Exo 2 | BxrBBL2024 | STEP | Тэрэ сагта Левиин обогой нэгэ хүн обогойнгоо эхэнэрые һамган болгожо абаба ха.

‏ Exodus 2

Моисейн мүндэлэлгэ

1 Тэрэ сагта Левиин обогой нэгэ хүн обогойнгоо эхэнэрые һамган болгожо абаба ха. 2 Һамганиинь хээлитэй болоод, хүбүү түрэжэ, һайхан байһыень хараад, гурбан һара соо нюугаад байба. 3 Гэбэшье саашадаа нюуха аргагүй болоходонь, хулһан арагта дабирхай түрхижэ, уһанда шэнгэхээр бэшэ болгоод, нялхаяа араг соо мансытайнь хэбтүүлжэ, голой эрьедэ хулһан соо табиба. 4 Нялхын эгэшэ юун бологшо ааб гэжэ холохонһоо адаглажа байба.

5 Фараоной басаган бэеэ угаахаяа голой эрьедэ шэбэгшэнэртэеэ хамта ерэбэ ха. Хулһан соо байһан араг үлгы обёорходоо, зараса басагаяа эльгээжэ асаруулба. 6 Нээжэ харахадань, нарай хүүгэн бархиржа байба. Фараоной басаган нялхые хайрлан энхэрбэ. Еврей үхибүүн гэжэ тэрэ ойлгоо. 7 Холохонһоо хаража байһан нялхын эгэшэ фараоной басаганда дүтэлжэ хэлэбэ:

– Би ошожо, энэ нялхые хүхөөрөө танда тэнжээхэ эхэнэрые еврей эхэнэрнүүд сооһоо дуудажа асархам гү?

8 – Ошыш даа, ошо, – гэжэ фараоной басаган хэлэбэ. Басаган ошоходоо, хүүгэнэй эхыень дуудажа асарһаниинь тэрэ бэлэй. 9 Фараоной басаган ерэһэн һамганда иигэжэ хэлэбэ:

– Энэ нялхые абажа, хүхөө хүхүүлэн намда тэнжээгыш, түлөөһэ үгэхэб.

Тиигэжэ түрэһэн эхэнь нарай хүбүүе абажа тэжээбэ. 10 Хүбүүнэй томохон боложо хүдэржэхэдэ, эхэнь фараоной басаганда асарба. Фараоной басаган хүбүүе өөрын хүбүүн болгожо, «уһан сооһоо тэрэниие гаргажа абааб» гэжэ хэлэн, Моисей ^{▼▼ Моисей гэдэг еврей нэрэ өөрын үгүүлбэреэр Моше «гаргаха» гэһэн үйлын үгэтэй адлишуу.} гэжэ нэрэ үгэбэ.

Моисейн Египедһээ тэрьедэлгэ

11 Олохон жэл үнгэршэбэ, Моисей томо болоод байгаа. Нэгэтэ угайнгаа зондо тэрэ ошожо, гасаланта хүшэр ажалыень нюдөөрөө үзэбэ. Египедэй харуулшанай еврей хүниие сохижо байхыень хараба. 12 Иишэ тиишээ хараашалаад, хүнэй үгы байхадань, тэрэ египет харуулшаниие алаад, элһэндэ булаба.

13 Үглөөдэрынь баһа ерэхэдэнь, еврей хоёр хүн наншалдажа байба.

– Суг хажуудаш тулижа байһан хүниие харшалха ямар муу заяатай амитамши? – гэжэ Моисей сохигшодонь хэлэбэ.

14 – Хэн шамайе манай дээрэ ноён болгоо юм, зарга шиидхэгшээр табяа юм? Египедэй тэрэ хүниие алаһандаал адли намайе алахаяа һанаа гүш? – гэжэ тэрэ хүн урдаһаань һөөргэдэбэ.

Тэрэ үйлэ хэрэгни мэдэгдээ гэжэ Моисей ойлгоходоо, айхын ехээр айба.

15 Энэ ушар тухай дуулаһан фараон Моисейе барижа саазалха гэһэн захиралта үгэбэ. Амияа аршалха гэжэ Моисей тэрьелхэдээ, мидиан угсаатанай газарта ошоо бэлэй. Тэндэхи нэгэ худагай хажууда амаржа һуухадань, 16 эсэгынгээ хонидые уһалха гэжэ уһаар тэбшэ дүүргэхэеэ мидиан угсаатанай санаартанай долоон басагад дүтэлжэ ерэбэ. 17 Худагта ерэһэн ондоо хонишод басагадые баһажа, худагта дүтэлүүлбэгүй.

Моисей бодоод, басагадые үмөөрэн, хонидыень уһалжа үгэбэ. 18 Басагадай гэртээ бусахадань, Рэүһээл эсэгэнь асууба:

– Басагадни, яагаа түргэн бусабат мүнөөдэр?

19 – Египедһээ ерэһэн нэгэ хүн маанадые хонишодой урда үмөөржэ, уһа удхаад, хонидыемнай уһалаал, – гэжэ тэдэ хөөрэбэ.

20 – Алим тэрэ хүнтнай? Юундэ тэрэниие хээрэ орхёод ерэбэт? Дуудагтыл даа, эдеэлүүлэгты, – гэжэ тэрэ басагадтаа хэлэбэ.

21 Моисей тэрэ айлайда байха гэжэ шиидэбэ. Рэүһээл удангүй Циппоораа гэжэ басагаяа Моисейдэ хадамнаба. 22 Һамганайнгаа хүбүү түрэхэдэнь, «би хари газарта ерүүл хүн болооб» гэжэ хэлээд, хүбүүндээ Гэршоом гэжэ нэрэ үгэбэ.

23 Удаахан саг үнгэрбэ, Египедэй хан түрые эзэлжэ байһан фараоншье нүгшэбэ. Хүшэр ажалда дарагдаһан израильшууд ёоложо, туһа эрижэ, Бурханаа дуудан байгаа. Тэдэнэй ёолоон Бурханда дуулдаба.

24 Ёолооень соносоһон Бурхан Абраһаам, Исаак болон Яковтай хэлсээ баталһанаа һанаандаа оруулба. 25 Тиин Израиль угсаатан тээшэ Бурхан харасаяа шэглүүлбэ, анхаралаа хандуулба.