хилэ гаталтараа дүшэн жэлэй туршада сагаан будаагаар хоолложо ябаа гэдэг. 36 Хоомэр гээшэнь нэгэ хүниие садхааха гурилай хэмжээн гэхэ гү, али эфаагай арбанай нэгэ хуби болоно.