Exo 3 | BxrBBL2024 | STEP | Моисей мидиан угсаатанай газарта хадам эсэгэнь болоһон Итроо санаартанай хони адуулдаг һэн. Нэгэтэ хонидоо сүл губи руу тууһаар туужа, Бурханай хада Хорээб тээшэ дүтэлэн ерэбэ.

‏ Exodus 3

Бурхан Моисейе дуудана

1 Моисей мидиан угсаатанай газарта хадам эсэгэнь болоһон Итроо ^{▼▼ Рэүһээлэй нүгөө нэрэ; хара 2:18.} санаартанай хони адуулдаг һэн. Нэгэтэ хонидоо сүл губи руу тууһаар туужа, Бурханай хада Хорээб тээшэ дүтэлэн ерэбэ. 2 Тэндэ аһажа байһан үүргэнын һөөг сооһоо Эзэнэй Эльгээмэл тэрээндэ үзэгдэбэ. Гайхал ехэ, үүргэнын һөөг бургааһан гал дүлөөр соробхилжо байһан аад, шатажа дууһаха хэбэргүй байба. 3 «Дүтэлжэ харахамни, энэ гайхамшаг ямар үзэгдэл гээшэб, яахадаа иигэжэ үүргэнын эшэ шатажа дууһадаггүй юм?» – гэжэ Моисей досоогоо үгүүлбэ.

4 Моисейн ерэжэ ябахыень хаража байһан Эзэн Бурхан һөөг сооһоо тэрээндэ хандажа дуудаба:

– Моисей! Моисей!

– Би шагнанаб, – гэжэ Моисей харюусаба.

5 – Иишээ бү дүтэлэ; гуталаа тайла, юуб гэхэдэ, зогсоһон һууриш нангин газар гээшэ, – гэжэ Бурхан айладаба.

6 – Би шинии үбгэ эсэгын Бурхан гээшэб, – гэжэ удаань Тэрэ айладаа. – Абраһаамай Бурхан, Исаагай Бурхан, Яковай Бурхан гээшэб.

Моисей Бурхан тээшэ харахаяа зүрхэлэнгүй, нюураа халхалаад байба.

7 – Би Минии арадай Египедтэ зобожо байхыень харааб, харуулшадай харшалхада туһа эрижэ байхыень дуулааб; Би тэрэнэй зобоһыень мэдээб. 8 Египедэй гарһаа аршалан мулталжа, һү тарагай, бал тоһоной дэлбэржэ байдаг үргэн һайхан нютагта, ханаһаан, хээт, эмоор, пэриззии, хиив, евүүс угсаатанай ^{▼▼ Ханаһаан, хээт, эмоор, пэриззии, хиив, евүүс угсаатан – израильшуудай ерэхэһээ урид Палестинада ажаһууһан арадууд.} газарта абаашаха гэжэ Би газар түбидэ буужа ерээб, – гэжэ Эзэн айладаба. – 9 Израиль угсаатанай гасаланта ёолоон Минии һонорто хүрэбэ. Египет зоной тэдэниие яажа дарлажа байһые Би харабаб. 10 Иимэ ушарһаа Би шамайе фараондо эльгээхэм: Минии арадые, Израиль угсаатаниие Египедһээ гаргыш даа.

11 – Би хэн аад, фараондо ошожо, Израилиин зониие Египедһээ гаргаха болобо гээшэбиб? – гэжэ Моисей Бурханда хэлэбэ.

12 – Би шамтай суг хажуудаш байхаб. Минии шамайе эльгээһэнэй дүлгэ тэмдэг иигэжэ тудаха: Египедһээ арадыем гаргаһанайш хойно энэ хада дээрэ Бурханда зальбаран, ёһолол бүтээхэ сагтнай ерэхэ, – гэжэ Бурхан харюусаба.

Бурхан Моисейдэ нэрээ айладана

13 Моисей Бурханда үгэлбэ:

– Зай, би Израиль угсаатанда ерэжэ хэлэбэ гэлэйб: «Эсэгэнэрэйтнай Бурхан намайе таанадта эльгээбэ». Харин тэдэ намһаа иигэжэ асуухал: «Тэрэ Бурханайш нэрэ хэн бэ?» Тиихэдэнь юун гэжэ харюусаха болонобиб?

14 Бурхан Моисейдэ айладаба:

– Би болбол БИ ХЭТЭДЭЭ ОРШОГШО гээшэб. Израиль угсаатанда «БИ ХЭТЭДЭЭ ОРШОГШО намайе таанадта эльгээгээ» гэжэл хэлээрэй.

15 Бурхан үшөө иигэжэ айладаа:

– Танай эсэгэнэрэй – Абраһаамай Бурхан, Исаагай Бурхан, Яковай Бурхан болохо Эзэн намайе эльгээгээ гэжэ Израилиин хүбүүдтэ хэлэхэш. Минии нэрэ хэтэдээ тиимэ, Намайе угһаа угта тиигэжэл дурдадаг байха зэргэтэй. 16 Ошо, Израилиин аха захатаниие суглуула. Тэдээндэ иигэжэ дуулга: таанадай эсэгэнэрэй, Абраһаамай, Исаак ба Яковай Бурхан болохо Эзэн намда ерэжэ, иигэжэ айладаал: «Би Египедтэ ямар байдалтай байһыетнай харабаб. 17 Таанадые Би Египедэй дарлалтаһаа зайлуулжа, ханаһаан, хээт, эмоор, пэриззии, хиив ба евүүс угсаатанай һуудаг, һү тарагаар, бал тоһоор дэлбэржэ байдаг нютагта абаашахам».

18 Израиль угсаатанай аха захатан шинии үгэ дуулаха, тэдээнтэй сугтаа Египедэй фараондо ошожо, иимэ айладхал хэхэт: «Еврейнүүдэй Бурхан болохо Эзэн манда үзэгдөө; Эзэн Бурхандамнай зорюулһан үргэл хэхыемнай сүл губи тээшэ, гурбан үдэрэй зайда маанадые табиит».

19 Би мэдэнэм, хүсэтэ гараар баадхаагүй һаа, Египедэй фараон ябахыетнай зүбшөөхэгүй. 20 Би Өөрын хүсэтэ гар Египет руу һунаахаб, эди шэдеэрээ элдэб гайхамшаг үзэгдэл харуулхаб – тиихэдэм лэ таанадые табиха. 21 Минии һанаһан соол Египедэй зоной хандаса хубилха: тэндэһээ ябахадаа гар һула ябахагүйт. 22 Эхэнэрнүүдтнай хүршэнүүдһээ алта мүнгэн зүүдхэл, хубсаһа хунар эрижэ абаха, абаһанаа үхи хүүгэдтээ үмдэхүүлхэт! Египедые тиигэжэ хооһолон, олзо ехэтэй гарахат.