Eze 14 | BxrBBL2024 | STEP | Эзэн Бурханай зарлиг мэдэхэеэ Израилиин нэгэ хэды ахамадууд нам руу ерэжэ, урдамни һууба.

‏ Ezekiel 14

Бурхандаа һөөргөө эрьехэ тухай

1 Эзэн Бурханай зарлиг мэдэхэеэ Израилиин нэгэ хэды ахамадууд нам руу ерэжэ, урдамни һууба. 2 Эзэн намда иигэжэ айладхаа бэлэй:

3 – Хүнэй үри Эзэкээл! Эдэ зон зүрхэ сэдьхэлээ онгонуудта зорюулжа, гэмтэ зам шэлэнхэй. Тиигээд мүнөө болоходо тэдээндэ зүбшэл үгэхэ гэжэ Намайе һанана гү? 4 Тэдээнтэй ши хөөрэлдэжэ, Минии, Эзэн Бурханай, иимэ айладхал дуулга: «Израилиин арад зоной хэн нэгэн онгонуудта мүргэжэ, Минии урда гэм үйлэдэжэ байһан аад, лүндэншэдэ ерэжэ, Намһаа зүбшэл заабари эрибэл, ямаршье харюу дуулахагүй! 5 Тэдэ онгонуудта мүргэхэдөө, Намһаа холодоо, энээниие Израилиин арад түмэн ойлгохо бэзэ гэжэ найданаб».

6 Тиимэһээ мүнөө Минии, Эзэн Бурханай, иигэжэ тунхаглаһые тэдээндэ дуулгагты: гэмээ наманшалагты, жэгшүүритэй муухай онгонуудаа орхигты. 7 Израилиин хэн нэгэнэй гү, али тэдээнтэй хамта ажаһуудаг ерүүл зоной Намһаа буруу хаража, онгонуудта мүргэжэ эхилээд, удаань Минии харюу мэдэхэеэ лүндэншэдэ ерэхэдэнь, Би тэдээндэ харюу үгэхэгүйб! 8 Би тиимэ хүнэй урдаһаа тулахаб! Тиигээд тэрэ зоной наадан, ябаган зугаа үгэ болохо, Минии арад түмэнэй дундаһаа үгы хэхэб. Тиихэдэм таанад Намайе Эзэн гээд мэдэхэт. 9 Тиихэдэ Минии нэрэһээ худал үгэнүүдые дуулгажа байгша лүндэншые Би арад түмэнэйнгөө дундаһаа үгы хэхэб. 10 Тэдэ хоюулаа хэһээгдэхэ: асуужа байгааша хүншье, худал үгэнүүдые хэлэгшэ лүндэншэшье. 11 Израилиин улад зоной Намһаа холодохогүйн, өөрыгөө элдэб муу муухай хэрэгүүдээр бузарлахагүйн тула Би иимэ юумэ хэхэб. Тэдэ Минии арад түмэн, Би тэдэнэй Бурхан байха ёһотойб. Энэ болбол Би, Эзэн Бурхан, айладхана мүн!

Нүгэлтэй улас түрын саашанхи хуби заяан тухай

12 Эзэн намда иигэжэ айладхаа:

13 – Хүнэй үри Эзэкээл! Хэрбээ ямар нэгэ улас түрын Намда урбажа, нүгэл үйлэдөө һаань, Би тэрээн руу гараа һарбайжа, эдеэ хоолыень абажа, үлэсхэлэн хооһон байдал тогтоохоб. Иигэжэ Би улад зонииень, мал адууень хюдажа эхилхэб. 14 Ной, Даниил, Иоов гэдэг гурбан хүнэй тэндэ ажаһуугаашье һаань, зүб арюун ябадалынь гансал өөһэдыень абарха. Энэ болбол Би, Эзэн Бурхан, айладхана мүн! 15 Жэшээнь, арьяатаниие тэрэ газар руу эльгээбэ гэлэйб, тэрэ зониие барижа эдин, орон нютагые хэнэйшье ябахын аргагүй аюултай болгобо гэлэй. 16 Тэндэ тэдэ гурбан хүн ажаһуугаашье хадаа, гансал өөһэдынгөө ами наһа абарха, үхи хүүгэдээшье абаржа шадахагүй, орон нютаг зэлүүд хооһон болохо. Минии амиды мүн байһантайл адляар иимэ юумэн болохо гэжэ Би баталнаб! 17 Хэрбээ Минии тэрэ орон нютаг руу дайн дажар эльгэжэ, аймшагта дайнай зэбсэгээр улад зониие, мал хюдажа эхилхэдэм, 18 тэндэ тэдэ гурбан хүн ажаһуугаашье һаа, хүбүү, басагадаашье абаржа шадахагүй, өөһэдөөл абарагдаха. Иимэ болохо гэжэ Би, Эзэн Бурхан, Өөрөөрөө тангаригланаб! 19 Хэрбээ тэрэ орон нютаг руу үбшэ хабша Минии эльгээгээ һаа, уур сухал дундаа олон зониие, мал хюдаа хадам, 20 Ной, Даниил, Иоов тэдэнэй дунда ажаһуугаашье һаа, зүб арюун ябадалаараа гансал өөһэдынгөө ами наһа абарха. Хүүгэдээшье тэдэ абаржа шадахагүй! Иимэ байха гэжэ Би, Эзэн Бурхан, Өөрөөрөө тангаригланаб!

21 Энэ хадаа Эзэн Бурханай айладхал үгэнүүд:

– Эгээл хүндэ дүрбэн хэһээлтэеэ – дайн дажар, үлэн хооһон байдал, арьяатаниие, үбшэ хабша Иерусалим руу эльгээжэ, улад зониие, мал тэндэ хюдахаб. 22 Заримашуул өөһэдынгөө хүбүү, басагадые абарха, тиигээд саашадаа тэдэнэй яажа байхые, ямар үйлэ хэрэг хэхые тэдэ өөһэдынгөө нюдөөр хараха даа! Тиихэдээ юундэ Иерусалимые хэһээһыем, тэрээн дээрэ гай тодхор татаһыем тэдэ ойлгохо. 23 Тиихэдэл таанад Минии хэһэн хэрэгүүд зүйтэй гэжэ мэдэхэт. Энэ болбол Би, Эзэн Бурхан, айладхаа мүн!