‏ Exodus 33

Израилиин хүбүүдтэ үгтэһэн Эзэнэй зарлиг

1Эзэн Моисейдэ айладаба:

– Египедһээ гаргаһан арад угсаатантайгаа эндэһээ ябагты. Хойто үеын удамдань үгэхэб гэжэ Абраһаамда, Исаагта ба Яковта тангариглаһан газар тээшэ ошогты. 2Танай урда Өөрын Эльгээмэлые ябуулжа, ханаһаан, эмоор, хээт, пэриззии, хиив ба евүүс угсаатаниие үлдэхэб. 3Һү тарагаар, бал тоһоор дэлбэржэ байһан тэрэ газарта ошогты! Би тантай ошохогүйб. Юуб гэхэдэ, үсэдһөөтнай хилэнлэн, таанадые усадхажа магадгүйб гэжэ һанан нарилнаб.

4Һүрөөтэ үгэнүүдые дуулаһан зон гэмшэлэн уйлалдаба, зүүдхэлнүүдээ бэшэ үмдэбэгүй.

5Эзэн Моисейдэ зарлиг болобо:

– Израилиин зондо иигэжэ хэлэ: «Таанар үсэд зон байнат, суг ошоо һаа, агшан зуура таанадые усадхажа магадгүйб! Шэмэглэл зүүдхэлнүүдээ бэеһээ тайлагты. Юу хэхэеэ хаража үзэхэб».

6Хорээб хадын хажууда Израилиин зон зүүдхэлнүүдээ тайлажа, бэшэ үмдөөгүй.

7Тэрэ гэһээр Моисей майхан һүмэ гэжэ нэрлэдэг майханаа хотон хүреэнһөө холуур табидаг болобо. Хэн нэгэнэй Эзэндэ хандаха гээ һаа, Моисей хүреэнһөө гаража, майхан һүмэдэ ошодог болоо һэн. 8Моисейн майхан һүмэдэ оротор өөһэдын майхангуудай хажууда зогсон харагша бэлэй. 9Ороходонь, үүлэн бахана доошоо майхан һүмын үүдэнэй хажууда буудаг, тиигээд Эзэн Моисейтэй хөөрэлдэгшэ бэлэй. 10Үүлэн бахана харамсаараа зон бултадаа майхангуудайнгаа хажууда газар эльгэлэн унадаг һэн. 11Эзэн Моисейтэй урда урдаһаа харалсан хүнтэй хөөрэлдэжэ байһан шэнгеэр хөөрэлдэгшэ һэн. Удаань Моисей хүреэндээ бусадаг, харин Моисейн туһалагша Нүүнэй хүбүүн Иисүүс майхан һүмэһөөн гарадаггүй бэлэй.

Эзэнэй найдуулга

12Моисей Эзэндэ хэлэбэ:

– Энэ арадые саашань дахуула гэжэ намда айладахыеньшье айладаат, харин намтай хэниие эльгээхэеэ зарлиглаагүйт. Минии нэрэ һананаб гэжэ намда айладаа һэнта, сэдьхэлдэм намайе тааранаш гээ һэнта. 13Тиимэ һаань, замаа мэдүүлыт, һанаандатнай таараха юумэ минии хэхын тулада Таниие ойлгохо арга олгуулыт. Эдэ зон Танайл арад ха юм!

14– Би Өөрөө тантай ябажа, шамда туһалхаб, – гэжэ Эзэн айладаба.

15Моисей Эзэндэ хэлэбэ:

– Маанадтай ошохогүй һаа, эндэһээ ябахыемнай бү баадхыт. 16Угсаата арадтаа талархажа байһанайтнай гэршэ ямар бэ? Маанадтай ябаха гээшэтнайл болоно! Тиибэл, дэлхэйн ондоо арадуудһаа бидэниие үлүү тооһонойтнай гэршэ энэ мүн лэ даа.

17Эзэн Моисейдэ харюусаба:

– Би энэ гуйлтыеш дүүргэхэб, юуб гэхэдэ, Минии һанаанда ши тааранаш, Би шамайе нэрээршни мэдэдэг болооб.

18– Һүр солоёо намда үзүүлыт! – гэжэ Моисей гуйба.

19Эзэн айладаба:

– Бүхы һайн һайханаа урдууршни гаргахаб, шинии урда Өөрын нэрэ тунхаглахаб. Хэниие үршөөлдэ хүртөөхэ гэбэл, хүртөөхэб, хэниие хайрлаха гэбэл, хайрлахаб. 20Харин Минии нюур хаража шадахагүйш. Ямаршье хүн Минии нюур хараад, амиды үлөө гэжэ байгаагүй юм.

21– Намда дүтэ энэ хабсагай дээрэ зогсохош, – гэжэ Эзэн Моисейдэ айладаба. – 22Минии һүр солын хажуугаар гарахада, хабсагайн забһарай хабшалда шамайе хоргодуулан, гараараа халхалхаб. Үнгэрһэн хойноо 23гараа абахадам, ши Намайе хойноһоом үзэхэш, нюурыем харахагүйш.