‏ Ezekiel 18

Нүгэлтэй зон хосорхо

1Эзэн намда иигэжэ хандаба:

2– Эзэкээл, Израилиин улад зон «Түрэлхидэйнь гашуун үзэм эдихэдэ, хүүгэдэйнь аманда гашуун амтан үлэнэ» гэһэн оньһон үгэ дабтадаг гү? 3Би, Дээдэ Эзэн, Өөрөөрөө тангаригланаб, энэ оньһон үгэ Израиль дотор бэшэ хэлэхэеэ болихо! 4Хүн бүхэнэй – эхэ, эсэгын, үхибүүнэйнь – ами наһан Минии мэдэлэй. Нүгэл үйлэдэгшэ хэн нэгэн өөрынгөөл хэһэнэй түлөө хосорхо.

5Үнэн зүб, үнэн сэхээр хэрэг шиидхэдэг хэн нэгэн бии гэлэй. 6Обоонуудта тахигдаһан үргэлэй хоол тэрэ баридаггүй, Израилиин онгонуудта мүргэдэггүй гэел даа. Ондоо хүнэй һамгантай унтадаггүй, һарынхияа үзэжэ байхадань һамгандаа хүрэдэггүй гэе. 7Хэнииешье дарладаггүй, бариса гэжэ абаһан юумэеэ бусаадаг, дээрмэшэлгэ, тонуул хэдэггүй, үлэн хооһон хүнтэй эдеэ хоолоороо хубаалдадаг, нюсэгэн хүндэ хубсаһа үгэдэг. 8Түрүүлхэ гэжэ мүнгэ үгэдэггүй, муу юумэ хэдэггүй, үнэн зүбөөр хэрэг шиидхэдэг. 9Захиралта, хуулинуудыем тэрэ үнэн зүрхэнһөө дүүргэдэг. Иимэ хүн зүб һайн хүн гээшэ, тиимэһээ тэрэ амиды мэндэ байха гэжэ Би, Дээдэ Эзэн, айладханаб.

10Харин энэ хүн дээрмэшэлдэг, аладаг, элдэб нүгэл хэдэг хүбүүтэй байба гэе. 11Хэдэг муу муухай юумыень эсэгэньшье оройдоо хээгүйл. Хүбүүниинь обоонуудта тахигдаһан үргэлһөө хүртэдэг, ондоо хүнэй һамгантай унтадаг, 12ядуу, үгытэй зониие дарладаг, зонһоо юумыень буляадаг, бариса гэжэ абаһан юумэеэ бусаадаггүй, онгонуудта мүргэдэг, жэгшүүрилтэ муухай юумэ хэдэг, 13мүнгэ түрүүлдэг. Иимэ хүбүүн амиды мэндэ байха аал? Үгы! Иимэ жэгшүүритэй муухай юумэ хэһэндээ тэрэ заабол хосорхо. Өөрөөл үхэлдөө зэмэтэй гээшэ.

14Харин хэн нэгэн хүбүүтэй боложо, тэрэ хүбүүниинь эсэгынгээ нүгэл хэдэгые хараад, өөрөө иимэ юумэ хэхэеэ тэбшэдэг, эсэгэеэ һажаадаггүй гээшэ һаа, 15обоонуудай үргэлһөө эдидэггүй, Израилиин онгонуудта мүргэдэггүй, ондоо хүнэй һамгантай унтадаггүй, 16хүниие дарладаггүй, барисаанай юумэ абадаггүй, дээрмэдэдэггүй, үлэсхэлэн хүнтэй эдеэ хоолоороо хубаалдадаг, нюсэгэн хүниие хубсалуулдаг, 17үгытэйшүүлые дайрадаггүй, мүнгэ түрүүлжэ байдаггүй, Минии хуулинуудые сахидаг, захиралтануудыем дүүргэдэг гээшэ һаа, эсэгынгээ гэм зэмэй түлөө тэрэ наһа барахагүй, амиды мэндэ байха. 18Эсэгэнь хүниие угаа ехээр дарлажа, дээрмэшэлжэ, бүхы зондо муу юумэ хэжэ байһанайнгаа түлөө, юрэдөө, өөрынгөөл гэм зэмэй түлөө үхэхэ. 19Гэбэшье таанад «Хүбүүниинь эсэгынгээ гэмэй түлөө юундэ хэһээгдэхэгүйб?» гэжэ асуужа болохот. Юундэб гэхэдэ, тэрэ хүбүүн үнэн зүбөөр, сэбэр сэхээр юумэ үйлэдэдэг, бүхы хуули ёһонуудыем наринаар сахидаг, тиимэһээ тэрэ амиды мэндэ байха. 20Хэн нэгэн нүгэл хэбэл, үхэхэ, харин хүүгэдынь эхэ, эсэгынгээ гэм зэмые амасахагүй, эхэ, эсэгэ хүүгэдэйнгээ түлөө хэһээгдэхэгүй. Һайн хүнэй һайн хэрэгынь өөртэнь туһалха, муу хүнэй муу хэрэгынь өөрыень тушаха. 21Хэрбээ муу хүн нүгэл хэхэеэ болижо, Минии бүхы хуулинуудые сахидаг, үнэн зүбые, сэбэр сэхые үйлэдэдэг болоо гээшэ һаа, амиды мэндэ үлэхэ, үхэхэгүй. 22Хэһэн бүхы муу хэрэгүүдынь сагааруулагдаха, сэбэр сэхэ юумэ үйлэдэһэндөө тэрэ амиды мэндэ үлэхэ. 23Би, Эзэн Бурхан, муу хүнэй хосорходо баярлана бэшэб. Тэрэнэй нүгэл хэхэеэ болижо, амиды мэндэ үлэхэдэ баярладагби. 24Үнэн зүбые үйлэдэдэг хүн үнэн зүбһөө буруу хаража, муу зоной хэдэг жэгшүүритэй муухай хэрэгүүдые хэжэ эхилээ гээшэ һаа, амиды мэндэ байха гү? Үгы! Бүхы үнэн зүб хэрэгүүдынь мартагдаха, урбаһанайнгаа, нүгэл хэһэнэйнгээ түлөө тэрэ хосорхо.

25Таанад Намайе зүб бэшэ гэжэ зэмэлнэт. Теэд шагныт, Израилиин улад зон, өөһэдынтнай хэһэн хэрэгүүд буруу, харин Минии хэрэг үнэн зүб мүн! 26Һайн хүн һайе үйлэдэхэеэ болижо, мууе хэжэ эхилээ һаа, өөрынгөө гэм зэмэй түлөө хосорхо. 27Харин муу зон һайн хэрэг үйлэдэжэ эхилбэл, абарагдаха. 28Муу хэрэг хэһэнээ тэрэ ойлгожо, тэрээнһээ зайсажа, амиды мэндэ үлэхэ, хосорхогүй. 29Энээнэй һүүлээршье таанад Намайе зүб бэшэ гээд зэмэлнэт. Израилиин улад зон, таанад өөһэдөө буруут!

30Би, Эзэн Бурхан, таанадай хүн бүхэниие хэһэн хэмээрнь шүүхэб! Нүгэлнүүдэйтнай таанадые хосороохогүйн тула муу хэрэгүүдые хэхэеэ болигты, нүгэлөө наманшалагты. 31Муу муухай юумэ өөрһөө зайсуулагты, сэбэр, арюун бодолтой, Намда үнэн сэхэ бологты. Тиигэбэл, Израилиин арад түмэн, таанад хосорхогүйт! 32Би, Эзэн Бурхан, хэнииешье үхэг гэжэ хүсэнэ бэшэб. Муу юумэ үйлэдэхэеэ болижо, амиды мэндэ байгыт!