‏ Ezekiel 17

Хоёр бүргэд тухай һургаалта үгэ

1Эзэн намда иигэжэ айладхаа:

2– Хүнэй үри Эзэкээл! Израилиин улад зондо иимэ һургаалта үгэ хөөрэжэ үгэ. 3Минии, Эзэн Бурханай, айладхаһые тэдэнэй ойлгохоор хөөрөөрэй. Зай, мантан далинуудтай, үнгэтэ үдэнүүдтэй угаа томо бүргэд нэгэтэ Ливаан руу ниидэбэ. Хуша модоной орой тэрэ хухалаад, 4наймаашадай орон нютаг руу асаржа, нэгэ хото соонь орхибо. 5Тиигээд тэрэ Израилиин газарһаа үрэ абажа, голой эрьеэр бургааһанай ургадагтал, үрэжэлтэй, уһаар элбэг газарта таряа һэн. 6Тэрэнь ургажа, газар дээгүүр шахуу таран ургаһан һаглагар мүшэрнүүдтэй үзэмэй модон болобо. Мүшэрнүүдынь бүргэд руу харан ургана, үндэһэниинь газар доогуур холо ошоно. Үзэмэй модон олон һалаа мүшэртэй, набша намаатай бэлэй. 7Тиихэдэ мүн лэ мантан далинуудтай, олон үдэтэй үшөө нэгэ бүргэд байгаа. Тэрэ хоёрдохи бүргэдөөр уһалуулхын тула үзэмэй модон өөрынгөө үндэһэ тэрээн тээшэ хандуулжа, мүшэр һалаануудаа һунгаба. 8Теэд үзэмэй модон үрэжэлтэй һайн, уһаар элбэг газарта анханһаа хойшо таригдаатай бэлэйл. Мүшэр намаагаар элбэг, жэмэс эдеэшүүлэн, гайхамаар һайхан үзэм модон болохо бүхы эрхэ нүхэсэл тэрээндэ байгаа. 9Эзэкээл, Минии, Эзэн Бурханай, иигэжэ асууһые дуулга: энэ үзэм модон саашадаа урган байха аал? Түрүүшын бүргэд үндэһөөрнь татажа зулгааха, үзэм жэмэсыень таһалха, набша намааень, мүшэрнүүдыень таһалан һалгааха, хатаахагүй юм аал? Хүсэтэй ехэ сэрэгшье эндэ хэрэгтэй бэшэ. 10Мүнөөдөө энэ модон һэргэг, дорюун, харин элһэн сүл губиин һалхинай һалхилхада, тэрэ дары түргэн хатажа эхилхэл.

Эзэн һургаалта үгын далда удха ойлгуулна

11Эзэн намда иигэжэ айладхаа:

12– Һургаалта үгын далда удхые ойлгоо гүт гэжэ Израилиин тэрэ үсэд зонһоо асуу. Вавилооной хаан Иерусалим руу ерэжэ, Иудын хааниие түшэмэл ноёдтойнь хамта баряад, Вавилоон руу туун абаашаа гэжэ тэдээндэ дуулга. 13Иудын хаанай түрэл нэгэ хүниие шэлэжэ, тэрээнтэй хэлсээ баталжа, өөртэнь һөөргэдэхэгүй тухайнь шахаа тангариг тэрэ абаа. Тэрэ бусад хүндэтэй зониие өөр руугаа мүн лэ туун абаашаа. 14Иудын хаан түрэ соо үлөөшэ зоной өөрэйнь захиралта дүүргэжэ, орон нютагаа өөһэдын мэдэлдэ хэзээдэшье оруулхагүйн, хэлсээнэй саашадаа сахигдан байхын тула тэрэ тиигээ. 15Теэд Иудын шэнэ хаан саашадаа урдаһаань һөөргэдэжэ, моридые болон сэрэгшэдые эрин, элшэнэрээ Египет руу эльгээгээ. Харин хэлсээ иигэжэ эбдэһэн аад, тэрэ амиды мэндэ үлэхэ гү, амжалта туйлаха гү?! Үгы, хэһээгдэхэ! 16Вавилооной хаантай хэлсээ баталжа, захиралтаарнь томилогдогшо Иудын шэнэ хаан баталһан хэлсээгээ эбдэһэнэйнгээ түлөө Вавилоон орон нютагта үхэхэ гэжэ Би, Эзэн Бурхан, Өөрөөрөө тангаригланаб! 17Вавилооной сэрэгэй добтолон, хото руу нэбтэрэн орохоёо, ажаһуугшадыень алахаяа далан барижа, бүһэлүүр ханануудые бодхоожо байхадань, хүсэтэй олон сэрэгтэй Египедэй фараоншье тэрээндэ туһалжа шадахагүй. 18Өөрынгөө тангариг, Вавилоонтой баталһан хэлсээгээ тэрэ эбдээ. Иимэ хэрэг үйлэдэһэнэйнгөө түлөө тэрэ мултаржа, амиды мэндэ тэрьедэжэ шадахагүй. 19Минии нэрээр тангариглан, Минии урда хэлсээ баталһан аад, тэдэнээ эбдэһэнэйнь түлөө Би энэ хэлсээнэй хараалые өөрынь толгой дээрэ буулгахаб. Энээн тушаа Би Өөрөөрөө тангаригланаб! 20Урьха гүльмэ табижа, тэрэниие барихаб. Тиигээд Вавилоон руу абаашажа, Минии урдаһаа буруу юумэ хэһэнэйнь түлөө тэндэ шүүн хэһээхэб. 21Эрхим сэрэгынь байлдаанда алдалан унаха, амиды мэндэ үлөөшэдынь найман зүгөөр тараагдаха. Тиихэдэ Минии, Эзэнэй, айладхал ойлгохот. 22– 23Хэзээ нэгэтэ Би, Эзэн,
үндэр хуша модоной оройһоо
үнжэгэн зөөлэхэн мүшэрхэнүүдыень таһалан абаад,
Израилиин үндэр агуула дээрэ һуулгахаб.
Тэрэ гэшүүһэ олонтой
мантан хуша модон болохо,
үрэ жэмэс үгэдэг байха.
Набша намаагайнь һүүдэртэ
элдэб янзын жэгүүртэ шубууд байрлаха,
амардаг байха.
 24Хээрын бүхы модод Намайе
Эзэн гээд мэдэдэг болохо.
Үндэр модо набтар болгоноб,
набтар модо үндэр болгон ургуулдагби.
Ногооржо байгша модо хатаанаб,
хатаһан хуурай модо һагсайлган ургуулдагби.
Эзэн Би айладхабал,
тэрэнээ заабол бэелүүлдэгби!
Copyright information for BxrBBL2024