‏ Exodus 9

Табадахи хэһээлтэ: малай тахал

1Эзэн Моисейдэ айладаба:

– Фараондо ошоод иигэжэ хэлэ: Еврейнүүдэй Эзэн Бурхан: «Намда үргэл хэхыень Минии арадые табииш! 2Табяагүй, барижа байгаа һааш, 3хүдөө байгаа бүхы малдаш – моридтош, элжэгэ тэмээнүүдтэш, сар үхэртэш, хони ямаандаш – Эзэнэй хүндэ гар бууха, аймшагтай үхэл тахал эхилхэ! 4Харин Египедэй зоной малда шэнгеэр бэшэ, Израильшуудай малда Эзэн ондоогоор хандаха: нэгэшье малынь үхэхэгүй», – гэжэ айладана.

5Тиигээд энэ орон нютагта энэ үйлэ үглөө болохо гэжэ Эзэн саг гаргаба.

6Үглөөдэр үглөөнь Эзэн амалһанаа бүтээжэ, Египедэй зоной малыень хуу үхүүлбэ. Харин израильшуудай мал яабашьегүй. 7Фараон хүниие мэдэхыень эльгээбэ, тиихэдэнь, нээрээшье, Израилиин улад зоной нэгэшье мал гарза болоогүй байба. Гэбэшье үсэдөө алдабагүй, тэдэниие табибагүй.

Зургаадахи хэһээлтэ: яра эдеэрэтэй шарха

8Эзэн Моисей Аһароон хоёрто айладаба:

– Зуухаһаа дүүрэн адха үнэһэ абаад, фараоной хараһаар байтар тэнгэри өөдэ Моисей хаяг. 9Тиихэдэнь тэрэ үнэһэн Египедтэ тооһон болон орьёлжо, хүнүүдэй, мал амитанай бэедэ яра шарха гараха.

10Тэдэ зуухаһаа үнэһэ абажа, фараоной хажууда ошобо. Моисей үнэһэ тэнгэри өөдэ сасаба. Тиихэдэнь хүнүүдэй, мал амитанай бэедэнь яра эдеэрэтэй шарха гаража эхилбэ. 11Фараоной эльбэшэд Моисейтэй мүрысэжэ шадахаяа болибо: тэдэнэй, Египедэй бүхы зоной бэедэ яра шарха бии болобо. 12Гэбэшье Эзэн фараоной үсэдые хүдэлгэжэ, тэрэ үгэ дуулабагүй. Моисейдэ Эзэнэй урид айладаһаарнь лэ болобо.

Долоодохи хэһээлтэ: шанга аадар мүндэр

13Эзэн Моисейдэ зарлиг болобо:

– Үглөөдэр үглөөгүүр эртэ бодожо, фараондо ошоод иигэжэ хэлэхэш: Эзэн, еврейнүүдэй Бурхан, иигэжэ айладана: «Намда зорюулһан үргэл тахилаа бүтээхыень Минии угсаата арадые табииш! 14Энэ удаа бүришье аймшагтай хэһээлтэ шамда, түшэмэлнүүдтэш, бүхы арад зондош амасуулхам. Намтай тэнсэхэ хэншье дэлхэй дээрэ үгы гэжэ шинии мэдэхын тулада! 15Хүсэтэ гараа далайжа, шамда ба шинии албатан арадта тарбаган тахал халдахаагаа һаам, газарай нюрууһаа үгы болохо һэнта. 16Гэбэшье Өөрын хүсэ шадал шамда харуулжа, Өөрын нэрэ соло бүхы дэлхэйгээр суурхуулхын тула Би шамайе амиды үлөөнэб. 17Мүнөө болотороо Минии арадта бэрхэшээл ушаруулан, арадыемни табиха дурагүй байнаш. 18Үглөөдэр үглөө энэл сагта урдань Египет орондо үзэгдөөгүй шанга аадар мүндэр оруулхам! 19Үхэр малаа хушалта һарабша доро хорохыень суглуулаг, газаагуур задагай байһан хамаг юумэеэ хушаг гэжэ хэлэ. Газаа, хүдөөдэ үлэһэн, хушалта доро хороогүй хүн, үхэр мал мүндэртэ сохюулжа хосорхо».

20Эзэнэй үгэһөө һүрдэһэн фараоной түшэмэл ноёд яаралтай түргэн барлагуудаа, мал һүрэгүүдээ суглуулжа, гэр хушалта доро оруулба. 21Харин үгэдэнь анхараагүй ноёд зоноо, мал һүрэгүүдээ хүдөө талаһаа асарангүй орхибо.

22Эзэн Моисейдэ зарлиг болобо:

– Гараа огторгой өөдэ дэлгэн дэехэдэш, Египет орондо айхабтар шанга аадар мүндэр бууха. Тэрэ Еипедэй газар дайдаар зониие, мал, ургамал ногоо сохихо.

23Моисей дулдыгаа огторгой өөдэ дэлгэн дэебэ. Эзэнэй хүсэлөөр тэнгэри дуугаржа, сахилгаан сахилжа, залин мүндэртэ аадар орожо эхилбэ. Бүхы Египет ороноор Эзэн мүндэр буулгаба. 24Египет орондо урдань хэзээдэшье үзэгдөөгүй ехэ мүндэр оробо, сахилгаан сахилба. 25Хаа-хаанагүй хүдөө талада оройтоһон зон, мал мүндэртэ сохюулжа хосорбо. Ургамал ногоон һалаба, модо һөөгүүд хуха сохюулба. 26Гансал Гоошэн нютагта мүндэр оробогүй – тэндэ Израиль угсаатан һуудаг бэлэй.

27Фараон Моисей Аһароон хоёрые дуудажа асаруулаад хандаба:

– Энэ удаа би нүгэлтэй байһанаа мэдэрнэб; Эзэнтнай үнэниие айладаа юм байна, харин минии болон албатан арадайм буруу элирбэ гээшэ. 28Эзэндэ зальбарыш даа: тэнгэриин дуу сахилгаа, аадар мүндэр болюулаг лэ. Би таанадые бэшэ барихагүйб, ошохо тээшэтнай табихалби.

Моисей тэрээндэ иигэжэ харюусаба:

29– Хотоһоо гаран сасуу Эзэн тээшэ гараа дэлгэн дэехэдэм, тэнгэриин дуу сахилгаан, аадар мүндэр тэрэ дары болихо, газар дэлхэйдэ гансал Эзэн гэжэ мэдэхыншни түлөө тиимэ үйлэ болоно. 30Гэбэшье ши болон шинии түшэмэлнүүд Эзэн Бурханһаа үшөөл айнагүй гэжэ тухайлнам.

31Ешмээн эдеэшэжэ, маалинга үрэһэеэ гүбеэгүй байһан дээрэһээ мүндэртэ ехээр сохюулһан, 32шэниисэ болон хара таряан хожом таригдаһан шалтагһаа мүндэрһөө хохидоогүй байба.

33Моисей фараониие орхин, хотоһоо гарахадаа, Эзэн руу гараа дэлгэн дэебэ, тиихэдэнь тэнгэри дуугархаа болибо, мүндэр гансата замхаба, бороо тогтобо. 34Тэнгэриин һүрөөтэ дуун, аадар мүндэр болибо гэжэ фараон харамсаараа дахяад нүгэл хэжэ, түшэмэлнүүдтэеэ хамта үсэрхэжэ эхилбэ. 35Фараон үсэд хатуу зангаараа Израилиин зониие табиха дурагүй зандаа байба. Эзэнэй уридшалан Моисейдэ айладаһаарнь лэ болобол даа.