‏ Exodus 19

Синай хадын хормойдо

1Египедһээ гараһанһаань хойшо гурбадахи һара эхилбэ. Тэдэ Синайн губида ерэжэ тогтобо. 2Рэпидиимһээ гаража, Израилиин арад зон Синайн губида ерээд, хадын хормойдо хотон хүреэнээр тогтобо. 3Моисей Бурханда айладхал хэхэеэ хада өөдэ гараба. Эзэн хадаһаа тэрээндэ хандаба:

– Яковай уг удамда, Израилиин зондо иигэжэ соносхо: 4«Египедшүүдтэ хэһэн үйлыем хараба гээшэт. Бүргэдэй дали дээрэ һуулгаһандал шуумар ябуулжа, таанадые Өөртөө асарба гээшэб. 5Үгыем дууладаг ба Намтай баталһан хэлсээе үнэн шударгыгаар сахибал, та бүгэдэ Минии эрдэниин сэнтэ баялиг, арадуудай дундаһаа Минии шэлэмэл гансал арад болохо зэргэтэйт. Газар дэлхэй гээшэ Минии юм, 6харин таанад Минии санаартадай хаан түрэ, нангин арад болохо жэшээтэйт!» Эдэ үгэнүүдые Израилиин зондо дамжуулал даа.

7Моисей бусажа, аха захашуулые суглуулба, Эзэнэй тэрээндэ захирһанай ёһоор, эдэ үгэнүүдые дамжуулба. 8Арад зониинь нэгэ хүн шэнги харюусаа бэлэй: – Эзэнэй үгөөр лэ ябахабди!
Зоной харюу Моисей Эзэндэ дамжуулба.

9– Шамтай хөөрэлдэхыем зон шэхээрээ шагнажа, шамда этигэхын туладань үдхэн үүлэн соо бэеэ бэелжэ шамда ерэхэб, – гэжэ Эзэн Моисейдэ айладаба. Моисейн арад зоной харюуе Эзэндэ дамжуулхадань,

10Эзэн Моисейдэ айладаба:

– Арад угсаатандаа иигээд буса. Энэ үдэртөө, үглөөдэр бэеэ арюудхажа, хубсаһа хунараа угаагты гэжэ зонхило. 11Нүгөөдэрэй үйлэдэ бэеэ зэһэг: зоной хараһаар байтар Эзэн Синай хадын оройдо морилхонь гээшэ. 12Хадые тойруулан зурлаа хээд, тэрэ зурлааһаа сааша гэшхэхэгүй, хада өөдэ гарахагүй, хадын хормойдо хүлөө табихагүй гэһэн хорюул табяарай. Хадын ойро хүлөө табиһан хүн амяа хороолгохо. 13Амииень хорооходоо, тэрэнэй бэедэнь дүтэлжэ болохогүй – бүреэгэй абяанай дуугаржа байхада шулуугаар шэдэжэ, али номо һуршаар харбажа алаха хэрэгтэй. Хада өөдэ гараха гэжэ һэдэһэн хадань, мал амитан, хүн болоно гү, хэншье һаань, тэрэниие амиды орхижо болохогүй.

14Моисей хадаһаа буужа, бэеэ арюудхаха гэһэн зарлиг дамжуулба. Хүнүүд хубсаһа хунараа угаажа, бэеэ арюудхан һэргээбэ.

15Моисей зондо хэлэбэ:

– Нүгөөдэртэ бэлдэгты. Эхэнэртэй хурисахые зайлагты.

16Гурбадахи үдэрынь эртэ үглөөнһөө тэнгэри дуугарба, сахилгаан сахилба, хадын орой үдхэн үүлэндэ хушагдаба. Бүреэгэй шанга абяанай соностоходо, зоной зосоо заригад гэбэ. 17Хүреэһээ гаража, зоноо дахуулан, Моисей Бурханай урдаһаа ошобо. Хадын хормойдо тэдэ жагсаба. 18Эзэнэй гал мэтээр буухада, Синай хада пеэшэн шэнги утаа гараад, доһолжо эхилбэ. 19Бүреэгэй абяан улам шанга боложол байгаа. Моисейн дуугархада, Бурхан үүлэн сооһоо тэнгэриин дуугаар харюусаха юм.

20Эзэн Синай хадын оройдо буужа, Моисейе дуудаба. Моисей дээшээ гараба.

21Эзэн Моисейдэ айладаба:

– Эзэндэ дүтэлжэ, Тэрэниие харахамнай гэжэ бү оролдуужаг. Доошоо буугаад, зониие һэргылэн хэлэхэ болобош: үгыем дуулаагүй һаа, амияа хороолгохо. 22Санаартад Эзэндэ дүтэлхэ гээ һаа, бэеын арюуниие нарин сахиха ёһотой. Үгы гэбэл, Эзэн тэдэниие баһал һүнөөхэ.

23– Синай хадын оройдо арад зон гарахагүй, – гэжэ Моисей Эзэндэ хэлэбэ. – Та маанадые һэргылээ ха юмта. Хадын хормойгоор хилэ табяад, нангин хада гэжэ үргэмжэлэн нэрлээб.

24– Яба доошоо, һөөргөө Аһароонтой бусахаш. Харин санаартад ба хара зон Эзэндэ ерэхэмнай гэжэ бү һэдэг. Һэдээ һаань, Эзэн тэдэниие һүнөөхэ, – гэжэ Эзэн Моисейдэ айладаба.

25Моисей доошоо зон тээшэ буужа, энэ айладхалыень дуулгаба.