‏ Exodus 20

(Хуу 5:5-33)

1Бурхан һургаалай иимэ үгэнүүдые айладаба:

2– Би шамайе Египедэй дарлалтаһаа гаргаһан Эзэн Бурханшни гээшэб.

3Намһаа ондоо бурхан шамда байха ёһогүй.

4Өөртөө шүтөөниие бү зохёо, дээдэ тэнгэридэ байһан ба газар дээрэ, мүн газарһаа доогуур уһан соо байһан алибаа юумэнэй дүрсэ бү дархала. 5Тэдээндэ бү һүгэдэ, бү мүргэ. Юуб гэхэдэ, Би, Эзэн Бурханшни, жүтөөрхэн сахидаг Бурхан гээшэб. Намайе хэрэгсээнгүй ябаһан эсэгэнэрэй түлөө үри хүүгэдыень, аша гушанарыень гурбадахи, дүрбэдэхи үе хүрэтэрынь хэһээдэгби. 6Намда дуратай, захяа заабариием сахижа ябагша зондо мянганшье үе хүрэтэрынь үршөөл хайра үзүүлдэгби.

7Эзэн Бурханайнгаа нэрые дэмы бү дурда. Тэрэнэй нэрэ дэмы нэрлэдэг хэнииешье Эзэн хэһээлтэгүй орхихогүй.

8Субботые нангин үдэр гээд сахидаг бай. 9Зургаан үдэрэй туршада ажаллажа, алибаа хэрэгээ бүтээжэ бай, 10харин долоодохи үдэр – суббото, тэрэ Намда зорюулһан үдэр. Энэ үдэр ямаршье ажал бү хэ, өөрөөшье, хүбүүн, басаганши, богоол шэбэгшэдшни, мал адагуусаншни, хотодош байрлаһан ерүүл хүншье, бултадаа ямаршье ажал хэхэ ёһогүй. 11Юуб гэхэдэ, Эзэн огторгой, газар, далай бүтээгээд, досоонь байгааша бүхы юумэ зургаан үдэрэй туршада байгуулаа, харин долоодохи үдэртэ амараа. Тиимэһээ Эзэн гарагай долоое үреэлдөө хүртөөгөөд, нангин үдэр болгоо.

12Эзэн Бурханайнгаа үршөөһэн газарта ута наһатай һуухын тулада эхэ, эсэгэеэ хүндэлжэ ябаарай. 13Хүниие бү ала.
14Ханидаа бү урба.
15Хулгай бү хэ.
16Хүниие хардажа худалаар бү гэршэлэ.

17Хүнэй гэр байра буляаха гэһэн хүсэлдэ бү абта, хүнэй һамганда, хүнэй богоол шэбэгшэндэ, сар элжэгэндэ, хүндэ байһан ямаршье юумэндэ бү һанаашарха.

18Бүхы зон тэнгэриин дуу, сахилгаа, бүреэгэй һүрөөтэ абяа, утаа бааяһан хада хаража байба. Айн шэшэржэ, холохон болоод хаража байба.

19– Мантай ши хөөрэлдэ, – гэбэ тэдэ Моисейдэ. – Бидэ шамайе шагнажа байхабди. Бурхан сэхэ бү хандаг, ами наһамнай бидэндэ хайратай.

20– Бү айгты, – гэжэ Моисей харюусаба. – Таанадай Бурханһаа айжа, нүгэл хэхэеэ болихын тулада, таанадые туршаха гэжэ Бурхан ерээл.

21Зон холохон зогсобо, үүлэн манан соо бэеэ бэелһэн Бурханда гансал Моисей дүтэлбэ.

Хэлсээнэй бэшэг

22Эзэн Моисейдэ айладаба:

– Израилиин зондо хэлэ: «Хараба гүт, Би тэнгэриһээ таанадта хандабаб. 23Алта мүнгөөр бурханай хүрэг дархалжа, Минии хажууда табижа бү байгты.

24Шорой обоолжо, Намда зорюулһан үргэлэй шэрээ бодхоохош, тэндээ өөрын мал һүрэг сооһоо жэжэ томо малые түгэс шатаалта үргэл ба амгалан байдалай түлөө үргэл үргэдэг байхаш. Нэрэеэ соносхоһон алишье газартаа Би шамда ерэжэ, үреэлдэ хүртөөдэг байхаб.

25Шулуугаар үргэлэй шэрээ хэбэл, шулуугаа өөлэжэ хэмхэлжэ болохогүй. Өөлэхэдөө шулуу бузарлана гээшэш.

26Үргэлэй шэрээгэй үндэртэ табсан дээгүүр гаража бү байгаарай, эшэгүүри бузаршни үзэгдэжэ магад».