Exo 25 | BxrBBL2024 | STEP | Эзэн Моисейдэ зарлиг болобо:

‏ Exodus 25

Майхан һүмын хэрэгсэлнүүд

1 Эзэн Моисейдэ зарлиг болобо:

2 – Намда үргэхэ юумэ суглуулаг гэжэ Израилиин зондо зонхило. Хэн юу үгэхэ дуратайб, тэрэнээ үгэг. 3 Иимэ үргэһэн зүйлнүүдые суглуулагты: алта, мүнгэ, зэд, 4 сэнхир хүхэ, гүн улаан ба бадмаа раагын үдхэн улаан үнгэтэй ээрэһэн хилгааһа утаһа, нарин маалинга бүд болон ямаанай хөөбэр нооһо, 5 элдээд утаһан хониной арһа болон нимгэн булгайр, акаци модо, 6 зула носоохо оливын тоһо, үргэмжэлэлэй ёһо бүтээлгэдэ хэрэглэдэг тоһоной хангал бодос, уталгын хүжэ санзай, 7 эфодто ^{▼▼ Еврей санаартанай богони дэгэл.} болон энгэрэйнь гуу хүреэдэ хэхэ мана шулуу болон эрдэни шулуу суглуулагты. 8 Израиль угсаатан Намда гэжэ нангин шүтөөнэй һүмэ барюужаг, тиихэдэнь Би тэдэнэй дунда оршодог болохоб. 9 Таанад Минии байха майхан һүмэ, тэрээн соохи бүхы юумэ Минии харуулһан соо жэншэдгүй нарин бүтээхэ болонот.

Хэлсээнэй ханза яажа бүтээхэ тухай

10 Акаци модоор ^{▼▼ Сикким модон (ондоогоор Аравиин уляангир) гэжэ бүхэ шанартай модон, Ливаанай хушатай хамта һүмын барилгада тэрэниие хэрэглэдэг байгаа. Тохойн хэмжээ бараглахада, 50 см. Тус ханзын утань 112 см, үргэниинь 75 см, үндэрынь 75 см болоно.} нангин бэшэг хадагалха ханза хүүжэг: хоёр хахад тохой утатай, нэгэ хахад тохой үргэнтэй ба үндэртэй ханза байха ёһотой. 11 Газаа зосооһоонь шэжэр алтаар хушажа, шэжэр алтаар хүбөөлхэш.

12 Дүрбэн алтан сахариг хэжэ, ханзын дүрбэн хүлдэ торгоон бүхэлхэш: ханзын нэгэ хажууһаа хоёр сахариг, нүгөө тээһээнь хоёр сахариг. 13 Акаци модоор һургаагуудые хайжа, алтаар дабтан бүрижэ, 14 ханзын хоёр хажуугай сахаригуудта оруулхаш. Тэрэ һургааг модондо ханзаяа тээгээд ябадаг байхат. 15 Һургаагуудаа сахаригһаань абажа болохогүй. 16 Ханза соо Хэлсээнэй бэшэг хадагалхыетнай Би үгэхэб.

17 Ханзые хааха хабхаг сэбэр алтаар бүтээхэш; утань хоёр хахад тохойн, үргэниинь нэгэ хахад тохойн хэмжээнэй байха ёһотой. 18 – 19 Хабхагай хоёр захаарнь алтаар дабтажа, хоёр херүүбэй дүрсэ бүтээхэш. Тэдэш хабхагтай нэгэн бүхэли зүйл болохо. 20 Урда урдаһаа зогсоод, хабхаг тээшэ шэртэн, далияа дээгүүрнь дэлгэжэ байха.

21 Хабхагые ханза дээрэ табихаш, ханза соо Минии үгэһэн Хэлсээнэй бэшэг табиха болонош. 22 Хэлсээнэй ханзын хабхаг дээрэ далита херүүбүүдэй хоорондо Би шамтай уулзажа, Израилиин зондо зарлигуудаа соносхохо үедөө оршохоб.

23 Акаци модоор хоёр тохой утатай, тохой үргэнтэй, тохой хахад үндэртэй шэрээ хэхэш. 24 Сэбэр алта дабтажа, шэрээгээ хушаад, алтаар хүбөө хэхэш. 25 Захаарнь альганай шэнээн үндэр хана хээд, баһал алтаар хүбөөлхэш. 26 Дүрбэн алтан сахаригуудые хээд, шэрээгэй дүрбэн углууда хүл дээгүүрнь торгоохош. 27 Ханада няалдаһан тэдэ сахаригуудта һургаагуудые хээд, шэрээгээ үргэжэ һууриһаань хүдэлгэхэдэ болоно. 28 Шэрээ зөөхэ һургаагуудые баһал акаци модоор хэжэ, баһал алтаар бүреэрэй. 29 Мүн лэ сэбэр алтаар табаг, шанага, домбо, аяга хэхэ болонош – сэржэмдэ хэрэгтэй. 30 Тус шэрээ дээрэ Намда зорюулагдаһан хилээмэн саг үргэлжэ табижа байха ёһотойш.

31 Сэбэр алта дабтажа, модоной түхэлтэй дэн бүтээхэш. Эшэ болон һалаануудынь, һалаа дээрэ табигдаха зулын амһарта, оёортонь дэнгэй гол бариха амһарта, сэсэгэй һалаа дэльбэнүүд бүгэдэ нэгэн бүхэли болохо зэргэтэй. 32 Дэнгэй модон зургаан һалаатай байха: гурбаниинь нэгэ талаһаань, нүгөө гурбань нүгөөдэ талаһаань. 33 Зургаан һалаа бүхэндэ бүйлсын сэсэг шэнги дэльбэтэй, оёортоо булсатай гурбан аягаханууд һууха. 34 Дэнгэй оройдонь бүйлсын сэсэг мэтэ дүрбэн сэсэг байха. 35 Хоёролжон һалаанууд доро аягын һуури, нүгөө хоёр һалаа доро аягын һуури, гурбадахи хоёролжон һалаа доро баһал аягын һуури: бүхы зургаан һалаа доро тиимэ һууринууд. 36 Сэбэр алтаар дабтан бүтээһэн зулын голой амһартанууд, һалаануудынь дэнтэеэ нэгэн бүхэли байха ёһотой. 37 Зулын долоон бишыхан амһарта хэжэ, дэн дээрэ табихадаш, урдань һайнаар гэрэлтүүлхэ. 38 Зулын голой хабшуур, согой амһарта хуу сэбэр алтаар хэгдэһэн байха ёһотой. 39 Дэндэ болон тэрэнэй бүхы хэрэгсэлдэ нэгэ талаант хэмжээнэй шэжэр алта гаргашалха болохош. 40 Ойлгоорой, хада дээрэ шамда яажа харуулаа һэмбиб, тон тиимээр жэншэдгүй наряар бүтээхэ ёһотойш.