‏ Exodus 39

Санаартанай хубсаһа хунар нэхэлгэ

1Сэнхир хүхэ, гүн улаан ба үдхэн улаан үнгэтэй ээрэһэн утаһаар һүмэдэ алба хэхэ хубсаһа – Аһарооной һахилай хубсаһа нэхэбэ. Тиигэжэ Эзэн Моисейдэ зарлиг болоһон байгаа.

2Алтан утаһаар, сэнхир хүхэ, гүн улаан ба үдхэн улаан үнгэтэй ээрэһэн утаһаар ба нарин маалинга бүдөөр эфод хэбэ. 3Тиигэхын тулада алта дабтажа хабтайлгаад, тэрээнһээ утаһа өөлэжэ гаргаад, тэрэ утаһаараа, сэнхир хүхэ, гүн улаан ба үдхэн улаан ээрэһэн утаһаар, нарин маалингаар угалзатай бүд нэхэбэ. 4Эфодой дала мүртэнь даруулгануудые оёбо. 5Эфодой бүһэнь эфодтой нэгэн бүхэли шэнги байба: эфодтол адли алтан утаһаар, сэнхир хүхэ, гүн улаан ба үдхэн улаан хилгааһаар, нарин маалинга зүйлтэтэйгээр нэхэбэ. Тиигэжэ Моисейдэ Эзэн зааһан байгаа.

6Угалзатай алтан гуунуудта һуулгаһан мана шулуунуудые бэлдэбэ. Шулуунууд дээрээ, тамга дээр мэтэ, Израилиин хүбүүдэй нэрэнүүд һиилэгдэбэ. 7Тэдэ шулуунуудаа Израилиин хүбүүд тухай ходо һануулжа байхыень дала мүрэй даруулгануудта бүхэлбэ. Тиигэжэ Эзэн Моисейдэ зааһан байгаа.

8Эфодтол адли алтан утаһаар, сэнхир хүхэ, гүн улаан ба үдхэн улаан үнгэтэй ээрэһэн хилгааһаар нарин маалинга зүйн, сээжэбшын түхэлэй уута хэбэ. 9Уутаяа тэб тэбхэрхэнээр, ута, богонёороо хахад тохой хэмжээнэй хоёр дабхар бүдөөр оёбо. 10Тэрээндээ эрдэни шулуу хэхэ дүрбэн халааһа зэргэлүүлэн оёбо. Нэгэндэнь бадмаа раага, молор, маргад; 11нүгөө зэргэдэнь – оюун, миндарга, очир; 12гурбадахидань – нал эрдэни, гартаам, ягаан болор; 13дүрбэдэхи зэргэдэнь – бэгтэ молор, мана ба хас эрдэни. Бүхы эрдэни шулуунуудые угалзатай алтан гуунуудта һуулгаба. 14Хамта дээрээ арбан хоёр шулуун, шулуун бүхэндэ тамга сохиһон шэнгеэр Израилиин арбан хоёр обогуудай нэгэнэйнь нэрэ һиилэгдэбэ.

15Сээжэбшын түхэлэй уутада гэжэ шэжэр алтаар гэнжэ ооһорнуудые хэбэ. 16Угалзатай хоёр алтан гуунуудые хэбэ. Үшөө хоёр алтан сахариг хээд, сээжэбшын углууда торгоогоод, 17алтан хоёр гэнжээрээ 18хоёр гуутай холбобо. Тэдэ гуунуудые эфодой даруулгануудта урдаһаань торгообо. 19Үшөө хоёр алтан сахариг хэжэ, сээжэбшэ-уутын хоёр углууда досоо талаһаань, эфодтой уулзадаг таладань барюулба. 20Үшөө хоёр алтан сахариг хэжэ, дала мүрэй даруулгануудай доодо хирхагаар, урда талаһаа, эфодой бүһэтэй уулзадаг газарта торгообо. 21Сээжэбшэ-уутын сахаригуудые эфодой сахаригуудтай сэнхир ооһороор холбобо. Тиихэдээ уутань эфодой бүһэ дээгүүр байжа, эфодтоо нягтаар няалданхай һэн. Тиигэжэ Эзэн Моисейдэ зааһан байгаа.

22Эфод доро үмдэхэ самса сэнхир хилгааһан утаһаар нэхэбэ. 23Тэрээндэнь толгойгоо углаха нүхэн байба, хахархагүйн тула эрмэгыень лабаар хүбэрдэбэ, сэрэгэй хубсаһан шэнги бүхэ болобо. 24Доодо захаарнь сэнхир болон гүн улаан, үдхэн улаан үнгэтэй утаһануудаар болон нарин маалингаар анар жэмэсэй түхэлтэй булсуунуудые хэбэ, 25хоорондонь алтан хонхохонуудые үлгэбэ. 26Алтан хонхонууд болон анар жэмэсэй үрэнүүд ээлжэлэн, хурал уншалганда үмдэхэ самсын доодо захые хүбөөлһэн шэнги болобо. Тиигэжэ Эзэн Моисейдэ зааһан байгаа.

27– 28Аһароондо ба тэрэнэй хүбүүдтэ маалинга бүдөөр самса, толгойдо хүрмэдэг бүд ба боолтонуудые, нарин маалинга бүдөөр үмдэ оёбо. 29Сэнхир хүхэ, гүн улаан, үдхэн улаан үнгэтэй ээрэһэн хилгааһаар нарин маалинга бүд зүйн, олон үнгэтэ гоё бүһэ нэхэбэ. Тиигэжэ Эзэн Моисейдэ зааһан байгаа.

30Һүмын нангин титим – алтан хабтаһа хээд, дээрэнь тамга һиилэһэн шэнгеэр «Эзэнэй нангин» гэһэн үгэнүүдые һиилэбэ. 31Толгойдо хүрмэдэг бүд дээгүүр, урдаһаа, уяхын тула тэрэ хабтаһандаа сэнхир хүхэ ооһор хадаба. Тиигэжэ Эзэн Моисейдэ зааһан байгаа.

Майхан һүмын ажалай түгэсхэл

32Уулзалгын асар майхан һүмэ бариха ажал түгэсэбэ. Израилиин зон Моисейдэ Эзэнэй зааһан зарлигаар жэншэдгүй наряар бүтээбэ. 33Тэдэ Моисейдэ майхан, тэрэнэй нэмэргэ болон хэрэгтэй бүхы зүйл – дэгээ түдүүлинүүдые, ханын хүреэнүүд болон хүндэлэбшэнүүдые, бахана болон доронь шудхаха түшэгүүдые, 34мүн утанжа элдэһэн хониной арһаар хэһэн хушалта ба нарин булгайр нэмэргэ, хүшэгэ, 35хэлсээнэй бэшэг хадагалдаг ханза, үргэхэ һургаагуудые, арюудхалгын хушалта, 36талханай шэрээ болон тэрэнэй амһарта, Эзэнэй урда табигдаха талха хилээмэ, 37шэжэр алтан дэн зулануудтайнь болон тэрэнэй бүхы хэрэгсэл, зулын тоһо, 38үргэлэй алтан шэрээ, магнайда түрхихэ тоһо ба уталгын хангал бодосуудые, майхан һүмэдэ орохо үүдэнэй хүшэгэ, 39үргэлэй зэд шэрээ зэд һагшууртайгаар, үргэхэ һургааг болон бусад хэрэгсэлыень, угаалгын амһарта табюуртайгаар, 40һүмын газаахи хашаагай хүшэгэ, бахананууд ба тэдэнэй доогуурхи түшэгүүдые, хашаагай үүдэнэй хушалта хүшэгэ, ооһорнууд болон гадаһануудые, Уулзалгын майхан һүмэ соо алба хэхын тулада хэрэгтэй бүхы хэрэгсэл, 41һүмэдэ алба хэхэ хубсаһа – Аһароон санаартын һахилай хубсаһа ба тэрэнэй хүбүүдэй һахилай хубсаһа асараа бэлэй. 42Эзэнэй Моисейдэ заан захирһанай ёһоор лэ Израилиин арад зон жэншэдгүй нарин бүтээгээ бэлэй.

43Моисей ябажа хараба, Эзэнэй захирһанай ёһоор нарин хэгдэһэн байба. Моисей тэдэниие адислан үреэбэ.