Exo 21 | BxrBBL2024 | STEP | Тэдээндэ үгэхэ ёһотой хуулинуудшни гэхэдэ, иимэ.

‏ Exodus 21

Еврей яһанай барлагууд тухай хуули

1 Тэдээндэ үгэхэ ёһотой хуулинуудшни гэхэдэ, иимэ.

2 Еврей яһанай богоолые худалдажа абаад, зургаан жэл соо тэрэшни шамда зарагдабал, долоодохи жэлдэнь тэрэниие түлөөһэгүйгөөр сүлөөдэ табяарайш. 3 Гансаараа ерээ һаа, гансаараа ябаг, һамгатай ерэһэн байбал, һамганиинь тэрээнтэй ошолсог. 4 Хэрбээ эзэниинь тэрээндэ эхэнэрые үгэһэн, тэрэнь хүүгэдые түрэһэн байбал, эхэнэр хүүгэдтэеэ эзэнэй гэжэ тоологдохо, богоолынь гансаараа ябаг. 5 Хэрбээ «Би эзэндээ, эхэнэртээ ба хүүгэдтээ дуратайб, сүлөөдэ гараха дурагүйб» гэжэ богоолой хэлээ һаа, 6 эзэниинь тэрэниие Бурханда дүтэлүүлэн – үүдэндэ гү, али үүдэнэй тотогодо асаран – шүбгөөр шэхыень соо нүхэлхэ болоно. Тэрэ гэһээр хэтэдэ богоолынь болохо.

7 Хэрбээ ондоо хүндэ басагаяа богоол болгожо худалдаа һаань, басаганиинь эзэнһээ эрэ хүн шэнгеэр табигдахагүй. 8 Һамган болгохо гэжэ эзэн абаһан аад, бодолоо хубилгабал, түлөөһөөр хүнэй абахые зүбшөөхэ уялгатай. Голоод хари хүндэ худалдаха ёһогүй. 9 Хүбүүнэйнгээ һамган болгохо гэжэ абабал, басагандаа шэнги хандаха ёһотой. 10 Эзэниинь өөртөө ондоо һамга абабал, богоол эхэнэртээ мяханай хуби, хубсаһа хунар болон гэр соо унтари һуурииень үлээг. 11 Эдэ гурбые үлээгөөгүй ушарта эхэнэр гэрһээ түлөөһэгүй гаража ошохо эрхэтэй.

Бэеын гэмтэлгэ тухай хуули ёһо

12 Хүниие үхэтэр сохиһон хүнэй ами хороохо ёһотой. 13 Сохиһон хүн алаха хүсэлгүй байгаа гэжэ элирээ һаа (Бурханай эрхэ хүсэлөөр тиимэ юумэн ушараа гээшэ ааб даа), хоргодохо эрхэ тэрээндэ үгтэжэ болодог, хаана хоргодохыень Би шиидхэхэб. 14 Хэрбээ ондоо хүниие зорюута алаад, Минии үргэлэй шэрээгэй дэргэдэшье хүлисэхые гуйгаа һаань, тэрэнэй ами хороохо ёһотойш.

15 Эхэ, эсэгэеэ сохиһон алибаа хүнэй ами таһалха ёһотой.

16 Хүниие хулгайлжа, худалдаһан хүнэй (үгы гэбэл, хулуулгаһан хүн тэрээндэ олдобол) ами таһалха ёһотой.

17 Аба эжы хоёроо муушалһан хүн үхэлдэ хүртэхэ ёһотой.

18 Хэрэлдээнэй үедэ нэгэниинь нүгөөдэеэ шулуугаар гү, али нюдаргаараа сохиходонь, гэмтэжэ хэбтэриин болоошье һаа, 19 амиды үлэбэ гэлэйг, хожомынь бодожо, таяг тулаад гарадаг болоо һаань, сохигшо хүн хэһээлтэдэ орохогүй, гансал үбдэһэн сагай түлөө ба аргалалгыень түлэхэ болоно.

20 Эзэниинь богоолоо, эрэ, эмэ хамаагүй, модоор сохиходонь, тэрэ дороо үхэбэ гэлэйг, тэрэнэй түлөө харюусалга амасуулха болоно. 21 Харин сохюулһан богоолой гү, али богоол эхэнэрэй нэгэн хоёр үдэр амиды байһан ушарта нэхэхэ ёһогүй. Богоол гээшэ эзэнэйнь зөөри мүн.

22 Эрэшүүл наншалдаанай үедэ жэрмэһэн эхэнэрые дайраба, тэрээнһээ уламжалан эхэнэр дутуу түрэбэ гэлэй. Эхэнэр амиды байбал, гэмтэй хүн гэршын хажууда мүнгэ түлэхэ ушартай. Хэдые түлэхыень тэрэ эхэнэрэй үбгэн хэлэхэ. 23 Эхэнэрэй наһа барабал, ами наһанай түлөө ами наһа үгэхэ шинии уялга.

24 Нюдэнэй түлөө нюдөөр, шүдэнэй түлөө шүдөөр. Гарай түлөө гараар. Хүлэй түлөө хүлөөр.

25 Шатааһанай түлөө – шатааха. Шархын түлөө – шарха. Гэмтэлгын түлөө – гэмтэлгэ.

26 Эзэниинь эрэ гү, али эхэнэр богоолоо сохёод, нюдыень гэмтээбэл, сүлөөдэ табиха ушартай. 27 Эзэниинь богоолой шүдэ түү сохёо һаа, мүн лэ сүлөөдэ табиха болоно.

28 Эрэ гү, али эмэгтэй хүниие буха мүргэжэ алаба гэлэй, бухые шулуугаар сохижо алаха ёһотой. Мяхыень эдижэ болохогүй. Бухын эзэн харюусалгада татагдахагүй. 29 Харин буха урданшье мүргэдэг байһан, тэрэнииень эзэн мэдэдэг аад, бухань хүниие мүргэжэ алаба гэлэй. Тэрэ ушарта бухыень шулуудажа алаха, эзэнэйнь ами баһа хороохо ёһотой. 30 Аминай түлөө түлөөһэ түлэхэ гээ һаань, амиды үлэхын тула эриһыень түлүүлхэ ушартай. 31 Гэрэй эзэнэй хүбүү гү, али басагые буха мүргөө һаань, баһал тиигэжэ болохо.

32 Хэрбээ эрэ гү, али эмэгтэй богоолые бухын үхэтэр мүргөө һаа, бухын эзэн богоолой эзэндэ гушан шээкэл сагаан мүнгэ үгэхэ, харин бухыень шулуудажа алаха.

33 Уһанай нүхэ нээлтэтэй ^{▼▼ Уһанай нүхэ нээлтэтэй… Ган гасуур сагта (май – сентябрь) урид бороотой үедэ (ноябрь-февраль) нөөсэлһэн уһа ашагладаг байгаа. Шулуутай газарта нүхэ малтажа, ханыень избёосхоор будадаг һэн.} орхиходо, буха гү, али элжэгэн унашаба гэлэй. 34 Нүхэнэй эзэн амитанай сэн түлэхэ ёһотой, бэе мяхыень өөртөө абажа болохо.

35 Буха ондоо бухые мүргэжэ алаба гэлэй, амиды бухые хоёр эзэд худалдаад, мүнгыень хубааха ушартай. 36 Мүргэдэг буха гэжэ урдань мэдэгдэһэншье һаа, бухаяа харууһалаагүй эзэн бухаяа үгэжэ, хохидолыень даадаг.