‏ Ezekiel 24

Гал дээрэ табяатай тогоон

1Бидэнэй Вавилоон руу баряанда ошоһоной удаа юһэдэхи жэлэй үнгэржэ байхада, арбадахи һарын арбанда Эзэн намтай дахин хөөрэлдэбэ. Тэрэ иигэжэ айладхаа:

2– Хүнэй үри Эзэкээл! Мүнөөдэр хэдыб гэжэ бэшэжэ аба. Вавилооной хаан эгээл мүнөөдэр Иерусалимда добтолон оробо. 3Тиигээд үгэ дууладаггүй энэ арад зондо Минии, Эзэн Бурханай, иимэ һургаал үгэ дуулга: Тогоо таби, тогоо таби,
тэрээн руугаа уһа эюулэ.
4Тэрээн руу эгээл һайн мяханай хэһэгүүдые –
гуя, хаа хэ,
шэлэһэн һайн яһануудыешье хэ.
5Хонин һүрэгэй эгээл шэлдэгые абаарай.
Тогоон дороо түлеэ обоолоод,
һайса шана,
яһа һайса бусалга.

6Иерусалим һалахань! Хото алууршадаар дүүрэнхэй, хуушан, жэбэтэй тогоон мэтэ. Мяхан хэһэг хэһэгээр тэрээн сооһоо хаягдаха, саашадаа тэрэ мяхантай юун болохо байһанда хэнэйшье һанаан зобоногүй. 7Хото дотор хүниие алаха ушар гаража, шуһаниинь шоройдо дарагдахаар газар руу бэшэ, хатуу шулуун дээрэ адхараа бэлэй. 8Үһөөлтэеэ абаха гэһэн мэдэрэл түрүүлхээр уур сухалаа хилгэнтүүлхын тула Би газарта шэнгэхээр бэшэ, хатуу шулуун дээрэ шуһа тэрэ зандань, аршангүй үлөөгөө һэм. 9Би, Эзэн Бурхан, тэрэ шуһаар дүүрэнхэй хотые заабол хэһээхэб! Ехэ гэгшын түүдэбшэ табихаб. 10Түлеэ нэмэжэ, гал түргэдүүлэгты! Мяха шанагты! Яһанайнь илзартар, үдхэн болотор шанагты! 11Тиигээд хооһорһон тогоогоо аһажа байһан нүүрһэн дээрэ табигты, тиихэдэ тэрэ халаха. Иигэжэ жэбэнь үгы боложо, тогоон сэбэр арюун болохо. 12Гэбэшье бүхы жэбэнь һалахагүй, хэдышье хүдэлөө һаа. 13Хэдышье сэбэрлээ һаам, ши, Иерусалим, жэгшүүритэй муухай, нүгэлтэй зандааш. Уур хилэнгээ гүйсэд гаргатарни ши сэбэр болохогүйш. 14Тэрэ саг ерэнэл аабза. Тиихэдэнь Би хэһээлтэеэ болюулжа гү, али Иерусалимай улад зониие хайрлажа, энэрэл үзүүлжэ байхагүйб. Хэһэн хэрэгэйнгээ хэмээр тэдэ хэһээгдэхэ ёһотой. Энэ болбол Би, Эзэн Бурхан, айладхана мүн!

Эзэкээлэй һамган наһа барана

15Эзэн намда иигэжэ айладхаба:

16– Хүнэй үри Эзэкээл! Шинии эгээл дуратай хүнэй ами наһа гэнтэ Би абахаяа байнаб. Харин ши гомдожо, нёлбоһо гаргажа бү байгаарай. 17Абяагүй гашууда. Толгойгоо тэрэл зандаа боолто-малгайгаар орёожо, хүлдөө гуталаа үмдэжэ бай. Гашуудан нюураа бүглэжэ, ямбын эдеэ эдижэ бү байгаарай.

18Үглөөгүүр хөөрэлдэдэг зангаараал би улад зонтой хөөрэлдэбэб. Үдэшэлэн минии һамган наһа бараа һэн. Үглөөдэрынь би Эзэнэй захирһанай ёһоор байбаб. 19Зон энээниие харахадаа, намһаа асууба: «Юундэ иимээр байнабта, гашуудалай ёһолол юундэ сахинагүйбта?»

20Би тэдээндэ харюусабаб:

– Эзэн Бурхан айладхаа: 21Таанарай хүсэ шадалай бахархал, нюдэнэйтнай хужар, сэдьхэлэйтнай сэсэг болохо нангин үргөөе Тэрэ үгы хэхэеэ байна. Иерусалимда үлөөшэ үхи хүүгэдтнай һэлмээр усадхагдаха. 22Тиихэдэ таанад минии мүнөө хэжэ байгааша юумэ хэхэт: нюураа бүглэхэгүйт, хахасалгын хоол барихагүйт. 23Гашуудалай тэмдэг болгон, толгой, хүл нюсэгэн ябахагүйт, гасалан уйлахагүйт. Нүгэлэйнгөө түлөө таанад гэмшэн, һанаа алдан ябахат. 24Би, Эзэкээл, таанадта дүлгэ тэмдэг болохоб, намдал адляар таанад байхат. Эдэ бүгэдые гүйсэдхэгшэ Эзэн Бурханаа тиихэдэ таанад мэдэдэг болохот.

25Эзэн айладхаа:

– Хүнэй үри Эзэкээл, алдар солынь шэмэг, нюдэнэйнь хужар, сэдьхэлэйнь сэсэг болохо нангин үргөөень Би үгы хэхэб, үхи хүүгэдыень мүн лэ усадхахаб. 26Тэрэ хилэнсэгтэ үдэр хэн нэгэн аюулһаа зайсан, тэндэһээ тэрьедэн шам руу гүйжэ ерээд, болоһон юумэн тушаа мэдээ асарха. 27Дуугаржа шадахаяа болиһон аад, эгээл тэрэ үдэр ши дахин дуугаржа, улад зонтой хөөрэлдэхэш. Ши зониие һэргылһэн дүлгэ тэмдэг болохош, тиигээд тэдэ Намайе Эзэн гээд мэдэдэг болохо.