‏ Exodus 5

Моисей Аһароон хоёр фараондо анха удаа ерэнэ

1Удаань Моисей Аһароон хоёр фараондо ерээд хэлэбэ:

– Сүл губида Намда зорюулһан һайндэр хэхыень арадыем табииш гэжэ Израилиин Эзэн Бурхан гуйжа байнал.

2– Эзэн гээшэш хэн гээшэб? Юундэ би Тэрэнэй үгэ дуулажа, израильшуудые табиха болоо хүмбиб? Эзэн гэжэ мэдэхэшьегүйб, тэдэ зониие табихашьегүйб, – гэжэ фараон харюусаба.

3– Еврейнүүдэй Бурхан маанадта үзэгдөө; манай Эзэн Бурханда үргэл хэхэеэ гурбан үдэрэй зайда сүл губи руу ошохыемнай зүбшөөгыт. Үгы гэбэл, Тэрэ яра үбшөөр гү, али һэлмээр маанадые һүнөөхэл, – гэжэ Моисей Аһароон хоёр хэлэбэ.

4Фараон харюудань:

– Яаха гэжэ Моисей Аһароон та хоёр зоной тархи эрьюулэн, ажал хэрэгһээнь һаатуулха болообта?! Ажал тээшээ үтэр арилагты! 5Эдэ олон зоной ажалаа хаябал, юун болохо юм?! – гэжэ хэлэбэ.

6Тэрэл үдэртөө фараон харуулшадтаа ба хинадаг дарганартаа иигэжэ захирба:

7– Энээнһээ хойшо эдэ зондо хирпиисэдэ худхаха һолоомо үгэхэеэ болигты, өөһэдөө ябажа, һолоомо суглуулаг! 8Харин бүтээхэ хирпиисын даабарита тоо тэрэл зандаа үлэг. Урдань хэды хирпиисэ хэгшэ һэм, тэдые мүнөөш хэхэ ёһотой. Ажалынь багадаад годооролдожо, «Бурхандаа үргэл хэхыемнай сүл губи руу табигты» гэжэ хашхаралдажа байна. 9Ажалыень ехэ болгогты, хооһон үгэ хүүр шагнаха сүлөөгүй болохо.

10Харуулшад, хинагша дарганар газаа гараад, зондо соносхобо:

– Һолоомо танда үгэхэгүй гэжэ фараон захирал үгэбэ. 11Хаанаһаа олонобта, һолоомо өөһэдөө бэдэржэ суглуулагты. Харин тэды хирпиисэ бүтээхэ гэһэн урданай даабаритнай зандаа үлэнэ!

12Еврейнүүд бүхы Египет ороноор таража, һолоомо бэдэрнэбди гэжэ таряалан дээрэхи үбдэл сүбдэл түүдэг болобо. 13Үдэр бүри хэһэн хирпиисынтнай тоо урданайхида хүрэхэ ёһотой гэжэ харуулшад хашан бааладаг байба. 14Бэлэдхэдэг байһан хирпиисэеэ яахадаа хүсөөхэеэ болибот гэжэ израильшуудай дундаһаа табигдаһан харуулшадыень сохидог болобо. 15Израилиин харуулшад фараондо ерэжэ, гомдол барибад:

– Юундэ иигэжэ богоолнуудаа харшалха болобот? 16Һолоомо үгөөгүй аад, урданайнгаа хэмжээнэй хирпиисэ хэгты гэжэ маанадта, богоолнуудтатнай, захирна. Богоолнуудыетнай сохино! Танай арадта нүгэл болохо ха юм.

17– Таанад залхуут! Миин байхадаа дашуураад, «Эзэндэ үргэл хэхэеэ ошохомнай» гэлдэнэт. 18Арилагты эндэһээ, ажалаа ошожо хэгты. Һолоомо үгэхэгүй танда, яанабта, урдань хэдэг хирпиисэеэ хэхэл ёһотойт, – гэбэ фараон.

19Израилиин харуулшад үдэр бүриин ажалай хэмжээ бага болгохоёо байнагүй гэжэ ойлгоходоо, улам сүхэрбэ. 20Фараонһоо гарахадань, Моисей Аһароон хоёр тэдэниие хүлеэжэ байба. 21Харуулшад тэдээндэ гомдолоо хэлэбэ:

– Таанадһаал боложо, фараон дахуулнуудтаяа бидэниие үзэн ядадаг болоо. Маанадые алуулха гэжэ гартань зэбсэг барюулһан болонот. Таанадай юу хэһые Эзэн үзэг, таанадые шүүбэрилэг!

22Моисей Эзэндэ хандажа, иигэжэ хэлэбэ:

– Эзэн Бурхан минии, юунэй түлөө эды ехэ зоболон амасаһан зон бэ, юундэ намайе иишэ эльгээбэт? 23Фараондо ерэжэ, Танай нэрэһээ хэлэжэ эхилһээрни, бүри муухайгаар зониие харшалдаг болоол. Өөрын арад түмэниие абархын тулада Танай хэһэн юумэн алим бэ?!