‏ Exodus 38

Түгэс шатаалта үргэлэй шэрээ бүтээлгэ

1Акаци модоор түгэс шатаалта үргэлэй шэрээ хэбэ. Тэрэнь тэбхэр – утаараа табан тохой ба үргэнөөрөө табан тохой, үндэрынь гурбан тохой болобо. 2Дүрбэн углууень эбэр шэнгеэр дээшэнь ёдойлгоод, үргэлэй шэрээтэй нэгэн бүхэли болгобо. Шэрээгээ зэдээр бүрин хушаба. 3Үргэлэй шэрээгэй хэрэгсэлнүүдые: нүүрһэнэй удхуур, шуһа сүршэхэ аяга, мяханай һэрээ, согой амһарта, хайруулай табаг – бултыень зэд түмэрөөр хэбэ. 4Үргэлэй шэрээдэ хабтагар зэд һагшуур шэнгеэр нүхэлжэ, үргэлэй шэрээгэй захаһаа доошоо, хахадтань хүрэтэр барижа бүхэлбэ. 5Модон һургааг хэхэ дүрбэн сахариг шудхажа, зэд һагшуурай дүрбэн углууда бүхэлбэ. 6Акаци модоор һургаагуудые хайжа, зэд түмэрөөр бүрибэ. 7Үргэлэй шэрээ зөөхэ хэрэгтэй болоо һаань, тэдэ һургаагуудаа хажуу тээхи сахаригуудта оруулдаг байха юм. Үргэлэй шэрээ досоогоо хүнды, хабтагайгаар хэгдэбэ.

8Мүн майхан һүмын үүдэндэ алба хэдэг эхэнэрнүүдэй толиин зэд абажа, угаабариин амһарта ба табюур хэбэ.

9Удаань тэрэ һүмэеэ тойруулаад хашаа хэбэ. Урда талаһаань нарин маалинга бүдөөр хэһэн зуун тохойн шэнээн утатай далбагар хүшэгэ байба. 10Тэрэнээ хорин баханада үлгэбэ. Бахана доро зэд түмэрөөр хорин түшэг хэжэ бүхэлбэ. Бахана дээрэхи дэгээ холболтонуудыень мүнгөөр хэбэ. 11Мүн хойто талаһаа зуун тохой утатай далбагар хүшэгэ доогуураа хорин зэд түшэгтэй хорин баханада үлгэбэ. Бахана дээрэхи дэгээ холболтонуудынь мүнгөөр хэгдэбэ. 12Баруун хажууһаа хашаагай үргэнөөрнь табин тохой утатай далбагар хүшэгэ арбан баханада үлгэгдэбэ, арбан түшэг бахананууд доро шудхагдаба. Баханын дэгээ холболтонуудынь мүнгөөр хэгдэбэ. 13Зүүн тээһээ хашаагай үргэниинь баһал табин тохой болобо. 14Орохо үүдэнһээ нэгэ тээшэ арбан табан тохой утатай далбагар хүшэгэ гурбан түшэгтэй гурбан баханада татагдаба. 15Хаалгаһаа нүгөө тээшээ баһал арбан табан тохой утатай гурбан түшэгтэ һуулгаһан гурбан баханатай хүшэгэ хэгдэбэ. 16Хашаагай бүхы далбагар хүшэгэнүүд нарин маалинга бүдөөр хэгдэбэ, 17баханын түшэгүүд зэд түмэрөөр шудхагдаба, баханын дэгээнүүд болон холболтонууд мүнгөөр хэгдэбэ. Баханын оройе мүнгөөр хушаба. Хашаагай бүхы бахананууд мүнгэн холболтонуудаар холбогдобо. 18Хашаагай үүдэнэй хүшэгэ сэнхир хүхэ, гүн улаан ба үдхэн улаан үнгэтэй ээрэһэн хилгааһан утаһаар нэхэгдэжэ, нарин маалинга бүдтэй зүйгдэбэ. Хорин тохой утатай байба. Нэмэргын үндэр хашаагайхи шэнги табан тохой болобо. 19Үүдэндэ дүрбэн зэд түшэг дээрэ дүрбэн бахана һуулгагдаа; баханын дэгээнүүдые мүнгөөр хээ. Баханын орой мүнгэн, холболтонуудынь мүнгэн болобо. 20Майхан һүмын ба хашаагай халхабшын гадаһанууд зэдээр хэгдэбэ.

Алта, мүнгэ ба зэдэй жагсаал

21Аһароон санаартанай хүбүүн Итамаарай ударидалга доро левидүүд Моисейн захиралтаар хэлсээнэй майхан һүмын хамаг гаргашын тоо бүридхэбэ. 22Иудын обогой Хуурай хүбүүн болохо Үриин хүбүүн Бэцалээл Эзэнэй Моисейгээр дамжуулан зарлигтаһыень дууһан бүтээбэ. 23Уран һиилүүршэ, угалзатай бүд, сэнхир хүхэ, гүн улаан ба үдхэн улаан утаһа хилгааһаар, нарин маалинга бүдөөр үзэсхэлэнтэ үнгэтэй бүд нэхэхэ уран шадабаритай Даан обогой Ахисамаахай хүбүүн Оһолиааб тэрээнтэй суг байгаа.

24Нангин һүмын барилгада хэрэглэгдэһэн үргэлэй алтан гэхэдэ, хорин юһэн талаант ба долоон зуун гушан шээкэл хэмжээнэй болобо (нангин һүмын шээкэлэй хэмжээгээр).

25Ниигэм зоной тоо бүридхэлэй үедэ суглуулагдаһан сагаан мүнгэн зуун талаант ба мянга долоон зуун далан табан шээкэл болобо (нангин һүмын шээкэлэй хэмжээгээр): 26бүридхэлдэ ороһон хори наһанһаа дээшэ амин бүхэнһөө (зургаан зуун гурба мянга табан зуун табин хүн) һүмын хахад шээкэлэй хэмжээгээр абтаба. 27Нэгэ талаант мүнгэн һүмын баханануудай ба хашаагай баханануудай түшэг шудхалгада оробо: зуун түшэгтэ – зуун талаант. 28Баханануудай дэгээ холболтонуудта ба баханануудай оройе мүнгөөр бүрилгэдэ нэгэ мянган долоон зуун далан табан шээкэл сагаан мүнгэ гаргашалба.

29Үргэлөөр ороһон зэд түмэр далан талаант ба хоёр мянга дүрбэн зуун шээкэл болобо. 30Тэрээгээр Уулзалгын майхан һүмын үүдэндэ баханануудай түшэгүүдые, һагшуур түмэртэй үргэлэй шэрээ болон тэрэнэй хэрэгсэл, 31хашаагай хүшэгын ба хашаагай үүдэнэй баханануудай түшэгүүдые, майхан һүмын ба газаа халхабшын гадаһануудые хэбэ.