Eze 11 | BxrBBL2024 | STEP | Бурханай Һүлдэ намайе үргэжэ, Эзэн Бурханай нангин үргөөгэй зүүн бартаанууд руу асарба. Тэндэ хорин табан хүниие, тэдэнэй тоодо арад түмэнэй удамаршад болохо Аззуурай хүбүүн Яазаанияае, Бэнайяа гэгшын хүбүүн Пэлаатияа гэгшэдые харабаб.

‏ Ezekiel 11

Эзэкээл удамаршадые гэмнэнэ

1 Бурханай Һүлдэ намайе үргэжэ, Эзэн Бурханай нангин үргөөгэй зүүн бартаанууд руу асарба. Тэндэ хорин табан хүниие, тэдэнэй тоодо арад түмэнэй удамаршад болохо Аззуурай хүбүүн Яазаанияае, Бэнайяа гэгшын хүбүүн Пэлаатияа гэгшэдые харабаб. 2 Бурхан намда иигэжэ айладхаба:

– Хүнэй үри Эзэкээл! Эдэ зон муу юумэ түсэблэн байдаг, хотын зондо муу зүбшэл үгэдэг. 3 Хото хадаа тогоондо адли, бидэ тэрээн соо шанагдажа байгааша мяхан гээшэбди, тогоон маанадые галһаа халхална, тиимэһээ гэр байрануудые барижал байя гэжэ тэдэ хэлэнэ. 4 Энээнэйнь түлөө ши, хүнэй үри Эзэкээл, тэдэниие гэмнэн, лүндэн таби!

5 Эзэнэй Һүлдэ намда халин орожо, улад зондо иимэ мэдээсэл дамжуулхыемни Эзэн захирба:

– Израилиин арад түмэн, таанадай нэгэ юумэ хэлэжэ байдагые, теэд ондоо юумэ сэдьхэжэ байдагые Би мэдэнэб. 6 Таанад энэ хото соо угаа олон зониие алаат, тиимэһээ үйлсэнүүд үхэһэн хүнэй бэеэр дүүрэнхэй. 7 Тиимэһээ Би, Эзэн Бурхан, таанадта иимэ юумэ дуулганаб: энэ хото шанажа байһан тогоон, шанагдажа байһан мяхан гэбэл, тэдэ алаһан зонойтнай һэенүүд болоно. Таанад эндэ байхагүйт, Би хото сооһоо таанадые гарган хаяхаб! 8 Һэлмэһээ айдаг гүт? Һэлмэ баринхай сэрэгые таанад руу асархаб! 9 Хотоһоо таанадые гаргажа, хариин зоной мэдэлдэ үгэхэб, таанадые алаха тухай шиидхэбэри гарган шүүбэрилхэб! 10 Орон нютагтатнай болоһон байлдаануудта хосорон һалахат. Тиихэдээ таанад бултадаа Намайе Эзэн гээд мэдэрхэт. 11 Гал дүлэнһөө мяха тогооной халхалдагтал хото таанадые халхалжа аршалжа байхагүй. Израилиин газар дайдада хаанашье байгаа хадатнай Би таанадые хэһээхэб! 12 Тиигээд таанад Намайе Эзэн гээд мэдэдэг болохот. Таанад эрьен тойрон ажаһуугааша үндэһэ яһатанай ёһо гуримаар ажаһуужа байгаат, Минии хуулинуудые, ёһо гуримуудые сахяагүйт.

13 Минии лүндэн табижа байха үедэ Бэнайяа гэгшын хүбүүн Пэлаатияа наһа барашаба. Би газарта нюураараа унан, иигэжэ хашхаран орилон байгаа һэм: «Халаг, Эзэн Бурхамни! Израилиин бүхы зониие дууһан хюдаха гэжэ байна гээшэ гүт?!»

Найдалай ошон

14 Эзэн намда иигэжэ айладхаа бэлэй:

15 – Хүнэй үри Эзэкээл, Иерусалимда мүнөө ажаһуугаашад сүлэлгэдэ байгааша шинии аха дүүнэр, шинии уг удам, юрэдөө, Израилиин бүхы зон тушаа иигэжэ хэлэнэ: «Эзэндэ тэдэнэй мүргэхэнь холо. Эзэмдэн байхыемнай Тэрэ энэ газар уһа маанадтал үршөөгөө бшуу». 16 Эдээндэ Минии иигэжэ айладаһые дуулга: «Би тэдэниие ондоо арадууд руу абаашан, ондоо орон нютагуудаар тараагаашье һаа, ошоһон газарнуудтань Би Өөрөө түр зуура тэдэнэй Һүмэ болооб». 17 Үшөө иигэжэ дуулгаарай: «Би, Эзэн Бурхан, таран сасааһан орон нютагуудһаа тэдэниие суглуулжа, Израилиин газар уһые үгэхэб».

18 Тэдэ бусахадаа, тэрэ газарһаа жэгшүүритэй муухай онгонуудые үгы хэн хаяха. 19 Би тэдээндэ ондоо зүрхэ, ондоо сэдьхэл үршөөхэб, үсэд шулуун зүрхыень абажа, үгэ дууламгай зүрхөөр һэлгэхэб. 20 Тиигээд тэдэ Минии хуулинуудые сахижа, Минии ёһо гуримуудые дүүргэжэ ябаха. Тэдэ Минии арад түмэн, Би тэдэнэй Бурхан болохоб. 21 Харин жэгшүүритэй муухай онгонуудта мүргэдэг зониие хэһээхэб. Энэ болбол Би, Эзэн Бурхан, айладхана мүн!

22 Херүүбүүд даляа дэбижэ, дэгдэн ниидэбэ, сахаригуудшье хажуудань эрьелдэн ябалсаа бэлэй. Израилиин Бурханай алдар соло дээгүүрнь туяаран байгаа һэн. 23 Тэрэ алдар соло хотоһоо холодожо, зүүлжээ шэглэн, хада уула дээгүүр тогтон заларба. 24 Тиигээд үзэгдэл соо Бурханай Һүлдэ намайе үргэжэ, Вавилоондо сүлэлгэдэ байгааша улад зондо абаашаа һэн. Удаань үзэгдэл үгы болошобо. 25 Эзэнэй намда харуулһые, айладхаһые би сүлэлгэдэ байгааша зондо дууһан хөөрэжэ үгөө бэлэйб.