‏ Exodus 18

Моисей руу Итроогой ерэлгэ ба шүүгшэдые томилолго

1Моисейн хадам эсэгэнь болоһон мидиан угсаатанай санаартан Итроо Моисейн болон Израилиин аша туһада Эзэнэй үйлэдэһэн хэрэгүүдые, Египедһээ Израилиин арад түмэниие Эзэнэй гаргаһые дуулаба. 2– 3– 4– 5– 6Моисей Циппоораа һамгаяа, хоёр хүбүүдээ урда тээнь эсэгэдэнь эльгээһэн байгаа. Нэгэ хүбүүниинь Гэршоом гэжэ нэрэтэй. Нүгөөдыень Элиээзэр гэжэ нэрлээ агша һэн. Циппоораа болон Моисейн хоёр хүбүүдые Итроо дахуулжа, Моисейн тогтоһон газарта – сүл губи руу, Бурханай хада руу ерэбэ.

– Итроо хадам эсэгэш шинии һамгантай ба хүбүүдтэй ерээд байна, – гэжэ Моисейдэ дамжуулба. 7Моисей гаража, хадам эсэгэдээ доро дохижо, таалажа, удаань тэдэ мэндэшэлдэһэнэй һүүлээр майхан руу оробо. 8Израилиин зоной түлөө фараондо ба тэрэнэй арад албатанда Эзэнэй юу хэһэн тухай, губида гаталһан хүшэр зам, Эзэнэй тэдэниие абарһан тухай Моисей хадам эсэгэдээ хөөрэбэ. 9Египедшүүдһээ абаржа, Израилиин зоной аша туһада эды олон һайе Эзэнэй үйлэдэһэн тухай Итроо ехэ урматайгаар шагнаад:

10– Эзэн алдаршаха болтогой! – гэжэ хэлэбэ. – Таанадые египедшүүдһээ, фараонһоо аршалаа, египедшүүдһээ зайлуулаа! 11Энээнһээ хойшо Эзэн лэ хамаг бурхадһаа үлүү гэжэ мэдэхэ болобо гээшэб.

12Моисейн хадам эсэгэ Итроо түгэс шатаалта үргэл, хоолдо хүртэлсэдэг үргэл Эзэндэ үргэбэ. Үргэлдэ Аһароон болон Израилиин ахамад түрүүшүүл байлсаба, Бурханай урда хоол барилсаба.

13Үглөөдэр үглөөнь Моисей зоной зарга шиидхэхэ гэһэн уялгаяа дүүргэбэ. Үглөөнһөө үдэшэ болотор улад зон тэрэниие тойронхой байба.

14– Энэ юу хэнэш даа, зон шинии хажууһаа һаланагүй? Гансаараа урдань һуунаш, тэдэш бүхэли үдэртөө хүл дээрээ зогсоно, – гэжэ хадам эсэгэнь асууба.

15– Эзэнһээ юумэ асууха гэжэ тэдэ намда ерэнэл даа, – гэбэ Моисей. – 16Ямар нэгэ хэрэг шиидхэхэ гэбэл намда ерэнэ. Би тэдэнэй зарга шиидхэдэг, Бурханай хуули һургаалда һургадагби.

17– Ши дэмы бэеэ зобоонош даа, – гэжэ Итроо хэлэбэ. – 18Ши өөрөө зобонош, зоншье зобоно. Шамда хүндэ, гансаараа диилэхэгүйш. 19Минии заабари шагнал даа, Бурхан үршөөг шамайе! Бурханай урда ши арад зоноо түлөөлхэ ёһотойш. Хэрэг заргыень Тэрээндэ дамжуулха, 20хуули һургаалыень зондо тайлбарилха, яаха хээхыень, ямар замаар ябахыень заабарилха шинии үүргэ. 21Угсаатан соогоо хүндэтэй зониие – Бурханһаа түбэгшөөдэг, үнэн сэхэ, эдилгэ абадаггүй хүнүүдые – шэлэжэ, мянганай, зуунай, табинай, арбанай дарганар болгожо таби. 22Тэдэ зоной зарга хэрэгүүдые шиидхэжэ, хододоо улад зонтой байха. Шухала хэрэгүүдые шамда дамжуулдаг байна ааб даа. Харин шухала бэшэ, жэжэ хэрэгүүдые өөһэдөө шиидхэнэ бэзэ. Тиигэжэ шинии ашаан нэгэ бага хүнгэн болохо, тэрэниие шамтай хамта тэдэ хубаалсаха. 23Тиигэбэлшни, Бурхан шамда зарлиг заабари буулгадаг байха. Иигэжэ ши тэсэжэ гараха тэнхээтэй болохош. Зоншни сэдьхэлээ тэниихэ, дундаа эбтэй болохо.

24Моисей хадам эсэгынгээ үгэ анхаралтайгаар шагнажа, хэлэһээрнь болобо. 25Израилиин зон сооһоо хүндэтэй зониие шэлэжэ, толгойлогшод болгон табиба. Тэдэниие мянганай, зуунай, табинай, арбанай толгойдо табиба. 26Тэдэ хододоо зонтой хамта байжа, зоной зарга шиидхэдэг болобо. Жэжэ хэрэгүүдые өөһэдөө хаража үзэдэг, шухалыень Моисейдэ дамжуулдаг гуримтай болобо.

27Моисей хадам эсэгэтэеэ хахасажа, тэрэнь гэртээ, өөрын газар нютаг руу зорибо.