‏ Exodus 6

1– Фараондо юу хэхыем харахаш даа; Минии хүндэ гарай баалалтаар удамайш зониие тэрэ табиха, табихаһаа байтагай орон нютагһаа үлдэжэ гаргаха, – гэжэ Эзэн Моисейдэ харюусаба.

Бурхан Моисейдэ даабари үгэнэ

2Тиигээд Бурхан Моисейдэ айладаба:

– Би Эзэн гээшэб! 3Абраһаамда, Исаак болон Яковта «Түгэс Хүсэтэ» гэһэн нэрээр үзэгдөө һэм, харин «Эзэн» гэһэн нэрэеэ мэдүүлээгүйб. 4Ханаһаан орондо тэдэ хэсэжэ ябагша һэн. Тэрэ орон нютагые өөһэдынь болгожо үгэхэ тухай тэдэнтэй хэлсээн баталаа бэлэйб. 5Египедэй дарлалта доро Израиль угсаатанай ёолохые мүнөө дуулажа, тэрэ хэлсээ тухай һанаандаа оруулааб. 6Израиль угсаатанда иигэжэ дуулга: «Би Эзэнби! Би таанадые Египедһээ гаргахаб, дарлалтаһаа сүлөөлхэб! Би таанадые абархаб, Минии гар һунаалгаатай, хэһээлтэм шанга! 7Таанадые Минии арад болгожо, Бурхантнай болохоб. Таанадые Египедэй дарлалтаһаа гаргаһан танай Эзэн Бурхан гэжэ һанажа ябахат. 8Абраһаамда, Исаак болон Яковта үгэхэб гэжэ тангариглаһан орон дэбисхэртэ таанадые оруулхаб, уг удамарайтнай эзэлэн һууха газар болгожо үгэхэб. Би Эзэн мүн гээшэб!»

9Энэ айладаһыень Моисей Израилиин зондо дамжуулан хэлэбэ, харин тэдэнь хүшэр ажалда диилдэжэ, зоригоо мохонхой, Моисейн үгэ шагнахашье дурагүй байба.

10– 11– Фараондо ошожо, Израиль угсаатанай орон нютагһаашни гарахыень зүбшөөгыш гэжэ тэрээндэ хэлэ, – гэбэ Эзэн.

12– Израилиин зон үгыемни дууланагүйл, хайшан гэжэ фараон минии үгэ дуулаха юм? Би үгэ хэлэндээ ахир һэмнэйб, – гэжэ Моисей хэлэбэ.

13Израиль угсаатанда ошохыень, тэдэниие Египедһээ гаргахын тула Египедэй засаг түрэ эзэлдэг фараондо ошожо айладхал хэгты гэжэ Моисей Аһароон хоёрто Эзэнэй зарлигтаһаниинь тэрэ бэлэй.

Моисей ба Аһарооной угай бэшэг

14Обогуудые ахалха хүнүүд гэбэл, иимэ байна. Израилиин ууган хүбүүн Рэүбээнэй хүбүүд Эноох ба Паллуу, Хэцроон ба Хармии гэгшэд болоно. Тэдэнһээ Рэүбээнэй обог эхи татаа юм.

15Симеоной хүбүүд Емүһээл, Ямиин, Ооһад, Яхиин, Цохаар ба ханаһаан угтай эхэнэрэй хүбүүн Саул болоно. Тэдэнһээ Симеоной обог гараһан болоно.

16Левиин хүбүүдые ахалан тоолоходо, Гэршоон, Кэһаат ба Мэрарии болоно. Левий гээшэ зуун гушан долоон наһа наһалһан гэхэ.

17Гэршооной хүбүүд Либнии ба Шимэй гэгшэд өөрын урагтай. 18Кехадай хүбүүд: Амраам ба Ицһаар, Хэброон ба Үззиһээл. Кэһаат зуун гушан гурбатай боложо наһа бараа. 19Мэрариин хүбүүд Маһлии ба Мушии.

Левиин обог гэхэдэ эдэл болоно.

20Амраам гээшэнь өөрынгөө абга эгэшэ Ёхээбэдые һамган болгожо абаһан байгаа. Тэрэ эхэнэрһээ Аһароон ба Моисей түрэһэн юм. Амраам зуун гушан долоотой болоһон гэхэ.

21Ицһаарай хүбүүд: Коорах, Нээпэг ба Зихрии.

22Үззиһээлэй хүбүүд: Мишаһээл, Элцапаан ба Ситрии.

23Аһароон Амминадаабай басаган, Нахшооной эгэшэ Элишээбые һамган болгожо абаһан юм. Тэрэнь Надааб, Абиһуу, Эльазаар ба Итамаар гэжэ хүбүүдые түрөө.

24Коорахай хүбүүд: Ассиир, Элканаа ба Абиасаап. Энэ Коорахай ураг удам гээшэ.

25Аһарооной хүбүүн Эльазаар Пүтиһээлэй басагадай нэгые абаа, тэрэнь Пинэһаасые түрөө.

Эдэ хадаа левит угай эхи табигшад болоно.

26Израилиин хүбүүдые сэрэг шэнгеэр жагсаагаад, Египедэй газарһаа гаргагты гэжэ Эзэнэй зонхилһон Аһароон Моисей хоёр болоно.

27Моисей Аһароон хоёр Израиль угсаатаниие Египедһээ гаргахын тулада фараонтой үгөөр эдилдэн тэмсэжэ байгаа бэлэй.

Бурхан Моисейдэ үшөө нэгэ даабари үгэнэ

28– 29– 30Египедтэ Моисейтэй хөөрэлдэжэ байхадаа Эзэн айладаа һэн:

– Би Эзэнби! Минии хэлэһэн бүгэдые фараондо дамжуула.

– Үгэ хэлэндээ би ахир һэмнэйб. Фараон минии үгэ дуулаха юм аал? – гэжэ Моисей зүрхэ алдан дуугараа бэлэй.