‏ Exodus 37

Хэлсээнэй ханза

1Уран гарта Бэцалээл акаци модоор хоёр хахад тохой утатай, нэгэ хахад тохой үргэнтэй ба үндэртэй ханза хэжэ, 2газаа, зосооһоонь шэжэр алтаар хушажа, тойруулаад шэжэр алтаар хүбөөлбэ. 3Дүрбэн алтан сахариг хэжэ, ханзын дүрбэн хүлдэ бүхэлбэ: ханзын нэгэ хажууһаа хоёр сахариг, нүгөө тээһээнь хоёр сахариг. 4Акаци модоор һургаагуудые хэжэ, алтаар дабтан бүрибэ, 5ханзын хоёр хажуугай сахаригуудта оруулба. Тэрэ һургааг модондо ханзаяа тээгээд ябаха боломжотой болобо.

6Ханзые хааха хабхаг сэбэр алтаар бүтээбэ; утань хоёр хахад тохойн, үргэниинь нэгэ хахад тохойн хэмжээнэй байба. 7Хабхагай хоёр захаарнь алтаар дабтажа, хоёр херүүбэй дүрсэ урлаба. 8Тэдэнь хабхагтай нэгэн бүхэли зүйл болохо. 9Урда урдаһаа зогсоод, хабхаг тээшэ шэртэн, далияа дээгүүрнь дэлгэжэ байба.

Шэрээ

10Акаци модоор хоёр тохой утатай, тохой үргэнтэй, тохой хахад үндэртэй шэрээ хэбэ. 11Алта дабтажа, шэрээгээ бүреэд, алтаар хүбөөлбэ. 12Захаарнь альганай шэнээн үндэр хана хээд, баһал алтаар хүбөөлбэ. 13Алтан сахаригуудые хээд, шэрээгэй дүрбэн углууда хүл дээгүүрнь торгообо. 14Ханада няалдаһан тэдэ сахаригуудта һургаагуудые хээд, шэрээгээ үргэжэ һууриһаань хүдэлгэхэдэ болоно. 15Шэрээ зөөхэ һургаагуудые баһал акаци модоор хэжэ, баһал алтаар бүрибэ. 16Мүн лэ сэбэр алтаар шэрээ дээрэ байха, сэржэмдэ хэрэгтэй болохо амһарта – табаг, шанага, аяга, домбо хэбэ.

Алтан дэн

17Сэбэр алта дабтажа, модоной түхэлтэй дэн бүтээбэ. Эшэ болон һалаануудынь, һалаа дээрэ табигдаха зулын амһарта, оёортонь дэнгэй гол бариха амһарта, сэсэгэй һалаа дэльбэнүүд бүгэдэ нэгэн бүхэли боложо харагдаба. 18Дэнгэй модон зургаан һалаатай байба: гурбаниинь нэгэ талаһаань, нүгөө гурбань нүгөөдэ талаһаань. 19Зургаан һалаа бүхэндэ бүйлсын сэсэг шэнги дэльбэтэй, оёортоо булсатай гурбан аягаханууд һууба. 20Дэнгэй оройдонь бүйлсын сэсэг мэтэ дүрбэн сэсэг хэбэ. 21Хоёролжон һалаанууд доро аягын һуури, нүгөө хоёр һалаа доро аягын һуури, гурбадахи хоёролжон һалаа доро баһал аягын һуури: бүхы зургаан һалаа доро тиимэ һууринуудые хэбэ. 22Сэбэр алтаар дабтан бүтээһэн зулын голой амһартанууд, һалаануудынь дэнтэеэ нэгэн бүхэли болобо. 23Долоон дэн хэбэ, зулын голой хабшуур, согой амһарта сэбэр алтаар бүтээбэ. 24Дэндэ болон тэрэнэй бүхы хэрэгсэлдэ нэгэ талаант хэмжээнэй шэжэр алта гаргашалагдаба.

Сан санзайн ууюулгын шэрээ

25Акаци модоор сан санзай ууюулгын шэрээ бүтээбэ. Тэрэнь тэбхэр түхэлтэй, ута үргэнөөрөө тохой, үндэрөөрөө хоёр тохой болобо. Эбэр мэтээр ёдойһон дүрбэн углуунуудтаяа нэгэн бүхэли зүйл болобо. 26Оройень, хажуу талыень ба эбэртэ углуунуудыень шэжэр алтаар хушаба, тойруулан алтан хүбөө хэбэ. 27Алтаар хоёр сахариг хэжэ, хүбөө доогуурнь бүхэлэн торгобо. Сахаригуудтаа модон һургааг углажа, үргэлэй шэрээгээ үргөөд ябахаар болгобо. 28Һургаагуудаа мүн лэ акаци модоор хэжэ, алтаар бүрибэ.

29Магнайда түрхидэг ёһололой нангин тоһо болон уталгада хэрэгтэй һайхан хангалтай бодос сэбэрээр, шадамараар найруулба.