Exo 35 | BxrBBL2024 | STEP | Израиль угсаатаниие бултыень суглуулжа, Моисей хэлэбэ:

‏ Exodus 35

Майхан һүмэ бүтээлгэ

1 Израиль угсаатаниие бултыень суглуулжа, Моисей хэлэбэ:

– Эзэнэй зарлиг иимэ. 2 Зургаан үдэр хүдэлдэг байгты, харин долоодохи үдэр Эзэнэй нангин үдэр, суббото, амарха үдэр мүн. Энэ үдэр ажал хэһэн хүнэй ами наһан таһарха. 3 Субботодо таанадай гэртэ галшье носоожо болохогүй.

Майхан һүмые бодхооходо хэрэгтэй зүйлнүүдые үргэлгэ

4 – Эзэн иигэжэ зарлиг болобо, – гэжэ Моисей Израиль угсаатанда хэлэбэ. – 5 Эзэндэ үргэхэ зүйлнүүдээ суглуулагты. Үгэхэ һанаатай хүн байбал, алта, мүнгэ, зэд түмэр, 6 сэнхир хүхэ, гүн улаан гү, али үдхэн улаан үнгэтэй ээрэһэн хилгааһан утаһа, нарин маалинга бүд гү, али ямаанай хөөбэр нооһо, 7 хониной утан элдэһэн арһа болон нарин булгайр, акаци модо, 8 зула носоохо оливын тоһо, үргэмжэлэлэй ёһололдо, хүжэ санзайгаар уталгада хэрэглэдэг хангал бодос, 9 эфод болон сээжэбшэ-уута шэмэглэхын тулада гуу хүреэдэ хэхэ мана болон бусад үнэтэ шулуу суглуулагты. 10 Уран гартайшуултнай ерэжэ, Эзэнэй захирһые бултыень бүтээг: 11 Майхан, тэрэнэй нэмэргэ, оройн хушалта, дэгээ түдүүлинүүдые, ханын хүреэнүүд болон хүндэлэбшэнүүдые, бахана болон түшэгүүдые, 12 хэлсээнэй бэшэг хадагалдаг ханза болон үргэхэ һургаагуудые, арюудхалгын хушалта болон хүшэгэ, 13 талханай шэрээ, шэрээ үргэхэ һургааг модонууд болон амһарта, Эзэнэй урда табигдаха талха, 14 носодог зула дэнгүүдэй һуури болон тэрэнэй бүхы хэрэгсэл, дэнгүүдые, зулын тоһо, 15 уталгын шэрээ, тэрэниие үргэхэ һургааг модонуудые, үргэмжэлэлэй ёһололдо магнайда түрхихэ тоһо ба хүжэ санзайн зүйл бодос, майхан һүмэдэ орохо үүдэнэй хүшэгэ, 16 түгэс шатаалта үргэлэй шэрээ зэд һагшууртайнь, үргэхэ һургаагуудые болон бусад хэрэгсэл, угаалгын амһарта, табюур, 17 һүмын газаахи хорёогой хүшэгэ, бахананууд ба тэдэниие һуулгаха түшэгүүдые, хорёогой үүдэнэй хушалта хүшэгэ, 18 Майхан һүмын нэмэргэ татаха гадаһануудые ба хорёогой хушалта татаха гадаһануудые, тэдээндэ ооһорнуудые, 19 һүмэ соо алба хэхэ хубсаһа – Аһароон санаартын һахилай хубсаһа ба тэрэнэй хүбүүдэй һахилай хубсаһа жэншэдгүй бүтээхэ ёһотой.

20 Израилиин арад зон тиигээд тараба. 21 Хүн бүхэн өөрын сэдьхэлэй уялгаар Эзэндэ үргэхэ хүсэлтэй бүхы юумэеэ, майхан һүмэдэ хэрэгтэй, зосоонь алба ёһолол хэхэдэ ба һахилай хубсаһанда хэрэгтэй алибаа хамаг зүйл асаржа ерэбэ. 22 Ерэхэ дуратай хамаг зон, эрэ, эмэгүй бултадаа алтан зүүдхэлнүүдээ: зүүлтэ, һиихэ, бэһэлиг, бугааг мэтэ зүйлнүүдые Эзэндэ үргэл болгожо үгэбэ. 23 Зарим зон сэнхир хүхэ, үдхэн улаан ба гүн улаан ээрэһэн утаһа, нарин маалинга бүд, ямаанай нооһо, утанжа элдэһэн хониной арһа ба нарин булгайр асарба. 24 Зариман шадаха соогоо мүнгэ гү, али зэд түмэр Эзэндэ бариба. Хэрэглэжэ боломоор акаци модо үргэһэн зон байба. 25 Гартаа дүйтэй эхэнэрнүүд утаһа хилгааһа ээрэжэ, сэнхир хүхэ, гүн улаан ба үдхэн улаан үнгэтэй ээрэһэн утаһа ба нарин маалинга бүд нэхэжэ асарба, 26 ондоо эхэнэрнүүд шадаха оролдохо соогоо ямаанай нооһо ээрэбэ. 27 Удамаршад эфод болон сээжэбшэ-уутые шэмэглэхэеэ гуу хүреэдэ хэхэ мана болон бусад эрдэни шулуу, 28 мүн гэрэлтүүлхэ, магнайда түрхихэ ба утахын тула хангал үнэртэй бодосуудые, тоһо үргэбэ. 29 Иигэжэ Эзэнэй Моисейгээр дамжуулан зонхилһон хэрэгтэ хабаадахаяа хүсэһэн эрэ, эмын илгаагүй Израилиин хамаг зон Эзэндэ бэлэг үргэбэ.

Майхан һүмые бодхооходо томилогдоһон ажалшад

30 Моисей Израилиин зондо хэлэбэ:

– Мэдэжэ байгты: Эзэн Иудын обогһоо Бэцалээлые шэлээ. Бэцалээл Үриин хүбүүн, Үрии Хуурай хүбүүн. 31 Бурханай һүлдөөр Бэцалээлые дүүргээб. Тэрээндэ мэргэн ухаа, ойлголто, оюун мэдэсэ, хамаг урлалай үндэр шадабари үршөөгөө, 32 Тэрэ алта, мүнгэн, зэд гэхэ түмэрөөр аргагүй бэрхэ дархан болоо, 33 эрдэни шулуу өөлэжэ, гуу хүреэдэ һуулгажа шадаха, модо һиилэхэ, юрэдөө, бүхы урлал шадаха. 34 Эзэн тэрээндэ ба Даан обогой Ахисамаахай хүбүүн Оһолиаабта зониие һургаха шадабари үгөө. 35 Эзэн тэдээндэ һиилэхэ уран шадабари, угалзатай бүд, сэнхир хүхэ, үдхэн улаан ба гүн улаан үнгэтэй ээрэһэн утаһаар ба нарин маалинга бүдөөр элдэб үнгын бүд, мүн юрын бүд нэхэхэ уран шадабари, дархан болон уран гартанай бүхы шадабари үршөөгөөл.