‏ Ezekiel 21

Эзэн һэлмэеэ далайн ерэхэл

1Эзэн намда иигэжэ айладхаба:

2– Хүнэй үри Эзэкээл! Иерусалимай мүргэлэй газарнуудые гэмнэн буруушаан хэлэ. Израилиин улад зониие һэргылэ. 3Минии тэдэнэй урдаһаа тулахаяа, һэлмэеэ хуйһаань һугалаад, һайн, муушье зониие бултыень хюдахаяа байһан тухайм дуулга. 4Урда зүгһөө хойто зүг хүрэтэр бүхы амитаниие һэлмэм усадхаха. 5Һэлмэеэ хуй руу һөөргэнь хэхэгүй тухайм амитан бүхэн ойлгохо.

6Харин ши, хүнэй үри Эзэкээл, тэдэнэй хараһаар байтар ташаагаа шабхада, гай гасаланда абтан шангаар ёоло. 7Тэдэнэй шамһаа «Юундэ ёолонобши?» гэжэ асуухада, зүрхэ алдахуулха, гар һуларуулха, зориг мохоохо, үбдэг шэшэрүүлхэ аймшагтай юумэнэй болохоёо байһан тухай мэдээтэйб гээд хэлэ.

8Эзэн намда иигэжэ айладхаба:

9– Хүнэй үри Эзэкээл! Лүндэн табижа, һэлмэ, һэлмэ хурсадуулагдаа, мэлигдээ гэжэ зондо дуулга: 10Таанадые алахын тула тэрэ хурсадхагдаа,
сахилгаан мэтэ ялаганахын тула мэлигдээ.
Хэншье бү баярлаг,
юуб гэхэдэ, хүн бүхэнтнай
һэргылэлтэнүүдыем анхараагүй, тоогоогүй.
11Гартаа абахаяа һэлмэ хурсадхуулааб,
мэлигэр болгуулааб.
Зониие алахаар тэрэ бэлэн болоо.
12Хүнэй үри Эзэкээл,
шангаар орилон бархиран бай,
тэрэ һэлмэ Минии арад түмэн руу,
Израилиин удамаршад руу далайгаатай.
Тэдэ үхэхэл!
Толгойгоо шаан шаналыш.
13Өөрынгөө зониие шалгажа байнаб,
тэдэ Намайе оройдоошье тогтоожо шадахагүй.
Энэ болбол Би, Эзэн Бурхан, айладхаа мүн!
14Хүнэй хүбүүн Эзэкээл,
ши арад зониием һэргылэ.
Илаһандам альгаа ташагты гээд хэлэ.
Алуурта һэлмэмни дахин-дахин сабшаха,
энэ хадаа тэдэниие хүреэлһэн,
агууехэ алалсаанай һэлмэ мүн!
15Тэдэ зоригоо мохожо,
бүри олоор алдалан унаха.
Сахилгаан мэтэ ялалзаһан,
алахаар бэлэн Минии һэлмэ
хотын бартаа бүхэндэ хүлеэн байха.
16Минии һэлмэ!
Эриингээ эрьеһэн зүг бүхэн руу –
барууншье, зүүншье талаар,
сабшан бай!
17Тиигээд Би уурлаха хилэнтэхэеэ болижо,
илалтадаа альгаа ташан байхаб.
Энэ болбол Би, Эзэн, айладхаа мүн!

Вавилооной хаанай һэлмэ тушаа

18Эзэн намда иигэжэ айладхаба:

19– Хүнэй үри Эзэкээл, Вавилооной хаанай һэлмэ далайн ябаха хоёр харгы ойндоо зураглаад үзэ. Тэдэ харгынууд нэгэл орон нютагһаа гаран эхилхэ ёһотой. Харгын асатаһан газарта тэмдэг таби. 20Аммооной ниислэл хото Раббаа руу, тиихэдэ Иудын хан түрын ниислэл хото Иерусалим руу ошоһон харгы замуудые ойндоо оруула. 21Вавилооной хаан харгын һалаа дээрэ зогсожо, годлинуудые һэгсэрэн, онгонуудые асуун, үргэлдэ гэжэ гаргаһан хониной эльгэ шэнжэлэн, ямар харгыгаар ошохоёо шиидэжэ байна. 22Баруун гартань «Иерусалим руу» гэжэ зааһан дүлгэ тэмдэг дайралдаха. Тиихэдэнь тэрэ байлдаа эхилхэ тухай захиралта хашхаран үгэжэ, хотын бартаа, ханануудай дэргэдэ далан бодхоохо, хэрэм, ханануудые эбдэхэ тухай захирха.

23Теэд Иерусалимай улад зон хэлсээ тангариг хэһэнээ һанажа, энээндэ этигэхэеэ арсаха. Гэбэшье Вавилооной хаан тэдэнэй гэм зэмэ тухай һануулжа, диилдэн баригдаха тухайнь хэлэхэ. 24Минии, Эзэн Бурханай, иигэжэ айладхаһые дуулгагты: таанад өөһэдынгөө зэмэтэйе мэдэржэ, бүгэдэдэ тэрэнээ эли болгон хөөрэнэт. Гэмтэ ябадалаа, үйлэдэһэн нүгэлөө бултанай урда мэдүүлнэт. Тиимэһээ таанад баригдан, баряанда ошохот.

25Харин ши, Израилиин эртэнһээ үхэһэн гэхэдэ болохо, муу муухай удамарша! Хэһээлтыншни һүүлшын саг ерээ. 26Малгайгаа аба, титимээ тайла, саашадаа урда шэгээрээ юумэн байхагүй гэжэ Би, Эзэн Бурхан, захирнаб. Доогуур һууһан нэгэн дээгүүр һуудаг болохо, дээгүүр һуугааша доошолхо. 27Хото һандаргаахаар шэлэн абагшадаа Иерусалимые үгэхэб, иигэжэ хотые һандаргаахаб, һандаргаахаб, үгы хэхэб!

Аммоон тушаа айладхал

28Хүнэй үри Эзэкээл, лүндэн табижа, Израилиие доромжолһон Аммооной арад зон тушаа Минии, Эзэн Бурханай, айладхал тунхагла: «Һэлмэ, һэлмэ һугалаатай, сахилгаан мэтэ түргөөр алахын тула тэрэ мэлигдээтэй. 29Харадаг үзэгдэлтнай буруу, уридшалан хэлэдэгтнай худал. Таанад зэмэтэйт, тиимэһээ хэһээлтын үдэр мандахань, һэлмэмни толгойетнай таһа сабшан абаха! 30Һэлмэнүүдээ хуйдань хэгты! Бусадые сабшан алаха сагтнай дүүрээ. Таанадай мүндэлһэн газарта, таанадай түрэһэн нютагта Би таанадые шүүхэб! 31Уур хилэнгэй гал түймэрөөр хайран, зэбүүрхэһэнээ таанадта мэдүүлхэб. Тиигээд алахадаа бэрхэ, хэрзэгы зоной гарта таанадые дамжуулхаб. 32Таанад галда түлеэн боложо, өөрын орон нютагтаа хосорхот. Хэншье таанад тушаа бэшэ дурсахагүй, мартагдахат. Энэ болбол Би, Эзэн Бурхан, айладхана мүн!»