Eze 10 | BxrBBL2024 | STEP | Херүүбүүдэй толгой дээгүүр агаар мандал байгаа бэлэй. Би тэрээн руу харахадам, мандал дээгүүр сапфир шулуугаар бүтээһэн хан шэрээ мэтэ юумэн байгаа һэн.

‏ Ezekiel 10

Эзэн Бурханай алдар соло нангин үргөөһөө гаран ошобо

1 Херүүбүүдэй ^{▼▼ Херүүбүүдэй – эндэ иигэжэ 1-дэхи бүлэгтэ хэлэгдэһэн далитай амитад нэрлэгдэнэ.} толгой дээгүүр агаар мандал байгаа бэлэй. Би тэрээн руу харахадам, мандал дээгүүр сапфир шулуугаар бүтээһэн хан шэрээ мэтэ юумэн байгаа һэн. 2 Маалинга хубсаһа үмдэһэн хүндэ Бурхан иигэжэ айладхаба:

– Херүүбүүд доро байһан эрьелдэгшэ сахаригууд хоорондуур орожо, аһажа байгаа нүүрһэ гар дүүрэн адхажа абаад, хото соогуур сасан хая.

Минии хараһаар байтар тэрэ хүн захиралтыень дүүргэхэеэ ошобо. 3 Тэрэнэй нангин үргөө руу ороходонь херүүбүүд үргөөгэй баруун талада зогсожо байгаа. Дотор хорёо үүлээр хушаатай һэн. 4 Эзэнэй алдар соло херүүбүүдһээ нангин үргөөгэй богоһо руу шэлжэрэн бууба. Нангин үргөө үүлээр дүүрэбэ, дотоо хашаа Эзэнэй алдарай туяа гэрэлээр ялараа һэн. 5 Херүүбүүдэй далинуудай абяае гадаа хашаа соошье дуулахаар байгаа һэн. Энэ шууяан Түгэс Хүсэтэ Бурханай хоолой мэтэ дуулдаа бэлэй. 6 Херүүбүүд доро эрьелдэгшэ сахаригуудай хоорондоһоо аһажа байгаа нүүрһэ абаха тухай захиралта Бурхан маалинга хубсаһа үмдэһэн хүндэ үгэжэ, тэрэнь сахаригуудай хоородо ороходонь, 7 тэдэ амитадай нэгэн гараа гал руу һарбайжа, тэрэ хүндэ адха гал нүүрһэ гарнуудтань хэжэ үгөө бэлэй. Тиигээд аһажа байгаа нүүрһэ абаад, хүн гаража ошоо бэлэй.

8 Херүүбүүдэй далинууд доро гарнууд байна гэжэ харагдаа һэн. 9 Мүн лэ минии харахада, херүүб бүхэнэй дэргэдэ сахариг, дүн хамта дүрбэн сахариг байгаа. Тэдэ сахаригууд молор эрдэни шулуугаар хэгдэһэн мэтээр харагдаа. 10 Тэдэ сахаригууд аб адлихан, нэгэ сахариг нүгөөдэ руу хэгдэнхэй мэтээр харагдаа һэн. 11 Тэдэ амитад хүдэлхэдөө, өөһэдынгөө эрьеһэн зүг руу ябаха аргатай, толгойнгоо хазайһан тээшэ ябажа, ябууд дундаа хойшоо эрьенгүй ябаа һэн. 12 Бүхы бэенүүдынь, нюргануудынь, гарнуудынь, далинуудынь, сахаригуудынь дууһан нюдөөр дүүрэнхэй байгаа. 13 Сахаригуудай эрьелдэхэ тушаа захиржа байгша абяа би шагнаа һэм. 14 Амитан бүхэн дүрбэн нюуртай: нэгэдэхи нюурынь бухын, хоёрдохинь хүнэй, гурбадахинь арсаланай, дүрбэдэхи нюурынь бүргэдэй нюур бэлэй.

15 Хэбаар голой эрьедэ минии харагша амитад энэл мүн һэн. Херүүбүүд агаарта дэгдэжэ, 16 саашалба, сахаригууд тэдээнтэй хамта мухарин ябаба. Ниидэхэеэ далинуудаа дэбихэдэнь, сахаригууд тэдээнтэй хамта мухарилдан ябаа һэн. 17 Амитадай тогтоходонь, сахаригуудшье тогтоно, ниидэхэдэнь, сахаригууд мүн лэ хамта ниидэнэ, юуб гэхэдэ, амитадай һүр һүлдэ тэдээндэ захиран ябаа бэлэй.

18 Эзэнэй алдар соло нангин үргөөгэй богоһо дээрэһээ хүдэлжэ, херүүбүүд дээрэ заларба. 19 Херүүбүүд далинуудаа дэбижэ, газарһаа дээшээ дэгдэн ниидэбэ. Би тэдэниие адаглан байгаа һэм. Сахаригуудшье тэдэнэй хажууда эрьелдэн ниидээ бэлэй. Тэдэ нангин үргөөгэй зүүн бартаануудай хажууда тогтобо, Израилиин Бурханай алдар соло дээгүүрнь заларан туяаран байгаа һэн. 20 Хэбаар голой дэргэдэ Израилиин Бурхан доогуур минии харагша үнөөхи тэдэл амитад эдэ мүн бэлэй. Херүүбүүд гээд би мүнөө таняа һэм. 21 Амитан бүхэн дүрбэн нюуртай, дүрбэн далитай, дали бүхэн доронь хүнэй гартал адли гарнууд байгаа һэн. 22 Тэдэнэй нюурнууд Хэбаар голой хажууда минии харагша нюурнуудтал тон адли бэлэй. Амитан бүхэн хараһан тээшээ сэхэ ябаа һэн.