Exo 30 | BxrBBL2024 | STEP | Акаци модоор сан санзай ууюулгын шэрээ бүтээ.

‏ Exodus 30

Сан санзай ууюулгын шэрээ бүтээлгэ

1 Акаци модоор сан санзай ууюулгын шэрээ бүтээ. 2 Тэрэшни тэбхэр түхэлтэй, ута үргэнөөрөө тохой, үндэрөөрөө хоёр тохой байха ёһотой. Эбэр мэтээр ёдойһон дүрбэн углуунуудтаяа нэгэн бүхэли болохо. 3 Оройень, хажуу талыень, эбэртэ углуунуудыень шэжэр алтаар хушахаш, тойруулан алтан хүбөө хэхэш. 4 Алтаар хоёр сахариг хэжэ, хүбөө доогуурнь бүхэлэн торгохо болоно. Сахаригуудтаа модон һургааг углажа, үргэлэй шэрээгээ үргөөд ябахат. 5 Һургааг акаци модоор хэхэт, мүн лэ алтаар хушахат.

6 Хэлсээнэй бэшэгтэй ханза халхалһан хүшэгын хажууда шамтай уулзахын үедөө Минии дээрэнь оршодог арюудхалгын хушалтын үмэнэ тэрэ үргэлэй шэрээ табигдаха ёһотой. 7 – 8 Энэ шэрээ дээрэ хүжэ санзай ууяжа байха – Аһароон үглөө бүри бүхэһэн зула дэнгүүдээ заһан шэнэлдэг, үдэшэ бүри носоодог уялгатай байг. Эзэнэй үмэнэ хүжэ санзай саг үргэлжэ, үеһөө үедэ утагдажа байха ёһотой. 9 Энэ үргэлэй шэрээ дээрэ ондоо зорилгоор уталга, түгэс шатаалта үргэл, талхан үргэл, сэржэм үргэжэ болохогүй. 10 Жэлэй нэгэ дахин Аһароон шэрээгэй эбэрнүүдтэ шуһа сүршэжэ, арюудхалгын ёһо заншал үнгэргэдэг байг. Үеһөө үедэ жэлэй нэгэ удаа нүгэл сагааруулгын үргэлэй шуһаар сэбэрлэгдэдэг энэ арюудхалга Эзэнэй нангинай нангин зүйл болоно.

11 Эзэн Моисейдэ айладаба:

12 – Израильшуудай тоо бүридхэл хэхэ үедэ эрэ хүн бүхэн тоо бүридхэлһээ боложо өөртөө аюул ушаруулхагүйн тула Эзэндэ түлөөһэ оруулха ёһотой. ^{▼▼ Зоной тоо бүридхэл хадаа Эзэнэй уур хилэнсэг хүдэлгэхэ жэшээтэй. Юуб гэхэдэ, зоной тоо элирүүлхэ гээшэ тэдэниие зонхилһонтой адли. Зонхилхо эрхэ Бурхандал хабаатай. Тоо бүридхэл гэмээ наманшалһантай адли үйлэ болоно. Тиимэһээ шүтөөндэ мүнгэ оруулха ёһотой болоно.} 13 Тоо бүридхэлэй үедэ хүн бүхэн хадаа нангин шээкэлэй хахадыень (шээкэл – хорин гер) һүмэдэ оруулаг. Энэ бол Эзэндэ үргэл. 14 Хори наһа гүйсэһэн хүн бүхэн тоо бүридхэлэй эхилхэдэ, Эзэндэ иимэ үргэл хэхэ ёһотой. 15 Баян үгытэйһөө огто илгаатай бэшэ, хүн амин лэ өөрынгөө түлөө түлөөһэ хахад шээкэлһээ бага үргэл оруулха ёһогүй.

16 Израилиин зонһоо иимэ түлөөһэ абажа, Уулзалгын майхан һүмын дэргэдэхи ажалда хэрэглэхэш. Энэ бол Эзэндэ Израиль тушаа һануулһан тэмдэг, таанадай түлөө түлбэри болохо.

Зэдээр хэһэн угаалуур

17 Эзэн Моисейдэ айладаба:

18 – Гар, хүлөө зайлаха томо зэд амһарта, доронь зэдээр табюур хэхэш. Тэрэнээ майхан һүмын ба үргэлэй шэрээгэй хоорондо табижа, уһаар дүүргэхэш. 19 Аһароон ба тэрэнэй хүбүүд тэндэ хүл, гараа угаадаг-зайладаг байха. 20 Майхан һүмэдэ орохын урда тээ тэдэ хүл, гараа угаагаагүй һаа, үхэхэ. Шатаалта үргэл хэхэеэ үргэлэй шэрээдэ дүтэлхын урда 21 тэдэ хүл, гараа угааха ёһотой. Үгы гэбэл, үхэхэ. Аһароон болон тэрэнэй уг удамда үеһөө үедэ дамжуулагдаха хуули гурим гэбэл, энэ мүн.

Магнайда түрхидэг ёһололой тоһон

22 Эзэн Моисейдэ айладаба:

23 – Эгээл эрхим хүжэ санзай болохо табан зуун шээкэл мирра модоной дабирхай, хоёр зуу табин шээкэл халуун ороной хангалта лавр модоной нюдэһэн холтоһо, хоёр зуун табин шээкэл хангал үнэртэй хулһа, 24 табан зуун шээкэл энэдхэг модоной зөөлэн хальһа (хуу һүмын шээкэлээр хэмнэхэ), мүн нэгэ гиин оливын тоһо абахаш – 25 эдэ бүгэдые найруулхадаш, магнайда түрхидэг ёһололой нангин тоһо болохо. 26 Нангин энэ тоһые Эзэнтэй уулзалгын майхан һүмэдэ, хэлсээнэй бэшэгэй ханзада, 27 бүхы амһартатайнь хамта шэрээдэ, бүхы хэрэгсэлтэйнь хамта дэндэ, уталгын үргэлэй шэрээдэ, 28 түгэс шатаалта үргэлэй шэрээ болон тахилай хэрэгсэлнүүдтэ, хүл, гараа зайладаг амһартада түрхихэ ёһотой. 29 Эдэ бүгэдые иигэжэ арюудхахадаш, нангинай нангин болохо. Эдэ хэрэгсэлнүүдтэ хүрэһэн бүхы юумэн нангин болохо. 30 Минии санаартад болохынь тулада Аһарооной, тэрэнэй хүбүүдэй магнайда түрхин арюудхахаш!

31 Израиль угсаатанда иигэжэ ойлгуулхаш: «Иимэ бүридэлтэй тоһон хадаа үеһөө үедэ үндэр шэрээдэ үргэмжэлэн һуулгаха ёһололдо хэрэглэдэг нангин тоһон болохо. 32 Тэрээниие ондоо хүндэ түрхижэ бү байгты. Өөртөө гэжэ иигэжэ найруулха ёһогүй: энэ хадаа нангин зүйл, таанадта тэрэл зандаа үлэг. 33 Өөртөө гү, али ондоо хүндэ иимэ бүридэлтэй тоһо найруулһан гү, али түрхиһэн хүн усадхагдаха, угсаата арадайнгаа тооһоо гаргагдаха».

34 Эзэн Моисейдэ зарлиг болобо:

– Натаат ^{▼▼ Натаат – хангал үнэртэй дабирхайн нэрэ. Шэхэлээт – далайн хорхойһоо абтадаг хангал бодос. Галбаан – Персидэ ургадаг шүхэр сэсэгтэ ургамалай зарсаһан шүүһэн. Сан ууюулдаг дабирхай – ородоор ладан.}, шэхэлээт, галбаан гэжэ хангал үнэртэй бодосуудые сан ууюулдаг дабирхайтай холижо, 35 хүжэ санзайн бодос дабһа нэмэн найруулхаш. Энэ хадаа сэбэр, нангин хүжэ санзай мүн. 36 Тэрээниие нюдэжэ, Минии шамда ерэжэ уулзадаг майхан һүмэ соо хэлсээнэй бэшэгэй урда ууюулдаг байхаш. Эдэ хадаа таанадта нангинай нангин зүйл болог. 37 Өөртөө иимэ санзай хэжэ бү байгты, гансал Эзэнэй нангин зүйл болохо зэргэтэй. 38 Иимэ хангал үнэр өөртөө анхилуулха зорилгоор санзай найруулһан хүн усадхагдаха, өөрын арад зоной тоодо тоогдохоёо болихо.