‏ Exodus 24

Израильшууд Бурхантай хэлсээ батална

1Эзэн Моисейдэ айладаба:

– Аһароон, Надааб, Абиһуу болон Израилиин далан аха захатаниие абаад, хада өөдэ гаража, Намда, Эзэндэ, холоһоо мүргэгты. 2Зүгөөр гансал Моисей Намда дүтэлхэ ёһотой! Ондоо хэншье Нам руу бү дүтэлэг, арад зон хада өөдэ гараха ёһогүй.

3Моисей зондоо ерэжэ, Эзэнэй үгэнүүдые болон тогтоолнуудые бүгэдыень хэлэжэ үгэбэ. Арад угсаатаниинь нэгэ хүн шэнги харюусаа:

– Эзэнэй үгэ соонь лэ ябахабди.

4Моисей Эзэнэй бүхы үгэнүүдые бэшэжэ абаба. Үглөөдэрынь хадын хормойдо үргэлэй шэрээ түхеэржэ, Израилиин уг аймагуудай тоогоор арбан хоёр нангин шулуу зэргэлүүлэн табиба. 5Израиль угсаатан соохи залуу хүбүүдтэ хандажа, түгэс шатаалта үргэл ба амгалан байдалай түлөө үргэл хэхыень зонхилбо. Тэдэнь Эзэндэ бухануудые үргэбэ. 6Хахад шуһыень Моисей аяганууд соо суглуулжа, үлэһэн хахад шуһыень үргэлэй шэрээдэ сүршэбэ. 7Хэлсээнэй бэшэг уншажа үгэхэдэнь:

– Эзэнэй айладаһан соо жэншэдгүй ябахабди! – гэжэ зон дабтан байба.

8Моисей үргэлэй шуһа зон дээгүүр сүршөөд, хэлэбэ:

– Эзэнэй тантай баталһан хэлсээнэй шуһан энэ мүн. Тэрэнэй үгэнүүд хадаа хэлсээнэй эрхэ нүхэсэл гэжэ ойлгогты.

9Удаань Моисей, Аһароон, Надааб, Абиһуу болон Израилиин далан аха захатан хада дээрэ гаража, 10Израилиин Бурханиие бараалхаба. Тэрэнэй хүл доро тэнгэридэл арюун тунгалаг эрдэни шулуугаар хэһэн тайзан үзэгдэһэн шэнги байгаа һэн. 11Бурхан Израилиин удамаршадта багаханшье хоро хүргэбэгүй. Тэдэ Бурханиие үнэхөөр бараалхажа, эдеэ унда зооглогшо һэн.

12Эзэн Моисейдэ айладаба:

– Хада өөдэ Намда гарыш. Энэ арадта ухаа заахын тулада Минии бэшэһэн һургаал, зарлигуудтай шулуун хабтаһануудые шамда үгэхэб.

13Моисей Иисүүс туһалагшатайгаа Бурханай үндэртэ зорибо.

14– Ерэтэрнай эндэ байгаарайгты, – гэжэ Моисей аха заха хүнүүдтэ хэлэбэ. – Таанадтай Аһароон ба Хуур үлэхэ. Хэрэг гараа һаань, тэдээндэ хандахада болоно.

15Моисей өөрөө хада өөдэ гараба.

Хада үүлэндэ хушагданхай байгаа. 16Эзэнэй һүр соло Синай уулада буугаа. Зургаан үдэртэ хадые үүлэн хушанхай байгаад, долоодохи үдэртэнь Эзэн үүлэн сооһоо Моисейе дуудаба. 17Уулын оройдо соробхилһон гал мэтэ Эзэнэй һүр соло Израилиин зондо үзэгдөө бэлэй.

18Моисей үүлэн соо орожо, хада өөдэ гараба. Тэндээ дүшэн үдэр болон дүшэн һүни байгаа бэлэй.
Copyright information for BxrBBL2024