‏ Exodus 26

Майхан һүмэ

1Майхан һүмэдэ гэжэ нимгэн маалинга бүдөөр сэнхир хүхэ, гүн улаан ба шад улаан үнгэтэй утаһаар үргэн энтэй арбан хэһэг бүд нэхэхэш; тэрээн бүхэндэнь херүүбүүдые нэхэхэ болоно. 2Далбагар бүдэй хэһэг бүхэнэй утань хори найман тохой, үргэниинь дүрбэн тохой, арбан хэһэг бүдшни аб адли хэмжээнэй байха ёһотой. 3Удаань таба табаар тэдэнээ холбожо оёхош. 4Захын бүдүүдэй эрмэгтэ сэнхир хүхэ түдүүлинүүдые хадахаш, тиимэ түдүүлинүүдые нүгөө хэһэгэй захаар баһа хадахаш. 5Нэгэ хажууһаань табин түдүүли, нүгөө тээнь баһал табин түдүүли. 6Удаань табин алтан тобшонуудаар тобшолжо, хоёр хэһэгээ ниилүүлхэдэш, майхан һүмын зосоо нэмэргэ болохо.

7Газаа нэмэргэ гэжэ ямаанай нооһоор үргэн энтэй арба нэгэн далбагар бүд нэхэхэш. 8Далбагар бүд бүхэнэй утань гушан тохой, үргэниинь дүрбэн тохой болохо, бүхы арба нэгэн бүдынь аб адли хэмжээнэй байха ёһотой. 9Табыень нэгэ талын болгожо, хамтадхан оёхош, зургааень нүгөө талын болгохош, нэгэ талын зургаадахи үлүүе дундуурнь эбхэхэш – тэрэш үүдэн дээгүүр һанжан байха. 10Нэгэ захаарнь табин түдүүли, нүгөө тээнь баһал табин түдүүли хадахаш. 11Зэдээр табин тобшо хэжэ, тэдэ тобшонуудые тобшолжо, нэгэ нэмэргэ болгон, хоёр хубияа ниилүүлэ. 12Нэмэргын утаһаа үлүү гараһан хахад энгынь майхан һүмын ара талын хана хушаха ёһотой. 13Хажуу тээгүүрхи нэгэ нэгэ үлүү тохой хажуу хана хушаха ёһотой. 14Утан элдэһэн хониной арһаар дээрэһээнь хушалта хэжэ, үшөө тэрээнээ нарин элдэлгэтэй булгайраар хушаарай.

15Майхан һүмэдөө акаци модоор ханын хүреэнүүдые хэхэш. 16Хүреэ бүхэн утаараа арбан тохой ба үргэнөөрөө тохой хахад байха. 17Хоёр модо хүндэлэбшөөр холбожо хэһэн байха ёһотой. Тиигэжэ майхан һүмын бүхы хүреэнүүд хэгдэһэн байха ёһотой. 18Майхан һүмын урда ханада гэжэ хорин хүреэ хэхэ хэрэгтэй. 19Хүреэ һуулгахада мүнгөөр хэһэн дүшэн түшэг хээрэй. Тиихэдэнь хүреэ бүхэнэй хормойдо, хоёр хүндэлэбшэдэнь тулгаһан хоёр хоёр түшэг байха. 20Һүмын ара талын хойто ханадань мүн лэ хорин хүреэ, 21ба хүреэ бүхэндэнь хоёр түшэг, хамтадаа дүшэн түшэг байха. 22Майхан һүмын ара талын баруун ханада зургаан хүреэ, 23ара талын углуунуудтань үшөө хоёр хүреэ, 24тэдэнээ доогуурнь асатуулхаш, харин дээгүүрнь, нэгэдэхи сахариг углаха газартань, бүхэлеэр хэхэ хэрэгтэй. Тиимэ хоёр хүреэ хээрэй, углуу бүхэндэнь – нэгэ нэгэ. 25Эдэ найман хүреэнүүдэй һуурида арбан зургаан мүнгэн түшэг хэжэ һуулгаха хэрэгтэй.

26Акаци модоор хүндэлэбшэнүүдые хэхэш: майхан һүмын нэгэ ханын хүреэнүүдые холбохо табан хүдэлэбшэ, 27нүгөө ханын хүреэнүүдые холбохо табан хүндэлэбшэ, ара талын баруун хана бүхэлхэ үшөө табан хүндэлэбшэ. 28Дундахи хүндэлэбшэнь ханын хоёр захаһаа хүреэнүүдые холбохо ёһотой. 29Хүреэнүүдээ алтаар бүрижэ, хүндэлэбшэтэй холбохын тулада алтан сахаригуудые хэхэш. Хүндэлэбшэнүүдээ баһал алтаар бүрихэш.

30Хада дээрэ шамда яажа заагаа һэмбиб, тэрэнэй ёһоор лэ майхан һүмэ бодхоохош.

31Сэнхир хүхэ, гүн улаан ба шад улаан үнгэтэй утаһаар, нимгэн маалинга бүдөөр хүшэгэ нэхэхэш; тэрээн дээрэ херүүбүүдэй дүрэнүүдые нэхэхэ ёһотойш. 32Тэрэ хүшэгэеэ акаци модоор хэгдэһэн, алталмал дүрбэн баханада үлгэхэш. Тэдэ баханануудые һуулгаха мүнгэн дүрбэн түшэг хэрэгтэй. 33Хүшэгэнь тобшонууд доро сэхэ тудалдаха ёһотой. Хүшэгын саана хэлсээнэй ханзаяа табихаш. Энэ хүшэгэ һүмын хамагай нангин хубиие нангин газарһаа илгаха болоно. 34Хамагай нангин газарта табяатай, хэлсээнэй ханза дээрэ арюудхалгын хушалта табихаш. 35Хүшэгын урда шэрээ, шэрээгэй урда дэн табихаш. Дэнгынь майхан һүмын урда ханын хажууда, шэрээнь хойто ханын хажууда табигдаха.

36Сэнхир хүхэ, гүн улаан ба үдхэн улаан үнгэтэй ээрэһэн утаһаар ба нарин маалинга бүдөөр майхан һүмэ руу орохо газарые халхалдаг олон үнгэтэ хүшэгэ бүтээгдэһэн байха ёһотой. 37Хүшэгэдөө гэжэ акаци модоор табан бахана хээд, алтаар хушахаш. Алтан дэгээнүүдые баханануудтаа үлгэхэш. Баханануудта табан түшэгые гуулин түмэрөөр шудхаха болонош.