Exo 17 | BxrBBL2024 | STEP | Сиин губиһаа саашаа ябахадаа, Израилиин зоной бүлэг Эзэнэй заабаряар холо ябангүй тогтодог һэн. Рэпидиим гэжэ газарта тогтобо. Тэндэнь ууха уһанай байхагүйдэ,

‏ Exodus 17

Рэпидиим хабсагайһаа гараһан уһан

1 Сиин губиһаа саашаа ябахадаа, Израилиин зоной бүлэг Эзэнэй заабаряар холо ябангүй тогтодог һэн. Рэпидиим гэжэ газарта тогтобо. Тэндэнь ууха уһанай байхагүйдэ, 2 улад зон үнөөхил Моисейе гэмнэжэ эхилээ һааб даа.

– Уһа оложо үгыш манда, ундамнай хүрэхэдэнь яаха зонбибди? – гэжэ гэмэр гутар гэлдэбэ.

– Уһанай үгыдэ би яахабиб? – гэбэ Моисей. – Эзэнээл туршана гээшэт.

3 Ангаһан зон Моисейһээ һалаха юм бэшэл даа:

– Бидэниие юундэ Египедһээ гаргаабши? Үхи хүүгэдтэеэ, үхэр малтайгаа ангажа үхэхымнай гү?

4 Сүхэрһэн Моисей Эзэнһээ:

– Арад зоноо яаха хээхэмниб? Эдэш удахагүй намайе шулуугаар шэдэжэ алахань лэ, – гэжэ һураба.

5 – Зоной урда гара. Израилиин нэгэ хэды аха заха зон шамтай ябуужаг. Нил мүрэнэй уһа сохигшо дулдыгаа абаарай, тиигээд яба. 6 Тэндэ, Хорээб хада дээрэ, Би урдаш хабсагай дээрэ байлсахаб. Хабсагай ёборходош уһан дэлбэрэн гараха. Зон уһа уужа садаха, – гэжэ Эзэн Моисейе зонхилбо.

Моисей айладхалыень Израилиин ахамад тэргүүтэнэй хараһаар байтар бүтээбэ. 7 Тэрэ газар Массаа ба Мэрибаа ^{▼▼ Евр. Массаа «туршалга, шалгалта», Мэрибаа «зарга, гэмнэлгэ» гэһэн удхатай.} гэжэ нэрлэгдээ бэлэй, юуб гэхэдэ, тэндэ Израиль угсаатан «Эзэн мантай гү, али бэшэ гү?» гэлдэн, Эзэниие зэмэлһэн, тэсэбэрииень туршаһан гэхэ.

Амалээгтэй байлдаан

8 Рэпидиимдэ байхадань, амалээг угсаатан ерэжэ добтолбо.

9 – Амалээг угсаатантай тулалдаха зониие шэлэн аба. Харин би Бурханай дулды гартаа барижа, үндэрэй оройдо зогсохоб, – гэжэ Моисей Иисүүс ^{▼▼ Нүүнэй хүбүүн Иисүүс – Моисейн туһалагша, хожомынь израильшуудай удамарша болоһон хүн. Моисейн наһа барахада, Нүүнэй хүбүүн Иисүүс еврейнүүдые дахуулжа, олон байлдаанда илалта туйлаһан, эсэстээ Эзэнэй заяаһан газарта асарһан гэхэ.} туһалагшадаа хэлэбэ.

10 Нүүнэй хүбүүн Иисүүс Моисейн захиралта дүүргэжэ, амалээг зонтой тулалдаанда зоноо дахуулан оробо. Моисей хадаа Аһароон Хуур хоёртой хамта гүбээгэй оройдо гараба. 11 Моисейн гараа үргэхэдэнь, Израиль илажа захалха юм, гараа доошоо буулгахадань, амалээг дайсан булижа байба. 12 Эсэһэн Моисейн гараа үргэхэнь хүндэ болобо. Хажуудань шулуу асаржа табибад. Моисей шулуун дээрэ һууба, Аһароон ба Хуур хоёр талаһаа гарынь дүнгэлсэбэ. Наранай оротор Моисейн гарнууд үргэгдэнхэй байба 13 – Нүүнэй хүбүүн Иисүүс амалээг угсаатанай сэрэгые булиһаар булижа, бултыень һэлмээр хюдаа агша. 14 Эзэн Моисейдэ иигэжэ зарлигтаба:

– Хуйламал бэшэгтэ дурасхаал болгон бэшээд, Иисүүстэ соносхоорой: Амалээгые газарай нюрууһаа Би огтолон һалгахаб – нэрэньшье үлэхэгүй!

15 Моисей үргэлэй шэрээ бодхоожо, «Эзэн – минии туг» гэжэ нэрлэбэ.

16 – Энэ хадаа «Эзэнэй туг гартамнай! Эзэн амалээгтэй үеһөө үедэ дайлалдаха!» гэһэн удхатай, – гэжэ тэрэ хэлээ һэн.