‏ Exodus 4

1Моисей харюудань хэлэбэ:

– Намда этигэнгүй, үгыем дуулангүй, «Эзэн шамда үзэгдөөгүй» гэжэ зоной хэлээ һаа, яаха болонобиб?

2Эзэн Моисейһээ:

– Гарташни юун байнаб? – гэжэ асууба.

– Дулды, – гэжэ Моисей харюусаба.

3– Тэрэнээ газарта хаял даа, – гэжэ Эзэн захирба. Моисейн дулдыгаа газарта хаяхадань, тэрэнь могой болошобо. Моисей могойһоо һүрдэн тэрьелбэ.

4– Гараа һарбайгаад, һүүлһээнь бари, – гэжэ Эзэн захирба. Могойн һүүлһээ Моисейн барихадань, тэрэнь һөөргөө дулды болошобо.

5– Энэ хадаа Эзэнэй, тэдэнэй эсэгэнэрэй – Абраһаамай, Исаак ба Яковай Бурханай, шамда үзэгдэһэнэй гэршэ гэжэ зон ойлгог, – гэжэ Эзэн айладхаба.

6Эзэн үшөө захирба:

– Гараа үбэртөө хэл даа.

Моисейн гараа үбэртөө хээд абахадань, гарынь нойтон хамуу үбшэнһөө саһан мэтэ сагаан болошоод байба.

7– Дахяад гараа үбэр руугаа хэ, – гэжэ хэлэхэдэнь, гараа үбэртөө хээд, һөөргэнь абаба. Гарынь хуушан түхэлдөө оронхой, элүүр бэедэнь адли болоод байба.

8– Шамда этигэнгүй, түрүүшын дүлгэ тэмдэгтэ үнэншэнгүй байгаа һаа, нүгөөдэ дүлгэдэ үнэншэхэ ха юм; 9хоёр дүлгэдэ үнэншөөгүй, шинии үгэ дуулаагүй һаань, Нил мүрэнһөө уһа удхан абажа, эрьедэ адха. Мүрэнһөө удхаһан уһаншни хуурай газар дээрэ шуһан болошохо.

10Моисей Эзэндэ зальбарба:

– Эзэн Бурхан минии! Би үгэ хэлэндэ муу хүмби, түрэхын иимэ бэлэйб. Мүнөөшье Өөрын богоолтой хөөрэлдэжэ эхилхэдэтнай би үгэ амалхадаа ахир муулби.

11Эзэн харюудань айладаба:

– Хэлэ ама хэн хүндэ үгөө юм? Хүниие хэлэхэ хэлэгүй, али шагнаха шэхэгүй хэн болгодог бэ? Хараха нюдэтэй, али хараагүй һохор хэн болгохо шадалтай юм бэ? Би, Эзэн! 12Зай, иигээд ошо. Шинии аманһаа үгын гарахада, Би байлсахаб, юу хэлэхыешни һургахаб.

13– Эзэн Бурхан минии! Хайрлыт даа, ондоо хүниие эльгээхэ аргагүй юм гүт? – гэжэ Моисей гуйба.

14Эзэн Моисейдэ уурлан хэлэбэ:

– Левиин угай Аһароон дүүшни гэжэ байна. Үгэ хүүртээ тэрэ бэрхэ гэжэ мэдэнэм. Эндэһээ ябахадаш, урдаһаашни тэрэ ушарха, шамайе хараад, аргагүй баярлаха. 15Тэрээндэ ши бүхы юумэ ойлгуулхаш. Хэлэхэ юумээ тэрэнэй амаар хэлэдэг байхаш. Харин юумэ хэлэхэ үедэтнай Би Өөрөө байлсахаб гэжэ хэлэнэ бэшэ аалби; юу хэхыетнай Өөрөө заахаб. 16Тэрэ шинии орондо арадта хандан хэлэдэг байха, тэрэ шинии хэлэ аманшни болохо. Ши тэрээндэ Бурханиинь болохош. 17Энэ дулдыгаа гартаа бари: дүлгэ тэмдэг бэелүүлхэ мэсэ зэбсэгшни гээшэ.

Моисейн Египет руу бусалга

18Моисей хадам эсэгэ Итроодо ошожо:

– Би ябахам, Египедтэ байһан аха дүүнэртээ бусахамни. Амиды юм гү тэдэмни, ошожо харахамни, – гэжэ хэлэбэ.

– Тиигыш даа, аян замдаа һайн ябаарай, – гэжэ Итроо үреэбэ.

19Мидиан угсаатанай нютагта Моисейн байхада:

– Египет ошохо сагшни ерээ, шинии һүнэһэ бэдэрһэн хамаг зон наһа баранхай, – гэжэ Эзэн зарлиг буулгаһан байба.

20Моисей һамга, хүбүүдээ элжэгэндэ һуулгажа, Египет тээшэ зорибо. Бурханай дулдые гартаа баринхай ябаба.

21Эзэн Моисейдэ айладаба:

– Би шамда шэдитэ хүсэ үршөөбэб. Египет бусахадаа, Минии шамда даалгаһан эди шэдитэ үзэгдэлнүүдые фараоной хараһаар байтар бэелүүлээрэй. Би зорюута тэрэнэй үсэдынь хүдэлгэхэб: таанадые тэрэ табихагүй. 22Харин ши фараондо иигэжэ дуулгахаш: «Израиль ууган хүбүүмни гэжэ Эзэн айладана. 23Намда үргэл хэхыень хүбүүем табииш гэнэб, табяагүй һааш, харюу болгожо, шинии ууган хүбүүнэй ами таһалхалби!»

24Харгыдаа хоножо байхадань, Эзэн ерэжэ, Моисейн ами хороохо һэдэлгэ хэбэ. 25Циппоораа һамганиинь тиихэдэнь хурса шулуугаар хүбүүнэйнгээ бэлгэ отолжо абаад, шуһыень Моисейн хүлдэ түрхибэ. Тиигээд хэлэбэ:

– Шуһаар холбоотой эрэ нүхэрни ши мүн!

26Эзэн хажууһаань зайлаба. Шуһан холбоотой эрэ нүхэр гэжэ бэлгэ отололгын ушараар Циппоораа хэлээ болоно.

27– Моисейн урдаһаа сүл губи руу ошо! – гэжэ Эзэн Аһароондо зарлигтаба. Аһароон ошоходоо, Бурханай хадын хажууда Моисейтэй ушараад, тэрэниие тэбэрин таалаба. 28Өөрыень элшэ болгоһон Эзэнэй бүхы үгэнүүдые, зааһан дүлгэ үзэгдэлнүүдыень Моисей Аһароондо ойлгуулжа үгэбэ.

29Моисей Аһароон хоёр сугтаа ябажа, Израилиин аха захатаниие бултыень суглуулба. 30Моисейдэ Эзэнэй зарлиг болоһон бүгэдые Аһароон амалан, угсаатандаа ойлгуулба. Моисей арад зоной хараһаар байтар дүлгэ тэмдэгүүдые үзүүлбэ. 31Арад зон одоошье үнэншэбэ. Эзэн Израилиингаа хүбүүдые анхаран, ядарал зоболонгымнай хараа гэжэ дуулахадаа, тэдэ һүгэдэн хүндэлжэ, доро дохин байгаа бэлэй.