‏ Ezekiel 2

Эзэн Эзэкээлые лүндэншэ болгон шэлэбэ

1Тэрэ иигэжэ намда айладхаа: «Хүнэй үри Эзэкээл, бодо! Би шамтай хөөрэлдэхэм». 2Тэрэнэй дуугаржа байхада, Бурханай Һүлдэ нам руу халин орожо, хүл дээрэм намайе бодхообо. Тиигээд айладхалыень саашань дуулаа һэм:

3– Хүнэй үри Эзэкээл, Би шамайе Израилиин арад түмэн руу эльгээхэм. Тэдэ Минии урдаһаа эсэргүүсэн бодоо, буһалгааша зон даа. Үбгэ эсэгэнэртээ адли тэдэ урбагшад гээшэл. 4Үсэд, шулуун хатуу зүрхэтэй тэдээн руу шамайе Минии, Бүгэдын Эзэнэй, айладхал дуулгахыень эльгээхэм. 5Зүрилдөөтэй тэдэнэр шамайе шагнана гү, али үгы гү, юрэдөө, өөһэдынь хоорондо Бурханай захяа дуулгаһан лүндэншын байһые тэдэ мэдэдэг болохо. 6Харин ши, хүнэй үри Эзэкээл, тэдэнһээ, үгэнүүдһээньшье бү ай. Тэдэнэй хадхан харшалаашье хадань, доромжолоошье һаань, хорото могойнуудай дунда байһандал шамда болоошье һаань, тэдэ зүрилдөөтэ зонһоо бү ай, үгэ хүүрһээнь бү һүрдэ. 7Дуулаа, үгышье һаань, Минии үгэнүүдые тэдээндэ дамжуула. Зүрилдөөтэй зон гээд бү мартаарай. 8Ши, хүнэй үри Эзэкээл, Минии айладхалые шагна. Тэдээндэл адли үсэд бү боло. Амаа нээгээд, Минии үгэжэ байгаашые эди.

9Тиигээд минии харахада, нам руу гарынь һунгаатай, гар соонь хуйламал бэшэг байба. 10Тэрэнэй энэ бэшэг минии урда дэлгэхэдэнь, хоёр тээһээ тэрэ бэшэгдэнхэй, гашуудал, уйлаан, зоболон тэндэ бэшээтэй байгаа һэн.
Copyright information for BxrBBL2024