‏ Exodus 32

Алтан тугал

1Моисей хадаһаа бусанагүй гэжэ зон харажал байба. Аһароониие тойрон иигэжэ хэлэбэ:

– Маанадые дахуулха бурхан бүтээгыш. Харин Египедһээ маанадые гаргаһан энэ Моисейтэй юуншье болоһониие мэдэхын аргагүй.

2– Танай һамгадай, хүбүүд, басагадай шэхэнэй һиихэнүүдые абажа, намда асарагты, – гэжэ Аһароон тэдэниие зонхилбо.

3Зон Аһароондо алтан һиихэнүүдээ үгэбэ һэн ха, 4Аһароон тэдэнииень хайлуулжа, тугалай хүрэг бүтээбэ.

– Израиль, шамайе Египедһээ гаргаһан Бурханшни бэеэрээл! – гэжэ зон дуугаралдаба.

5Энээниие харахадаа, Аһароон тугалай урда үргэлэй шэрээ бодхоожо тунхаглаба:

– Үглөөдэр Эзэнэй һайндэр!

6Хойто үглөөгүүрнь тэдэ түгэс шатаалта үргэл ба амгалан байдалай түлөө үргэл үргэбэ. Һүүлээрнь эдихэ, уухаяа һууба, найрлажа хүхижэ оробо.

7– Хадаһаа бууха болобош, – гэжэ Эзэн Моисейдэ айладаба. – Египедһээ гаргаһан угсаатаншни забхайрһан зон лэ байна даа. 8Минии зааһан замһаа ямаршье түргэн тэдэ хадуурба гээшэб даа! Тэдэ өөһэдтөө тугалай хүрэг хээд, тэрээндэ мүргэжэ байнал. Тэдэ «Израиль, шамайе Египедһээ гаргаһан Бурханшни бэеэрээл!» гэлдэнэ.

9Эзэн айладаба:

– Яагаа үсэд зэрюу зон гээшэб гэжэ гайханам! 10Уур хилэнсэгээ дээрэнь адхажа, тэдэниие һүнөөхэм, бү һаад хэ, харин шамайе агууехэ арадай эхи табиһан элинсэгынь болгохоб!

11Моисей гараа хабсаруулан, Эзэн Бурханаа аргадажа эхилбэ.

– Эзэн! – гэбэ тэрэ. – Агууехэ хүсөөрөө, агуу шадалаараа Египедһээ гаргаһан Өөрын арадта уур хилэн болоһоной үрэ ямар юм?! 12Энэ арадые үхэлдэнь хүтэлжэ гараа юм байна, хада уулын хормойдо абаашан, хатуу шангаар нэрбэжэ, газарай нюрууһаа үгы болгожо орхибол гэжэ Тан тухай египет зон хэлсэхэл, энэ хэндэ хэрэгтэйб?! Уур хилэнсэгээ номгоруулыт, үршөөгыт Өөрын арадые, бү һүнөөгыт! 13Өөрын богоолнууд Абраһаам, Исаак ба Израильда юун тухай тангариг үгэһэнөө һаныт – тэдэнэй уг удамые тэнгэриин одо мүшэд шэнги олон болгохоб, тэдээндэ гэжэ найдуулһан газараа уг удамдань хэтын хэтэдэ эзэмшэн һуухыень үршөөхэб гэжэ Өөрыгөө гэршэ болгон тангариглаа бэлэйт!

14Эзэн уур хилэнсэгээ номгоруулба. Өөрын арад угсаатаниие һүнөөхэ гэжэ забдаһан аад, болибо.

15Моисей хадаһаа доошоо бууба. Гартаа хэлсээнэй хоёр шулуун хабтаһа баринхай. 16Тэдэ хабтаһануудые Бурхан Өөрөө бүтээгээ, бэшэгүүдыеньшье хабтаһанууд дээрэ Өөрөө һиилэн зураа.

17Энэ хирэдэ доро байһан зоной шууяан Иисүүсэй һонорто хүрэбэ.

– Хотон хүреэндэмнай байлдаанай шууяан дуулданал! – гэжэ тэрэ Моисейдэ хэлэбэ.

18– Энэ илалтын дуун бэшэ, энэ илагдаһанай ёолоон бэшэ! Архиин зугаа дуулданал! – гэжэ Моисей харюусаба.

19Хүреэндэ дүтэлхэдөө, Моисей алтан тугалыень хараба. Зугаа дэлгэжэ, хатаржа байһан зониие хараба. Уур сухалда абтаһан Моисей абажа ерэһэн шулуун хабтаһануудаа хадын хормойдохи газарта биса хаяба. 20Тугалай хүрэгые галда хаяжа хайлуулаад, уйгааг тоброог болоторнь нюдэбэ. Тэрэнээ уһа руу хаяжа, Израилиин зониие үтэр уугты гэжэ зандаран, тэрэ уһыень уулгаба.

21– Танай урда ямар гэмтэйдэнь энэ арадые иигэжэ нүгэлдэ түлхибэт? – гэжэ Моисей Аһароонһоо асууба.

22Аһароон иимэ харюу үгэбэ:

– Бү сухалдыш, эзэн минии! Эдэ зоной муу юумэндэ абьяастайень өөрөөш мэдэнэ ха юмши. 23Тэдэ иигэжэ хэлээл: «Маанадые дахуулха бурхан бүтээжэ үгыш. Египедһээ маниие гаргаһан Моисейтэй юуншье болоһые мэдэхын аргагүй!» 24Алтан һиихэ зүүдхэлнүүдээ асарагты намда гээ бэлэйб. Тэрэ алтыень галда хаяхадам, иимэ тугал болоол!

25Зон мэдэлһээм гараа гэжэ Моисей ойлгобо. Аһароон лэ иимэ үйлэ хэжэ, дайсадайнь наадан болгобо ха юм. 26Хүреэгэй үүдэндэ зогсоод, Моисей хэлэбэ:

– Хэн Эзэндэ урбаагүйб? Нам тээшэ дүтэлэгты!

Левиин бүхы хүбүүд хажуудань ерэбэ. 27Моисей тэдээндэ захиралта үгэбэ:

– Израилиин Эзэн Бурхан зарлиг болобо: һэлмэеэ барижа, хүреэ соогуур, хаалтаһаа хаалта хүрэтэр һэтэ гарагты! Аха дүүшье байг, анда нүхэршье байг, хаяа хадхадаг хүршэшье байг, хамаагүй, сабшажа алагты!

28Левиин хүбүүд захиралтыень шууд дүүргэбэ. Тэрэ үдэр гурба мянган шахуу хүн алуулаа бэлэй.

29– Мүнөө таанад, – гэбэ тэдээндэ Моисей. – Аха дүү болон үри хүбүүдэйнгөө ами наһаар түлөөһэ оруулжа, Эзэнэй санаартад бологты! Тэрэл ушарта Эзэнэй үреэл үршөөлдэ хүртэхэт!

30Хойто үглөөнь Моисей арад зондо хэлэбэ:

– Нүгэлтнай хэмжэшэгүй ехэ! Гэбэшье би Эзэндэ ошохом, гэмытнай сагааруулха арга олдожо магад.

31Эзэндэ ошоод, Моисей хэлэбэ:

– Эдэ зон хэмжэшэгүй ехэ нүгэл үйлэдөө. Өөһэдтөө алтаар бурханиие хээ. 32Үршөөхэ гээшэ гүт? Үгы гэжэ харюусабал, намайешье Өөрын Номһоо зуража хаяыт!

33Эзэн харюу үгэбэ:

– Намда эсэргүүсэн, нүгэл хэһэн хүнүүдые Өөрын Ном сооһоо баллахаб. 34Минии зааһан газарта зоноо ошожо асара. Минии Эльгээмэл урдашни ябаха. Хэһээлтын үдэрэй ерэхэдэ, нүгэлынь амсуулхаб.

35Тиигэжэ Эзэн Израилиин арадые Аһарооной хэһэн тугалай түлөө хэһээгээ һэн.