‏ Exodus 40

Майхын һүмые табилга

1Эзэн Моисейдэ хандаба:

2– Нэгэдэхи һарын нэгэндэ Уулзалгын майхан һүмэеэ табяарай. 3Тэрээн руугаа хэлсээнэй ханзаяа оруулаад, хүшэгөөр халхалаарай. 4Шэрээ оруулжа, хэрэгтэй бүхы юумэ дээрэнь табяарай; дэн асаржа, зулын амһартануудые дээрэнь табяарай. 5Хэлсээнэй бэшэгтэй ханзын урда уталгын алтан шэрээ табяарай, майхан һүмын үүдэндэ хаалта хүшэгэ үлгөөрэй. 6Уулзалгын майхан һүмэдэ орохо үүдэнэй дэргэдэ түгэс шатаалта үргэлэй шэрээ табяарай. 7Уулзалгын майхан һүмэ ба үргэлэй шэрээ хоёрой хоорондо амһарта табижа, уһаар дүүргээрэй. 8Һүмэеэ тойруулаад хашаа хээрэй, хашаагай үүдэндэ хүшэгэ үлгөөрэй. 9Удаань үргэмжэлэлэй ёһололдо хэрэглэгдэдэг оливын тоһо абажа, майхан һүмэдэ ба тэрээн соо байһан хамаг юумэндэ сүршэхэш: майхан һүмэ ба тэрэнэй бүхы зүйлнүүд тиихэдэш арюудхагдаха. 10Түгэс шатаалта үргэлэй шэрээдэ ба тэрэнэй бүхы хэрэгсэлдэ нангин тоһо баһал сүршэхэш: үргэлэй шэрээ арюудхагдаха – тиигэжэ нангинай нангин болохо. 11Угаалгын амһартада болон тэрэнэй табюурта баһал тоһо түрхихэш – тэдэш арюудхагдаха. 12Удаань Аһароониие хүбүүдтэйнь Уулзалгын майхан һүмын үүдэндэ асаржа, хүл, гарынь зайлан угаагаарай. 13Аһароондо нангин ёһололой хубсаһыень үмдэхүүлжэ, оливын тоһо магнайдань түрхеэрэй: Минии санаартан болохынь тулада арюудхаарай. 14Тэрэнэй хүбүүдые асаржа, самсануудыень үмдэхүүлээрэй. 15Минии санаартад болохынь тулада эсэгынь магнайда тоһо түрхиһэн шэнгеэр түрхеэрэй. Магнайдань тоһо түрхихэдэш, хэтын хэтэдэ үеһөө үедэ дамжуулагдадаг санаартанай нэрэ зэргэ тэдээндэ үгтэхэ.

16Моисей Эзэнэй зарлигтаһан соо жэншэдгүй наряар бултыень бүтээбэ.

17Хоёрдохи жэлэй нэгэдэхи һарын нэгэнэй үдэр майхан һүмэ табигдаа бэлэй.

18Моисей майхан һүмые һууридань табиба: түшэгүүдые тодхобо, тэдээн дээрэ хүреэнүүдые һуулгажа, хүндэлэбшэнүүдээр залгаба, баханануудые зогсообо, 19майхан һүмые хушалтаар хушаба, дээрэһээнь нэмэргэ хэбэ – Эзэнэй зааһаар лэ бүтээбэ.

20Моисей хэлсээнэй бэшэг абажа, ханза соо хэбэ, ханзада һургааг модонуудые бүхэлөөд, дээрэнь арюудхалгын хушалта табиба. 21Эзэнэй захирһанай ёһоор, хэлсээнэй ханзаяа майхан һүмэ соо оруулжа, хүшэгөөр хааба.

22Майхан һүмын хойто хажуудань Моисей хүшэгын урдахана шэрээ табиба, 23тэрээн дээрэ Эзэнэй үмэнэ байха хилээмэ табиба. Эзэнэй өөртэнь зааһаар лэ бүтээбэ.

24Уулзалгын майхан һүмын урда хажууда, хилээмэнэй шэрээгэй урда Моисей дэн табижа, 25зулын амһартануудые Эзэнэй урда табиба. Эзэнэй өөртэнь зааһаар лэ бүтээбэ.

26Уулзалгын майхан һүмэ соо хүшэгын урда үргэлэй алтан шэрээ табижа, 27Эзэнэй зааһаар, уталга ууюулба.

28Уулзалгын майхан һүмын үүдэндэ халхалһан хүшэгэ үлгэбэ. 29Уулзалгын майхан һүмын үүдэнэй хажууда түгэс шатаалта үргэлэй шэрээ табижа, Эзэнэй зааһаар, түгэс шатаалта үргэл хэбэ, хилээмэнэй үргэл хэбэ.

30Уулзалгын майхан һүмын ба үргэлэй шэрээгэй хоорондо угаалгын амһарта табижа, уһаар дүүргэбэ. 31Моисей, Аһароон ба Аһарооной хүбүүд 32Уулзалгын майхан һүмэдэ орохын гү, али үргэлэй шэрээдэ дүтэлхын урда тэрэ амһарта соо хүл, гараа зайладаг һэн.

33Майхан һүмын ба үргэлэй шэрээ тойруулаад, хашаа соохи юумэ түхеэрбэ, хашаагай үүдэндэ хүшэгэ үлгэбэ.

Моисей ажалаа түгэсхэбэ, 34Уулзалгын майхан һүмэ дээрэ үүлэн бууба, Эзэнэй һүр соло майхан һүмые сүм бүрхөөбэ. 35Моисей Уулзалгын майхан һүмэ руу орожо ядаба, юуб гэхэдэ, үүлэн тэрэниие далдалаа, Эзэнэй һүр соло майхан һүмые сүм эзэлээд байгаа.

Түгэсхэл

36Майхан һүмэһөө дээшээ дэгдэжэ, тэрэ үүлэнэй саашаа тамархадань, Израилиин зон замда гаража, ээлжээтэ зориһон газартаа хүрэдэг байба.

37Үүлэнэй дээшээ дэгдээгүй һаа, тэдэ һууриһаа хүдэлдэггүй, дэгдэхыень хүлеэдэг байба.

38Үдэрынь майхан һүмэ дээрэ Эзэнэй үүлэн байдаг байба, харин һүниндөө энэ үүлэн соо гал носодог байба – тэрээнииень бүхы Израиль угсаатан хараа. Тэдэнэй бүхы аян замдань хододоо тиимэ байгаа бэлэй.