‏ Exodus 36

Майхан һүмэ

1Һүмэ барихынь тулада Эзэнэй мэргэн ухаа, оюун мэдэсэ үршөөһэн Бэцалээл, Оһолиааб болон бүхы уран шадабаритан Эзэнэй зааһан соонь жэншэдгүй нарин бүтээхэ ёһотой.

2Моисей Бэцалээлые, Оһолиаабые ба Эзэнэй шадабари үгэһэн, ажал хэхэ хүсэлтэй зониие дуудаба. 3Тэдэ Моисейһээ һүмын барилгада гэжэ зоной үргэһэн зүйлнүүдые абаба. Зон шэнэ шэнэ бэлэгүүдые үглөө бүри асаржал байба. 4Һүмэ барижа байгшад тиихэдэнь ажалаа зогсоожо, 5Моисейдэ ерээд, хэлэбэ:

– Эзэнэй зарлиг болоһон ажалһаа үлүү юумэ зон асаржа байнал, яаха гээшэбибди?

6Һүмэдэ үргэл гэжэ эхэнэр, эрэшүүлшье асархаяа болиг гэжэ захиралта Моисей хүреэ соо байһан хамаг зондо дуулгахыень соносхобо. Тиин зонһоо үргэлэй юумэ абахаяа болибо: 7хүрэхөөр юумэн сугларһан, хэрэгтэй хэмжээнһээ үлүү болоһон байгаа.

8Ажалаа захалһан уран гартан майхан һүмэдэ гэжэ нимгэн маалинга бүдөөр, сэнхир хүхэ, гүн улаан ба үдхэн улаан үнгэтэй утаһаар үргэн энтэй арбан хэһэг бүд нэхэбэ; тэрээн бүхэндэнь херүүбүүдэй зураг нэхэгдэбэ. 9Далбагар бүдэй хэһэг бүхэнэй утань хори найман тохой, үргэниинь дүрбэн тохой болобо; арбан хэһэг бүдынь аб адли хэмжээнэй байба.

10Удаань таба табаар тэдэнээ холбожо оёбо. 11Захын бүдүүдэй эрмэгтэ сэнхир хүхэ түдүүлинүүдые хадаба, тиимэ түдүүлинүүдые нүгөө хэһэгэй захаар хадаба. 12Нэгэ хажууһаань табин түдүүли, нүгөө тээнь баһал табин түдүүли. 13Табин алтан тобшонуудаар тобшолжо, хоёр хэһэгээ ниилүүлжэ, майхан һүмын зосоо нэмэргэ болобо.

14Газаа нэмэргэ гэжэ ямаанай хөөбэр нооһоор үргэн энтэй арба нэгэн далбагар бүд нэхэбэ. 15Далбагар бүд бүхэнэй утань гушан тохой, үргэниинь дүрбэн тохой болобо; бүхы арба нэгэн бүдынь аб адли хэмжээнэй байгаа. 16Табыень нэгэ талын болгожо зүйбэ, зургааень нүгөө талын болгожо хамта холбобо. 17Нэгэ хэһэгэй захаарнь табин түдүүли, нүгөө тээнь баһал табин түдүүли хадаба. 18Зэдээр табин тобшо хэжэ, нэгэ нэмэргэ болгон, хоёр хубияа ниилүүлбэ. 19Утан элдэһэн хониной арһаар дээрэһээнь хушалта хэбэ, үшөө тэрээнээ нарин элдэлгэтэй булгайраар хушаба.

20Майхан һүмэдөө акаци модоор ханын хүреэнүүдые хэбэ. 21Хүреэ бүхэн утаараа арбан тохой ба үргэнөөрөө тохой хахад болобо. 22Хоёр модо хүндэлэбшөөр холбожо хэбэ. Тиигэжэ майхан һүмын бүхы хүреэнүүдые холбобо. 23Майхан һүмын урда ханада гэжэ хорин хүреэ, 24хүреэ һуулгахада мүнгөөр хэһэн дүшэн түшэг хэбэ. Тиихэдэнь хүреэ бүхэнэй хормойдо, хоёр хүндэлэбшэдэнь тулгаһан хоёр хоёр түшэг болобо. 25Һүмын ара талын хойто ханадань мүн лэ хорин хүреэ 26ба хүреэ бүхэндэнь хоёр түшэг, хамтадаа дүшэн түшэг хэбэ. 27Майхан һүмын ара талын баруун ханада зургаан хүреэ, 28ара талын углуунуудтань үшөө хоёр хүреэ хэгдэбэ. 29Тэдэнээ доогуурнь асатуулба, харин дээгүүрнь (нэгэдэхи сахариг углаха газартань) бүхэлеэр хэбэ. Тиимэ хоёр хүреэ хэгдэбэ, углуу бүхэндэнь – нэгэ нэгэ. 30Эдэ найман хүреэнүүдэй һуурида арбан зургаан мүнгэн түшэг хэжэ һуулгаба.

31Акаци модоор хүндэлэбшэнүүдые хэбэ: майхан һүмын нэгэ ханын хүреэнүүдые холбохо табан хүдэлэбшэ, 32нүгөө ханын хүреэнүүдые холбохо табан хүндэлэбшэ, ара талын баруун хана бүхэлхэ үшөө табан хүндэлэбшэ. 33Дундахи хүндэлэбшэнь ханын хоёр захаһаа хүреэнүүдые холбобо. 34Хүреэнүүдээ алтаар бүрижэ, хүндэлэбшэтэй холбохын тулада алтан сахаригуудые хэбэ. Хүндэлэбшэнүүдээ баһал алтаар бүрибэ.

35Сэнхир хүхэ, гүн улаан ба үдхэн улаан үнгэтэй утаһаар ба нимгэн маалинга бүдөөр хүшэгэ нэхэбэ; тэрээн дээрэ херүүбүүдэй дүрэнүүд нэхэгдэбэ. 36Тэрээндээ акаци модоор дүрбэн бахана бэлдэжэ, алтаар хушаба, алтан дэгээнүүдые хэжэ, дүрбэн түшэг мүнгөөр шудхажа, баханануудаа һуулгаба.

37Сэнхир хүхэ, гүн улаан ба үдхэн улаан үнгэтэй ээрэһэн утаһаар ба нарин маалинга бүдөөр майхан һүмэ руу орохо газарые халхалдаг олон үнгэтэ хүшэгэ хэбэ. 38Дэгээнүүдтэй табан бахана хэбэ, баханануудаа дээрэ-дороһоонь алтаар бүрибэ, зэдээр хэһэн түшэгүүдые һуулгаба.