‏ Ezekiel 16

Иерусалим болбол урбагша эхэнэр мүн

1Эзэн намтай дахин хөөрэлдэбэ:

2– Хүнэй үри Эзэкээл! Иерусалимда жэгшүүрилтэ хэрэгүүдыень мэдүүлжэ хэлэ. 3Эзэн Иерусалимда иигэжэ айладхана гээд хэлэ: Шинии уг гарбал, түрэһэн тоонто нютагшни Ханаһаан нютаг болоно. Эсэгэтнай эмоор, эхэтнай хээт хүн байгаа. 4Шинии түрэн мүндэлхэдэ хэншье хүйһыеш хүндөөгүй, сэбэрлэжэ бэеыеш уһаар угаагаагүй, дабһаар үрөөгүй, мансыда орёогоогүй. 5Эдэ бүгэдын нэгыеньшье хэншье хээгүй, шамайе хайрлаагүй. Харин ши хээрэ тала руу хаягдаа бэлэйш. Юуб гэхэдэ, түрэһэн үдэрһөө эхилэн ши хэндэшье хэрэггүй болоо бэлэйш. 6Эрьен ябахадаа Би шинии өөрынгөө шуһан соо мухарин байхыеш хараа һэм. Тиигээд үхэхэ зүбшэл шамда үгөөгүй бэлэйб. 7Хээрын ногоон мэтээр шамайе эрхэ сүлөөдэ, хашан харшалангүй ургуулааб. Гоё һайхан хүхэтэй, ута үһэтэй залуу басаган болотороо ургааш. Гэбэшье үшөөл нюсэгэн зандаа байгаа бэлэйш. 8Би дахяад шамайе эрьехэдээ, инаг дуранай наһандаа ябахыеш хаража, хубсаһа-далиингаа хормойгоор нюсэгэн бэеыеш орёон хушаа бэлэйб. Минии болохош гэжэ Би тиихэдэ ехэ тангариглаад, шамтай хэлсээ баталаа һэм. 9Уһа абажа, шамайе шуһанһаа сэбэрлээб, оливын тоһо толгойдош түрхеэб. 10Угалзатуулан шэрэһэн гоё һайхан хубсаһа, эрхим арһаар оёһон гутал шамда үмдэхүүлээб, үнэтэ лентээр бэеыш орёогооб, торгон нэмэргэ дээрэш хэдэрээб. 11Ииигэжэ шамайе гоёогоод, гарташ бугааг, хүзүүндэш гоё һайхан зүүдхэл үмдэхүүлээ бэлэйб. 12Хамарай, шэхэнэй сахариг, толгойдош гоё һайхан титим бэлэглээ һэм. 13Иигэжэ ши алта, мүнгөөр гоёжо, эгээл һайхан бүд торгоор оёһон, тиихэдэ угалзатуулан шэрэһэн хубсаһа үмдэдэг байгаа бэлэйш. Эрхим шанартай гурилаар бариһан хилээмэ, зүгын бала, оливын тоһо эдидэг һэнши. Хатан мэтэ угаа гоё һайхан болоо бэлэйш. 14Дэлхэйн арад зоной дунда хаа-хаанагүй шинии гоё һайхан тушаа һураг суу тараа һэн. Би, Эзэн Бурхан, шамайе иимэ гоё һайхан болгоо бэлэйб.

15Гэбэшье гоё һайхан болоһоноо ойлгожо, хажуугааршни гарагша бүхэнтэй забхайран унтажа эхилээш. 16Үргэлэй обоонуудые өөртөө зохёон түхеэржэ, хубсаһанһаа үнгэтэ үртэһэнүүдые таһалаад, тэрэ обоонуудые гоёогоо һэнши. Тиигээд һальхай һамуу ябадал гаргажа, хурисал тэндэ үзэжэ эхилээ бэлэйш. Харин иимэ ушар тэндэ хэзээшье тохёолдохо, гараха ёһогүй байгаал! 17Минии шамда үгэгшэ алта, мүнгэн шэмэглэлнүүдые абажа, эрын дүрсэтэй онгонуудые өөртөө дархалжа, ши тэдээндэ мүргэн, 18Минии шамда үгэгшэ угалзатуулан шэрэһэн гоё һайхан хубсаһа абажа, тэдэ онгонуудта үмдэхүүлбэш, Минии шамда үршөөгшэ оливын тоһо, уталгануудые тэдэнэй урда табибаш. 19Минии шамда үршөөһэн эдеэ хоол – эрхим гурил, оливын тоһо, зүгын бала ши тэдэнэй урда хайлуулан ууюулжа, үргөөш. Би, Эзэн Бурхан, энээниие ажаглан хаража байгаа һэм. 20Намда зорюулан түрэгшэ үхи хүүгэдээшье ши абажа, тэдэ онгонуудта үргэл болгон үргөөш! Өөрөө намда урбахашни багадаад, 21Минии хүүгэдые алажа шатаажа, тэдээндэ үргэбэш! 22Иигэжэ нүгэл хэжэ, забхайран һальхайржа байха үедөө ши шараа нюсэгэн, шуһандаа зууралданхай газарта мухарижа байһан бага балшар наһаяа һанахаяашье арсааш.

23Мүнөө Би, Эзэн Бурхан, ши золгүйш гэжэ тунхагланаб! Эдэ бүхы хорон муу ябадалайнгаа удаа 24ши харгы бүхэнэй хажуугаар хурисал үзэхэ газарнуудые зохёон баряаш. 25Хажуугаар гараһан бүхэнтэй ши һальхай һамуу ябадал гаргажа, унтажа, өөрыгөө бузарлааш. Иимэ юумэ үдэр бүри хэдэг һэнши. 26Намайе сухалдуулхын тула ши Египет ороной ташаяангы хүршэнэртөө өөрыгөө дурадхан унтажа байгааш. 27Тиимэһээ Би үршөөл хайраяа шамһаа хаһажа, Пилиштын хомхой хобдог дайсадташ газар уһанайш хубиие эзэлхыень зүбшөөгөө һэм. Харин тэдэшье шинии эшхэбтэр ябадалһаа боложо жэрхэжэ байна. 28Садаха гэдэхээ болижо, Ассириин зоной хойноһоо гүйжэ, тэдээнтэй унтааш. Энээнэй удаашье ши ханабагүйш. 29Вавилооной зоной хойноһоо гүйн, тэдээнтэй унтаад, баһал ханабагүйш.

30Һанаһанаа абахын тула ямаршье арга хэрэглэн байхадаа ши угаа жэгшүүритэйш гэжэ Би, Эзэн Бурхан, айладханаб. 31Харгы бүхэндэ забхайран хурисал үзэжэ байхадаа ши бэлэг сэлэг, мүнгэ абадаггүй байгааш. Энэ болбол янхан эхэнэр байхаһаа бүри муу муухай ябадал болоно. 32Өөрынгөө үбгэнэй орондо ондоо, танигдаагүй хүнтэй хурисал үзэжэ байдаг забхай эхэнэр гээшэ ши болонош. 33Янхан эхэнэрнүүд унтаһанайнгаа түлөө мүнгэ абадаг, харин ши өөр тээшээ алишье зүгһөө ерүүлхын, тэдээнтэй унтахын тула өөрөө мүнгэ үгэнэш. 34Ши бусад янхан эхэнэрнүүдтэ орходоо ондоош. Шамтай унтахын тула хойноһоош гүйнэ бэшэ, ши өөрөө мүнгэ үгэжэ, тэдэниие шамтай унтахыень гуйнаш.

35Эзэн иигэжэ айладхана:

– Янхан эхэнэр Иерусалим, Минии айладхал шагна! 36Зондо мүнгэ сасажа, түлэжэ, удаань тэдэнэй урда нюсэгэлөөд, хурисал тэдээнтэй хэдэг байгааш. Жэгшүүрилтэй муухай онгонуудта мүргэжэ, хүүгэдээ тэдээндэ үргэн алааш. 37Тиимэһээ Би шинии дуратай амарагуудыеш, мүн шамайе үзэн ядагшадые бултыень хамта суглуулжа, шамайе тойруулан зогсоогоод, хубсаһыеш хуулан абахаб. Тиихэдэм тэдэ шинии шараа нюсэгые хараха. 38Үбгэндөө урбан, һальхай һамуу ябадал гаргаһанайш, алууршан байһанайш түлөө Би шамайе шүүбэрилхэб! Угаа ехээр уурлан, шамайе хороохо гэжэ заргада оруулан шиидхэхэб! 39Тиигээд амарагуудташ шамайе дамжуулхадам, тэдэ хурисал үзэһэн газарнуудыеш һандарган һалгааха. Хубсаһыеш тайлажа, зүүдхэлнүүдыеш саб шүүрэн абаха. Тиигээд шамайе нюсэгэн, салдаган орхихо. 40Тэдэ олониитые тухиран, шам руу үхэтэрыш шулуу шэдүүлхэ, бэеыеш һэлмээр сабшаха. 41Гэр байрануудыеш дууһан шатааха, бусад эхэнэрнүүдэй хараһаар байтар энэ хэһээлтэ шамда амасуулха. Иигэжэ Би шинии забхайрхые, мүнгэ түлэн унтадаг байхыеш болюулхаб.

42Эгээл тииһэнэйнгээ удаа Би номгоржо, уурлахаяа, хилэнтэхэеэ болихоб. 43Залуу байхадаш туһалдаг дэмжэдэг тушаам мартажа, муу муухай юумэ үйлэдэжэ, Намайе ехэ сухалдуулааш. Һальхай һамуу ябадал гарган, жэгшүүритэй юумэ хэжэ байгааш. Энээниие өөрыншни толгой дээрэ буулгажа, хэһээхэб! Энэ болбол Би, Эзэн Бурхан, айладхана мүн!

Эгэшэ дүү хоёр тушаа

44«Эхэнь ямар бэ, басаганиинь тон тиимэ байха» гэдэг сэсэн мэргэн үгэ шам тушаа, Иерусалим, зон хэлэдэг байха. 45Ши эхэдээл адлиш, үбгэеэ, үхи хүүгэдээ үзэн яданаш. Үбгэеэ, хүүгэдээ үзэн ядадаг эгэшэнэртэл адлиш. Шинии болон эгэшэ хотонуудайш эхэ гэбэл, хээт, эсэгэ гэбэл, эмоор үндэһэ яһанай зон байгаа бэлэйл. 46Шамһаа хойшоо зүгтэ һууринуудтаяа хамта оршогшо Самари болбол шинии эгэшэ мүн, шамһаа урагшаа зүгтэ һууринуудтаяа хамта оршогшо Содом болбол дүүшни мүн. 47Юрэдөө, ши тэдээнтэй адляар ажаһуугааш, тэдэнэй жэгшүүритэй үйлэ хэрэгүүдые һажаалдан хэдэг байгааш. Гэбэшье энэ шамда багадаад, ши тэдээнһээ үлүүгээр һальхайран, хэһэн хэрэг бүхэнөө тэдээнһээ бүри муухайгаар хэдэг болоош. 48Содомой болон хажуугаарнь оршодог һууринуудай улад зон шинии болон хажуугаархи һууринуудайш зоной хэһэн муу муухай үйлэ хэрэгүүдые хэзээдэшье хэжэ байгаагүй гэжэ Би, Эзэн Бурхан, Өөрөөрөө батадхан соносхоноб. 49Содом дүүшни басагадтаяа хамта дээрэлхүү зантай, элбэг дэлбэг эдеэ хоолтой, амгалан тайбан байдалтай байһан аад, ядуу байдалтай, үгытэйшүүлдэ туһалдаггүй һэн. 50Бусадһаа дээрэбди гэжэ тэдэ бэеэ тоолоод, Минии үзэн ядадаг үйлэ хэрэгүүдые хээ. Тиимэһээ харамсаараа Би тэдэниие һандаргааб.

51Таанад, Иерусалимай улад зон, Самариин зонһоо хоёр дахин үлүү нүгэл хээт. Эгэшэ, дүү болохо Самари, Содом гэгшэдһээ бүри жэгшүүритэй хэрэгүүдые ши хэжэ, шамтай зэргэсүүлбэл, хэрэгүүдэйнь долоон дээрэ, арюун байһые элирүүлбэш. 52Тиигээд мүнөө ши нэрээ хухарһанаа амасан бай. Самари, Содомдо орходоо шинии нүгэл хүндэ, тиимэһээ хэһээлтэшни хүндэ байха. Мүнөө эшэжэ улайжа, нэрээ хухарһанаа амасажа бай.

53Нэгэтэ Би Содом, Самариие хажуугаархи һууринуудтайнь хамта үргэн һэргээхэб. Мүн Би шамайешье, Иерусалим, һэргээн бодхоохоб. 54Тиихэдэм өөрынгөө үйлэ хэрэгүүдэй түлөө ши эшэхэш, Содом болон Самари шамһаа багаар нүгэл үйлэдэһэндөө баясан байха. 55Иигэжэ Содом болон Самари хажуудахи һууринуудтаяа хамта һөөргөө һэргэн бодохо. Би шамайешье, Иерусалим, һууринуудтайш хамта һэргээн бодхоохоб. 56Иерусалим, ши дээрэлхүү бардам зан гарган байха үедөө Содом тушаа хорон үгэ хэлэдэг, ехэрхэдэг бэлэйш. 57Харин мүнөө бүгэдэ шинии хорон мууе хаража ойлгоо. Араамай, Пилиштын зон, мүн тиихэдэ бусад хүршэнэршни шамайе үзэн ядажа, зэмэлэн байна. 58Өөрынгөө забхай һальхай ябадалай, жэгшүүрилтэ муухай хэрэгүүдэй түлөө ши хэһээгдэхэ ёһотойш. Энэ болбол Би, Эзэн Бурхан, айладхана мүн!

Найдал байха!

59Ши өөрынгөө хэлсээ, тангаригые эбдээш, тиимэһээ Би тон тиимээр шамда хандахаб. 60Гэбэшье залуу хонгор байхадаш шамтай баталһан хэлсээгээ Би мартахагүйб, энэ хадаа хэтэ мүнхэдөө хүсэндөө байха гээд найдуулхаб. 61Эгэшэ, дүүгээ һөөргэнь абажа байхадаа өөрынгөө хэһэн хэрэгүүдые һанажа, ши эшэхэш. Хэлсээгээр иимэ юумэ баталаагүйшье хадаа Би тэдэниие шамда басагад болгон үгэхэб. 62Хэлсээгээ һэргээн сахин байхадам, ши Намайе Эзэн гэжэ мэдэрхэш. 63Хэһэн юумыеш Би хүлисэхэб, гэбэшье ши тэдэниие мартахагүйш, үгэшье хэлэхэеэ эшэжэ байхаш. Энэ болбол Би, Эзэн Бурхан, айладхана мүн!