Exo 23 | BxrBBL2024 | STEP | «Гүжэр үгэ дабтажа бү байгаарай. Хэрэг шүүлгэдэ гүжэрдэгшые бү дэмжэ, юуб гэхэдэ, шинии гэршэлэлгээр буруу шиидхэбэри абтажа болохо.

‏ Exodus 23

Үнэн шударга бай

1 «Гүжэр үгэ дабтажа бү байгаарай. Хэрэг шүүлгэдэ гүжэрдэгшые бү дэмжэ, юуб гэхэдэ, шинии гэршэлэлгээр буруу шиидхэбэри абтажа болохо. 2 Буруу хэрэгтэ олониие даган дууряажа бү яба. Олоной дуратайшье һаань, зарга шүүбэриин газарта үнэн зүбые гажаажа бү бай.

3 Үгытэй баяниие харгалзангүй зарга шүүбэри үйлэдэ.

4 Төөриһэн сар, элжэгэн дайсанайшье байг, эзэндэнь абаашаха ёһотойш.

5 Ашаатай элжэгэнэй газарта хэбтэшэхые харабал, орхижо болохогүй, эзэниинь шинии дайсаншье байг, эзэндэнь туһалха хэрэгтэй.

6 Уг аймагайнгаа үгытэй хүнэй зарга шиидхэхэдээ, үнэн шударга байха хэрэгтэй.

7 Гэмгүй хүниие гэмтэн болгожо, нүгөө талаһаа зүб гэмнэгшэ хүниие буруутан болгожо, үхэлдэ хүргэхэгүйн тулада худалаар гэмнэлгэ бү дэмжэ. Хоро һанагшада гэмыень Би амасуулхаб!

8 Эдилгэ бү аба. Эдилгэ хадаа нюдэтэй хүниие һохор болгодог ба үнэн гэршэлэлгые хүсэгүй болгодог.

9 Ерүүл зониие бү харшала. Ерүүл зоной байдал өөһэдөө мэдэнэ ха юмта – Египедтэ байһанаа бү мартагты.

Субботын үдэр ба субботын жэл

10 Зургаан жэлэй туршада таряагаа тарижа, ургасаа хуряажа бай. 11 Долоодохи жэлдэнь эдлүүри хэнгүй орхёорой. Угсаатанайш үгытэйшүүл ургасын үрэ олобол, эдиг, үлэһыень ан гүрөөлшье эдиг, хамаагүй. Уһан үзэмэй ба оливын модоной тарилга баһал тиихэ юм.

12 Зургаан үдэр ажалаа хээд лэ, долоодохи үдэртэнь амардаг бай. Сар, элжэгэншни бэеэ тэниилгэг, богоолшни болон ерүүл зарасашни амяа абажа, һэгээ орог.

13 Айладаһан бүгэдыем сахиха ёһотойт. Ондоо бурхадай нэрэ бү дурдагты, хэлэ амандатнайш тэдэ бү орог.

Гурбан гол һайндэрнүүд

14 Жэлдээ гурба дахин Минии һайндэрнүүдые сахидаг бай.

15 Эһээлтэгүй талханай һайндэр тэмдэглэдэг бай. Египедһээ гаралгын авиив һарада гэжэ тогтоогдоһон сагта долоон хоногой туршада эһээлтэгүй талха эдидэг байхаш гэһэн зарлиг Би буулгаа бэлэйб.

Хэншье Минии урда хооһон гартай харагдаха ёһогүй.

16 Таряа хадалгын һайндэр гэжэ шинии тариһан таряалангай газарһаа түрүүшын ургаса абан сасуу тэмдэглэдэг бай.

Жэлэй эсэстэ таряаланһаа ургасаяа хуряаһан хойноо Ургаса суглуулгын һайндэр тэмдэглэдэг бай.

17 Жэлдээ гурба дахин бүхы эрэшүүл Дээдэ Эзэнэй урда нюураа үзүүлхэ ушартай.

18 Намда үргэл хэхэдээ, үргэлэй амитанай шуһа эһээлтэтэй талхан дээрэ дуһаажа бү байгаарай.

Һайндэрэй үргэлэй өөхэ тоһо үглөөгүүр болотор орхижо болохогүй.

19 Газарһаа абтаһан түрүүшынгээ ургасын дээжыень Эзэн Бурханайнгаа гэртэ асардаг бай.

Эшэгэнэй мяха эхынь һүн соо бү шана.

Эзэн Өөрын арадые хамгаалхаб гэжэ найдуулна

20 Харагтыл даа, Би танай урда Эльгээмэлээ эльгээхэм. Тэрэ таанадые замдатнай һахижа, Минии бэлдэһэн газарта абаашаха. 21 Тэрээнһээ айжа ябагты, үгыень дуулагты, тэрээндэ харша юумэ бү хэгты. Тэрэ танай эсэргүүе тэбшэхэгүй, юуб гэхэдэ, тэрээн соо Минии нэрэ алдар оршоно.

22 Тэрэнэй үгыень дуулажа, Минии айладаһан бүгэдые дүүргэбэлтнай, Би танай дайсанда дайсан, танда муу һанагшада муу һанагша болохоб.

23 Минии Эльгээмэл урдатнай ябалсажа, эмоор, хээт, пэриззии, ханаһаан, хиив, евүүс угсаатанда асарха. Би эдэ арадые усадхахаб. 24 Харин таанад тэдэнэй бурхадта һүгэдэжэ бү байгты, заншалыень бү абагты. Бурхадыень үгы хэгты, шүтөөн болохо шулуунуудыень бута сохигты! 25 Эзэн Бурхандаа шүтэгты. Тиихэдэтнай, би эдихэ хоол, ууха уһыетнай үреэжэ, таанадые үбшэн тахалһаа зайлуулхаб. 26 Танай орон нютагта эхэнэр дутуу түрэхэ, үри хүүгэдгүй байха ушар огтолон үгы болохо, үгтэһэн наһаяа дүүрэн наһалха арга Би танда олгохоб.

27 Танай замда байһан бүхы арадуудта аймшагтай юумэнүүдые үзүүлэн һүрдөөхэб, дайсадыетнай таанадһаа зугадуулхаб. 28 Һононуудые урдууртнай эльгэхэдэм, тэдэ хиив, ханаһаан ба хээт угсаатаниие таанадһаа һүрдэн тэрьедүүлхэ. 29 Тэдэниие гэнтэ бэшэ, олон жэлэй туршада үлдэн үгы болгохоб. Үгы һаам, газар эзэгүй болохо ба зэрлиг арьяатан таанадай дунда ушаргүй олон болохо.

30 Таанадай олон боложо үдөөд, тэрэ орон нютагые эзэмшэн абатартнай Би тэдэ арадуудые байн байн үлдэжэ байхаб. 31 Хулһата далай болон Пилиштын далай ^{▼▼ Пилиштын далай – Дундада далай, Сүл губи – Нээгэб сүл губи, Мүрэн – Евфрат мүрэн.}, Сүл губи болон Мүрэн гээд танай эзэлхэ газарай хилэ болгон табихаб. Тэрэ орон нютагта һууһан бүхы зониие танай гарта үгэхэдэм, үлдэжэ гаргахат.

32 Тэдээнтэй, тэдэнэй бурхадтай хэлсээ бү баталагты. 33 Эдэ арадууд танай газар дээрэ һууха ёһогүй – үгы гэбэл, тэдэ таанадые Минии урдаһаа нүгэл хүүлэжэ һалаха. Тэдэнэй бурхадта мүргэхэ гээшэ танай занга болохо жэшээтэй».