‏ Exodus 34

Шэнэ шулуун хабтаһанууд

1Эзэн Моисейдэ айладаба:

– Түрүүшынхидэл адли хоёр шулуун хабтаһа хайжа хэ. Шинии эбдэһэн түрүүшын хабтаһанууд дээрэ бэшээтэй байгаа үгэнүүдые Би тэрэ хабтаһанууд дээрэ бэшэхэб. 2Үглөөдэр үглөөгүүр бэлэн байхаш. Үглөөгүүр Синай хадын оройдо гаража, Минии урда бэеэ үзүүлхэш. 3Хэншье шамтай ябаха, хада өөдэ гараха ёһогүй. Хормойдонь малшье бэлшэхэ ёһогүй.

4Моисей урданайхидань адляар хоёр шулуун хабтаһа дархалаад, тэдэнээ гартаа баринхай, Эзэнэй захирһанай ёһоор Синай хада өөдэ гараба. 5Үүлэн бахана доошоо оробо, Эзэн тэрээн соо бууба, Моисейн урда тогтоод, алдар нэрэеэ тунхаглаба.

6Эзэн Моисейн урдуур гаран тунхаглаба:

– Эзэн, Эзэн, энэрхы, хайрлагша сэдьхэлтэй, тэсэбэри ехэтэй, үршөөлтэ ба үнэн сэхэ Бурхан! 7Үршөөл хайрань мянганшье үедэ хубилдаггүй: зэмэ, нүгэл, гэмтэ ябадал Тэрэ тэсэн даадаг. Теэд гэмтэниие гэмгүй гэхэгүй: эсэгын нүгэлэй түлөө үри хүүгэдыень, аша гушанарыень хэһээдэг!

8Моисей мэгдэн үбдэглэжэ, духаараа газар сохин 9дуугарба:

– Эзэн минии! Танай урда таарамжатай байбални, мантай ябалсыт, Эзэн минии! Энэ арад угсаатан үсэд хүжүүн, тиигэбэшье манай нүгэл болон гэмтэ хазагай ябадалые хүлисыт даа! Маанадые Өөрын үбэ эзэмшэл болгыт!

Эзэнэй израильшуудтай баталһан хэлсээн

10Эзэн харюу үгэбэ:

– Би тантай хэлсээ баталнам. Угсаата арадайш хараһаар байтар ямаршье газарта, ямаршье арадта үзэгдөөгүй гайхамшаг үзэгдэлнүүдые харуулхам! Шамайе тойроһон зон Минии, Эзэнэй, шинии түлөө хэдэг үйлэ хэрэгүүдые хаража, һүрдэн байг лэ!

11Таанадта зааһыем дууһан сахигты. Би эмоор, ханаһаан, хээт, пэриззии, хиив, евүүс угсаатаниие таанадһаа зугадуулан ябуулхаб. 12Болгоомжотой байгты, ошоһон газартатнай һуудаг зонтой хэлсээ баталжа бү байгты – тэрэтнай танда занга болохо!

13Үргэлэй шэрээнүүдыень һандаргагты, һүгэдэн мүргэдэг нангин шулуунуудыень бута сохигты, Ашэраа бурханда мүргэдэг тахилгата модонуудыень сабшан хаягты!

14Эзэнһээ ондоо бурханда һүгэдэхэ ёһогүйт! Юундэб гэхэдэ, Эзэнэй нэрэнь – Жүтөөрхэл! Өөрын юумэ нарин сахигша Бурхан гээшэ!

15Тэрэ газарай зонтой хэлсээ баталжа бү байгты. Тэдэнэй бурханда үргэл хэнэбди гэжэ забхайрхада ошожо бү байгты, ошоо һаа, үргэлһөөнь эдилсэхэ болохот. 16Тэдэнэй басагадые хүбүүдтээ һамган болгожо абабалтнай, танай хүбүүдые забхай ябадалда оруулха.

17Бурханай хүрэг хэжэ бү байгты.

18Эһээлтэгүй талханай һайндэр тэмдэглэгты: Минии зарлигтаһаар, долоон хоног соо, авиив һарада болзор болоһон сагтаа, эһээлтэгүй хилээмэ эдигты, юуб гэхэдэ, Египедһээ авиив һарада гаража ошоот.

19Эхын умайһаа унаһан түрүүшын хүбүүн ба жэжэ, бодо малай түрүүшын эрэ түл – Минии. 20Элжэгэнэй түрүүшын тугалай түлбэри хонёор үгэхэт, абаха үгы һаа, амаргал хүзүүень булгалха ушартай. Ууган хүбүүдэйнгөө түлөө түлбэри оруулдаг байхат. Хэншье Минии урда хооһон гартай ерэхэ ёһогүй!

21Зургаан үдэр хүдэлэ, долоодохи үдэртэ амарагты. Таряа тарилгын үедэ, мүн таряа хуряалгын үедэшье ажалаа зогсоожо байгты.

22Долоон хоногой – шэниисын түрүүшын ургаса хуряалгын һайндэр тэмдэглэгты. Мүн жэлэй эсэстэ Үрэ жэмэс суглуулгын һайндэр тэмдэглэдэг байхат.

23Жэлдээ гурба дахин танай эрэшүүл Минии, Израилиин Эзэн Бурханай, үмэнэ зогсохо зэргэтэй. 24Жэлдээ гурба дахин Минии, Эзэн Бурханайнгаа, урда зогсон, бэеэ харуулбалтнай, Би хари угсаатанай газар дайда таанадта үгэхэб, танай байһан газар дэбисхэрые үргэдхэхэб, хэншье танай газар булимтаран буляахагүй.

25Намда үргэл хэхэдээ, үргэлэй амитанай шуһа эһээлтэтэй талхан дээрэ дуһаажа бү байгаарайгты. Паасхын һайндэртэ үргэгдэһэн үргэлые үглөөгүүр болотор орхижо бү байгты.

26Газарһаа абтаһан түрүүшынгээ ургасын дээжыень Эзэн Бурханайнгаа гэртэ асаржа байгты. Эшэгэнэй мяха эхынь һүн соо бү шанагты.

Моисей арбан һургаалые шулуун хабтаһан дээрэ бэшэжэ абаба

27Эзэн Моисейдэ зарлиг болобо:

– Эдэ үгэнүүдые бэшэжэ аба. Энэ хадаа Минии шамтай ба Израильтай баталһан хэлсээнэй эрхэ нүхэсэл мүн.

28Моисей Эзэнтэй дүшэн үдэр ба дүшэн һүни суг байба, юушье эдингүй, юушье уунгүй. Тэрэ хэлсээнэй эрхэ нүхэсэл – Арбан һургаал шулуун хабтаһан дээрэ бэшэжэ абаба. 29Синай хадын оройһоо Моисей хэлсээнэй бэшэгэй хоёр хабтаһа гартаа баринхай бууба.

Эзэнтэй хөөрэлдэһэнэй һүүлээр Моисейн нюурһаа гэгээн туяа сасаржа байгаа, тэрэнээ Моисей өөрөө мэдээгүй ябаа. 30Харин Аһароон болон Израилиин зон тэрээнииень хараад, Моисейдэ дүтэлхэеэ зүрхэлбэгүй. 31Моисей тэдэниие дуудаба. Аһароон болон удамаршад дүтэлбэ, Моисей үгэ хэлэжэ эхилбэ. 32Удаань Израилиин бэшэ зон дүтэлөө һэн. Синай хадын оройдо Эзэнэй зарлиг болоһыень Моисей зондо гүйсэд дуулгаба. 33Удаань нюураа хушалтаар хушаба.

34Хөөрэлдэхэ гэжэ Эзэндэ дүтэлхэ бүреэ Моисей нюурһаа хушалтаяа абадаг байба. Бусахадаа, Эзэнэй зонхилһон бүгэдые Израилиин арадта дуулгадаг байба, 35тиигэхэ бүринь Израилиин арад нюурһаань сасарһан гэгээн туяа үзэдэг болобо. Харин Моисей Эзэнтэй удаадахи уулзалга болотор нюураа хушадаг байба.