‏ Exodus 10

Наймадахи хэһээлтэ: таршаанууд

1Эзэн Моисейдэ айладаба:

– Фараондо ошо. Минии дүлгэ тэмдэгүүдые фараондо ба албатан зондонь үзүүлхэ зорилгоор тэрэниие эсэргүүсүүлээб. 2Египедые ямар хэһээлтээр Минии хэһээһэн тухай, гайхамшаг үзэгдэлнүүдые хайшан гэжэ Минии үзүүлһэн тухай хүбүүдтээ ба аша гушанартаа хөөрөөрэйгты! Эзэн хэн гээшэб гэжэ мэдэхынтнай тула эсэргүүсүүлээб!

3Моисей Аһароон хоёр фараондо ерээд хэлэбэд:

– Эзэн, еврейнүүдэй Бурхан, иигэжэ асуужа байна: Минии урда номгорхошни хэзээ юм бэ? Намда зорюулһан үргэл тахил бүтээхыень Минии арадые табииш. 4Табяагүй һаашни, үглөөдэр газар нютагташ таршаа шааруул тараахам. 5Газар харахаар бэшэ болотор тоогүй олон таршаа дүүрэхэ, мүндэрһөө бүтэн үлэһэн ургамал хуу эдижэ һалгаха, хүдөө ургажа байһан модо бургааһа хиргаха! 6Шинии ордондо, ноёд түшэмэлнүүдэйш, арад албатанайш гэр байшангуудта дүүрэн таршаа бии болохо. Энэ орон нютагта һууһан сагтаа үбгэ эсэгэнэршни тиимэ юумэ үзөөгүй байха.

Иигэжэ хэлээд, Моисей гэрһээ гараба.

7Фараондо түшэмэлнүүдынь хандажа хэлэбэ:

– Энэ хүнһөө боложо бидэ удаан зобохомнай гээшэ гү? Өөрынгөө Эзэн Бурханда үргэл хэхыень тэдэниие табиит, Египет хосоржо байна гэжэ харанагүй аалта?

8Моисей Аһароон хоёрые фараондо һөөргэнь дуудажа асарба.

– Ошожо, Эзэн Бурхандаа мүргэлөө хэгты. Хэнтнай ошохо болоноб? – гэжэ фараон тэдэнһээ асууба.

9– Үбгэд хүгшэдтэеэ, нарай нялхатаяа, үхи басагад, хүбүүдтэеэ булта, хамаг үхэр малаа, сар хонидоо абажа ошохо ёһотойбди, юуб гэхэдэ, энэмнай Эзэнэй тогтооһон һайндэр бшуу, – гэжэ Моисей хэлэбэ.

10– Эхэнэр, хүүгэдтэйтнай хамта би таанадые табихагүйб. Эзэншье таанадта туһалжа шадахагүй. Юундэ хүүгэдээ абаашаха гэбэт? Муу бодол сэдьхээ гээшэ хат. 11Үгы даа, гансал эрэшүүл ошожо, Эзэндэ хэхэ гэһэн үргэлөө бүтээг – тиигэжэл гуйгаа бэшэ һэн гүт? – гэжэ фараон хэлэбэ.

Моисей Аһароон хоёрые тиигээд үлдэжэ гаргаба.

12Эзэн Моисейдэ айладаба:

– Египедэй газар тээшэ гараа дэлгэн дэел даа, таршаа шумуул дахяад добтолжо, бүхы ногооень, мүндэртэ сохюулаагүй бүхы ургамалыень дууһан һалгаг.

13Моисей Египедэй газар руу дулдытай гараа дэлгэн дэебэ, Эзэн зүүн тээһээ шанга һалхи буулгаба. Бүхэли үдэртөө, бүхэли һүниндөө һалхин үлеэбэ, үглөөгүүр тээшэ үй түмэн таршаа шумуул асарба. 14Египедэй бүхы газар дайдада таршаа шумуул добтолон оробо. Урдань хэзээдэшье үзэгдөөгүй, саашадаашье хэзээшье үзэгдэхэгүй олон таршаа шумуул газар дайдые бүрхөөбэ. 15Газарай нюруу огто харагдахаяа болибо. Таршаа шумуул дайдын бүхы ногоо, бүхы модо жэмэс эдижэ һалгааба. Египет орондо ногоо набша гэхэ юумэн үгы болобо.

16Фараон яаралтай Моисей Аһароон хоёрые ерүүлээд хэлэбэ:

– Эзэн Бурханайтнай урда, танай урда би гэмтэйб. 17Үшөө дахин үршөөгыт, Эзэн Бурхандаа зальбарыт, энэ үхэлтэ үйлэ намһаа холодуулаг лэ.

18Моисей фараонһоо гаража, Эзэндэ зальбарба. 19Эзэнэй баруун зүгһөө шанга һалхи табихадань, таршаа шумуул Хулһата далай ▼
▼ Еврей угсаатан гүрэн түрэеэ иимэ хилэтэйгээр байгуулха хүсэлтэй байгаа: Хулһата далай – Улаан далай.
 тээшэ хиидэжэ һалаба. Египедэй газарта нэгэшье таршаа шумуул үлэбэгүй.

20Зүгөөр Эзэн фараониие дахяад үсэрүүлбэ, Израилиин үри һадаһадые тэрэ энэшье удаа табибагүй.

Юһэдэхи хэһээлтэ: шэб харанхы

21– Тэнгэри өөдэ гараа дэлгэн дэехэдэш, Египедэй газарта тэмтэржэ ябамаар шэб харанхы болохо, – гэжэ Эзэн Моисейдэ айладаба.

22Моисей дулдытай гараа тэнгэри өөдэ дэлгэн дэебэ, Египедэй бүхы газарта гурбан үдэрэй туршада нюдэ алдама харанхы байба. 23Хэн гэшэгүй хэнииеш хараха аргагүй байба, һууһан газарһаа хэншье бодобогүй. Харин Израилиин зоной һуудаг нютагта гэгээтэй байгаа бэлэй.

24Фараон Моисейе дуудажа асаруулаад:

– Ошогты, Эзэнээ тахигты, хүүгэдтнай тантай ябаг. Харин малтнай үлэг. Томо жэжэ илгаагүй, – гэжэ хэлэбэ.

25Моисей тархяа һэжэрбэ:

– Эзэн Бурхандамнай түгэс шатаалта үргэл үргэхэ, зооглон үргэхэ малгүйгөөр юундэ ошохо зонбибди? 26Бүхы манай мал, нэгэньшье үлэнгүй, бидэнтэй хамта ошохо, тэндэ ямар мал Эзэн Бурхандаа үргэхэеэ шэлэхэбди. Тэндэ хүрөөгүйдөө Бурханда ямар мал үргэхэеэ мэдэнэгүйлди.

27Эзэн фараоной үсэдыень хүдэлгэбэ, тэрэ дахяад табибагүй.

28– Яба саашаа, дахин намда бү ерэ. Хэрбээ ерэбэл, һүнэһөө хатаахаш, – гэжэ Моисейдэ фараон хэлэбэ.

29– Хэлэһээршнил болуужаг, бидэ хоёр бэшэ уулзахагүйбди, – гэжэ Моисей хэлэбэ.
Copyright information for BxrBBL2024