‏ Ezekiel 20

Израилиин улад зониие һэргылхэ тухай

1Израилиин арад зоной Вавилоон руу баряанда туугдан абаашагдаһанай удаа долоодохи жэлэй үнгэржэ байхада, табадахи һарын арбанда Израилиин ахамадуудай зариманиинь намда ерэжэ, Эзэнэй дура хүсэл асуун, минии урда һууба.

2Эзэн намда иигэжэ айладхаа бэлэй:

3– Хүнэй үри Эзэкээл! Эдэ ахамадуудтай хөөрэлдэжэ, Минии хүсэл тушаа мэдэхэеэ һанаа гүт, ямаршье харюу таанарта үгэхэгүйб гэжэ Минии, Эзэн Бурханай, Өөрөөрөө батадхан айладхаһые дуулга. 4Тэдэниие һэргылхэеэ һанана гүш, хүнэй үри Эзэкээл? Үбгэ эсэгэнэрэйнь жэгшүүрилтэ муухай үйлэ хэрэгүүд тухай һануулаарай. 5Минии, Эзэн Бурханай, Израилиие Өөрын арад түмэн болгон шэлэһэн, Египет орон нютагта тэдээндэ Өөрыгөө харуулжа, өөһэдынь болон үри һадаһадайнь Бурхан болохоб гэжэ Яковай обогто тангариг үргэһэн тухайм тэдээндэ дуулгаарай. 6Эгээл тиихэдээ тэдэниие Египедһээ гаргажа, өөһэдтэнь гэжэ шэлэһэн орон нютаг руу абаашахаб гээд тангариглаа һэм. Тэрэ газар нютаг һүөөр, зүгын балаар дэлбэржэ, бусад газарнуудһаа эгээл һайханиинь бэлэй. 7Жэгшүүрилтэй муухай онгонуудаа хаяжа, Египедэй бурхадта мүргэхэеэ, бэеэ бузарлахаяа болигты гэжэ Би тиихэдэ тэдээндэ захираа һэм. 8Теэд тэдэ намда һөөргэдэжэ, үгыем дуулахаяа арсаба. Жэгшүүрилтэ муухай онгонуудта, Египедэй олон бурхадта тэдэ мүргэһөөр зандаа бэлэй. Уур сухал дундаа Би тэдэниие үшөө Египедтэ байхадань хэһээлтэ амасуулхаяа һанабаб. 9Теэд Би тиибэгүйб, юуб гэхэдэ, тэдэнэй хажуугаар тиихэдэ ажаһуугааша үндэһэ яһатадай дуулаһаар байтар Израилиие Египет орон нютагһаа гаргахаб гэжэ соносхоо бэлэйб. Нэрэеэ гутаахагүйн тула Би тиимэ юумэ үйлэдэбэгүйб.

10Иигэжэ Би тэдэниие Египедһээ гаргажа, элһэн сүл губи руу абаашаа һэм. 11Хуули ёһонуудаа, зарлигуудаа тэдээндэ дамжуулхадам, тэдэ яагаад ажаһуубал зүб гээшэб гэжэ мэдэдэг болобо. 12Би, Эзэн, тэдэниие Өөртөө зорюулааб гэжэ эли байхын тула Намтай баталһан хэлсээнэй дүлгэ тэмдэг болгон Би тэдээндэ субботые тогтоогооб. 13Харин Израилиин улад зон элһэн сүл губида Намда һөөргэдэбэ. Хуули ёһонуудыем, зарлигуудыем тэдэ сахибагүй. Субботын үдэрыем ехээр бузарлаба. Тиихэдэнь Би байһан газартань, элһэн губида, тэрэ дары Израилиин арад түмэниие үгы хэхэеэ һанабаб. 14Гэбэшье Израилиин улад зониие Египедһээ гарган абаашажа байһыем хараһан үндэһэ яһатадай урда Нэрэеэ гутаахагүйн тула Би тиимэ юумэ хээгүйб.

15Тэрэнэй орондо юумээр элбэг-дэлбэг эгээл һайхан газар нютаг руу таанадые оруулхагүйб гэжэ элһэн губи дотор Би тэдээндэ тангариглаа һэм. 16Юундэ тиигээбиб гэхэдэ, тэдэ Минии зарлигуудые, хуули ёһонуудыем дүүргээгүй, субботонуудыемни бузарлаа, хамаг сэдьхэл бодолоороо онгонуудта мүргэхэ гэжэ зүдхөө. 17Гэбэшье Би тэдэниие хайрлажа, 18Эсэгэдээл адляар юумэ бү үйлэдэгты, хойноһоонь һажаалдажа бү байгты, онгонуудтань бү мүргэгты гэжэ Би үхи хүүгэдые һэргылээ һэм.

19Тэдэнэй Эзэн Бурхан байһан тушаа, Минии захиралтануудые, хуули ёһонуудые сахин дүүргэдэг байха тухайнь Би һануулбаб. 20Маанадай хоорондохи хэлсээнэй дүлгэ тэмдэг байхын тула, Намайе өөһэдэйнь Эзэн Бурхан гэжэ хододоо һанадаг байхынь тула субботын үдэр жэншэдгүй сахихыень захирааб. 21Теэд үхи хүүгэдынь мүн лэ Минии урдаһаа һөөргэдэбэ. Минии хуули ёһо, захиралтануудыем дүүргэхэеэ татагалзаба, субботын үдэрые сахингүй байба. Эдэ бүгэдые хэжэ байгаа гээшэ һаа, тэдэ амиды мэндэ байха һааб даа. Зай, тиигээд Би уурлан сухалдажа, тэдэниие элһэн сүл губида хюдаха гэжэ һанаа һэм. 22Гэбэшье тиибэгүйб. Египедһээ Израилиин улад зониие гарган хүтэлжэ ябаашыем хаража байһан үндэһэ яһатадай урда нэрэ хүндэеэ бузарлахагүйн тула Би бэеэ баряа һэм.

23Иигээд элһэн сүл губида ондоо шахаа тангариг үргэбэб, үндэһэ яһатадай дундуур тэдэниие тараан сасахаб гэжэ тангариглаа бэлэйб. 24Минии хуули ёһонуудые, захиралтануудые дүүргэдэггүй, субботын үдэрые сахидаггүй, үбгэ эсэгэнэрэйнгээ дархалһан онгонуудта мүргэдэг байһанайнь түлөө Би тэдээнтэй иимээр хандаха гэжэ һанаа һэм. 25Ами наһанай орондо үхэл хатал асардаг хуули ёһонуудые тэдээндэ үгэбэб. 26Жэгшүүрилтэй муухай үргэлнүүдые, тэрэ тоодо ууган хүбүүдээ үргэл болгон үргэхые Би тэдээндэ зарлан байгааб. Энэ хадаа тэдээндэ хэһээлтэ ушаруулха, Минии Эзэн байһые тэдээндэ гэршэлхэ ёһотой бэлэйл.

27Хүнэй үри Эзэкээл, Минии, Эзэн Бурханай, иигэжэ айладхаһые Израилиин арад түмэндэ дуулга. Тэдэнэй үбгэ эсэгэнэрынь Намда урбажа, доромжолоо һэн. 28Үгэхэб гэжэ тангариглан найдуулһан газар руу Би тэдэниие асарааб, харин тэдэ обоо бүхэн дээрэ, һаглагар модон бүхэн доро тахил үргэжэ, үзэмэй дараһан архи үргэжэ, санзай ууюулжа байгаа.

29Ямар обоонууд руу, хайшаа ошожо мүргэнэбта гэжэ Би тэдээнһээ асуубаб. Тахилта газарнууд гээд тэдэ харюусаа. Мүнөө болотороо иимэ нэрэтэй зандаа. 30Үбгэ эсэгэнэрэйнгээ жэшээ дагажа, жэгшүүрилтэ муухай онгонуудтань юундэ мүргэнэбта гэжэ Намайе, Эзэн Бурханиие, айладхана гээд Израилиин улад зондо дуулга. 31Онгонуудта бэлэг сэлэг, үнгэрхэдөө, өөрын үхи хүүгэдые үргэжэ, өөһэдыгөө бузарлаад, мүнөө болоходо Минии хүсэл, түсэб мэдэхэеэ һананат. Ямаршье харюу таанадта үгэхэгүйб гэжэ Би, Эзэн Бурхан, амиды мэндэ байһаараа тангариглан соносхоноб.

32Бусад үндэһэ яһатадтал, уг угсаатанда адли боложо, модо, шулуугаар бүтээһэн онгонуудта мүргэжэ, һайн байхабди гэжэ тэдэ һанана. Теэд иимэ юумэн хэзээшье бүтэхэгүй!

33Шанга гараараа, бүхы хүсэ шадалаараа Би таанадые зонхилон байхаб гэжэ Би, Эзэн Бурхан Өөрөөрөө батадхан тунхагланаб. Таанад Минии уур хилэнгые одоо мэдэрхэт. 34Тараһан газарнуудһаатнай таанадые суглуулхадаа, Өөрынгөө хүсэ шадалые, уур хилэнгые харуулхаб. 35Арадуудаар хүреэлөөтэй элһэн сүл губи руу асархадаа, Би таанадтай улаан нюураараа уулзалдажа, зарга шүүбэри ябуулхаб. 36Египедэй хажуугаархи элһэн сүл губида таанадай үбгэ эсэгэнэрые хэһээһэндэл Би таанадые хэһээхэб.

37Таанадые наринаар хинажа, хэлсээ сахихыетнай баадхахаб. 38Минии урдаһаа һөөргэдэгшэдые Би таанад сооһоо илгажа, баряанда байгша орон нютагһаань гаргаашье хадаа Израилиин газар руу оруулхагүйб. Тиихэдэм таанад Намайе Эзэн Бурхан гээд мэдэрхэт.

Израилиин улад зон Эзэндээ эрьехэ

39Израилиин арад түмэн, онгонуудтаа мүргөө хадаа мүргэжэл байгты! Тэдээндэ бэлэг-сэлэг үргэжэ, Минии нэрэ гутаажа байхыетнай тииһээр Би болюулхаб! Миниил захиралта дууладаг болохот. 40Израилиин үндэр нангин Сион хада дээрэ Израилиин бүхы арад түмэн Намда мүргэдэг байха. Би таанадые Өөрын арад гэжэ абажа, асарһан бэлэгүүдыетнай, эдеэнэй дээжые, нангин үргэлнүүдыетнай абан хүлеэн байхаб. 41Тараһан газарнуудһаатнай таанадые суглуулан асархадаа, Би үргэлэйтнай аятай үнэрые таашааһандал таанадые таашаан байхаб. Тиигэжэ бусад арадуудай нюдэн дээрэ таанадтай хэһэн үйлэ хэрэгээрээ Би нангин байдалаа элирхэйлхэб. 42Үбгэ эсэгэнэртэтнай тангариглан найдуулһан Израилиин газар уһан руу таанадые оруулхадам Намайе Эзэн гээд таанад мэдэрхэт. 43Тиихэдэм өөрынгөө үйлэдэһэн хэрэгүүдые, өөһэдыгөө бузарлажа байһанаа һанажа, иимэ муу муухай юумэ хэһэндээ өөһэдһөө жэрхэжэ эхилхэт. 44Муу муухай хэрэгүүдэйтнай түлөө таанадые хэһээхэ хэрэгтэй. Гэбэшье Би нэн түрүүн энээнэй түлөө бэшэ, Өөрынгөө нэрэ хүндэ хаража таанадые хэһээхэб. Тиихэдэм Намайе Эзэн Бурхан гээд таанад ойлгохот.

Урда зүгһөө гал дүлэн соробхилхо

45Эзэн намда иигэжэ айладхаба:

46– Хүнэй үри Эзэкээл! Урда зүг руу эрьежэ, ой модые һэргылэн лүндэн таби. 47Түймэр табихадам, ногооржо байгаашашье, хуурайшье модон бүхэн галда абтаха, хэншье, юуншье тэрэ түймэрые саража шадахагүй, юуб гэхэдэ, урда зүгһөө эхилээд, хойто зүг хүрэтэр гал бүхыдөө соробхилон үргэлжэлхэ гэжэ Минии, Эзэн Бурханай, айладхаһые урда зүгэй ой модондо соносхо. 48Минии, Эзэнэй, тэрэ түймэр табиһан, мүн тиихэдэ сарагдахагүй тухайнь амитан бүхэн ойлгохо.

49Харин би харюусабаб:

– Эзэн Бурхан! Намайе энээнһээ зайсуулыт даа! Таабари хододоо хэлэнэ гээд зон нам тушаа хэлэжэ эхилээл.