‏ Ezekiel 19

Гашуудалай дуун

1Эзэн намда иигэжэ айладхаа:

2– Эзэкээл, Израилиин удамаршадта гашуудалай иимэ дуу дуулажа үгыш: Эхэтнай арсалан мэтэ зоригтой бэлэйл. Хүсэтэ арсалангуудай дунда тэрэ гансаараа гүлгэдөө үндын тэжээгээ. 3Тиигээд нэгэ гүлгэеэ агнаха эрдэмдэ һургаба. Тэрэнь хүниие барижа, эдижэ һураба. 4Үндэһэ яһатад тэрээн тушаа дуулажа, нүхэндэ мэхэлэн оруулжа бариба. Тиигээд тэрэниие дэгээгээр шэрэжэ, Египет орон руу абаашаба. 5Эмэ арсалан хүлеэжэ сүхэрөөд, найдалаа гээһэнээ мэдэхэдээ, нүгөөдэ гүлгэеэ һургажа, тэрэнь хүсэтэй арсалан болобо. 6Бусад арсалангуудтай хамта тэрэ агнажа ябадаг бэлэй. Олзо барижа, хүниие барин эдижэ тэрэ һураба. 7Бүхэлэгдэһэн самхагуудые, хотонуудые тэрэ һандаргаа, архираан дуунһаань орон нютагай зон айжа тэрьедэдэг һэн. 8Тиихэдэнь бүхы талаһаа үндэһэ яһатад тэрэнэй урдаһаа хамтаржа, урьха тор табиба, иигэжэ арсалан нүхэндэнь орожо баригдаа бэлэй. 9Дэгээгээр хамһан, тэрэниие тор руу оруулаад, Вавилооной хаанда абаашаба. Иигэжэ тэрэ хэрэмдэ хаагдажа, оог дууниинь Израилиин хадануудаар бэшэ дуулдахаяа болёо бэлэй. 10Шинии эхэ болбол уһанай дэргэдэ һуулгаһан үзэмэй модон мэтэ бэлэйл. Билтарма ехэ уһатай газарта байһандаа тэрэ жэмэс олонтой, һагсагар гэшүүһэ, мүшэрнүүдтэй һэн. 11Гэшүүһэдынь хүсэтэй, хаашуулай баяг болохоор ургажа байгаа. Бусад мододһоо тэрэ үндэр, харахада, олон набша намаатай, һаглагар үндэр бэлэйл. 12Харин Би уур хилэнтэжэ, тэрэниие газарһаань һуга татан газарта хаябаб. Элһэн сүл губиин халуун һалхин жэмэсынь хатаагаа. Хүдэр гэшүүһэдынь хатажа, галда шатаагдаба. 13Тиигээд энэ модон хуурай элһэн сүл губида һуулгагдаа. 14Мүшэрһөөнь гал гаража, гэшүүһэдынь, жэмэсынь дууһан шатаба. Иигэжэ хүдэр гэшүүһэд, мүн тиихэдэ хаанай баягшье бэшэ байхаа болёо һэн.
Copyright information for BxrBBL2024