‏ Ezekiel 27

Тиир хото тушаа гашуудалай дуун

1Эзэн намда иигэжэ айладхаба:

2– Хүнэй үри Эзэкээл, Тиир хото тушаа гашуудалай дуу татыш. 3Далайн эрьеэр оршогшо олон арадуудтай аралжаа наймаа ябуулдаг, өөрөөшье далайн эрьедэ байдаг энэ хотын зондо Минии иимэ айладхал дуулга: Тиир, алишье талаһаа тэгшэ һайхамби
гэжэ ши һайрханаш.
4Хилэ хизааршни далайн гүн хүрэтэр нэмжыдэг,
тэгшэ түгэс тээшэ эрмэлзэн баригдаһан далайн онгосо гээшэш.
5Барилгашад Сэниирэй хабсагайһаа кипарис модо абажа,
хамаг банзануудыеш хээ,
Ливаанһаа үнэтэ хуша модо абажа,
мачтануудыеш хээ.
6Башаанай сарса модоор һэльбэнүүдыеш хээ.
Киттиимһээ асарагдаһан нарһан модоор шалануудшни хэгдэжэ,
заанай һоёогоор гоёогдоо.
7Египедһээ асарагдаһан шэрэмэл һайхан бүдөөр далбагануудшни хэгдэжэ,
холоһоо обёорхоор байгаа һэн.
Элишааһаа асарагдаһан хүхэ бэхэ үнгэтэй бүд
һүүдэрһөө халхабшаш болоо һэн.
8Сидооной ба Арваадай зон һэлюурдэгшэдшни байгаа,
мэргэжэл ехэтэй өөрыншни зон залууршадшни бэлэй.
9Гэбаал хотын дүй дүршэлтэй зон эбдэрһэн һандарһан газарыеш заһадаг байгаа,
далайн онгосоор тамардаг бүгэдэ зон
шинии портдо аралжаа наймаа эрхилдэг һэн.
10Персиин, Лидиин, Ливиин зон шинии сэрэгтэ байлсаа,
бамбай, дуулгануудаараа шамайе аршалан,
алдар солыеш нэмээгээ.

11Арваадһаа ерэһэн сэрэг харуулшни болоо, Гамаадай зон самхагуудыешни харууһалан байгаа. Тэдэ ханануудааршни тойрон бамбайнуудаа үлгөө, иигэжэ гоё һайханшни бүри түгэс болоо бэлэй.

12Таршиишэй наймаашад мүнгэн, түмэр, туулган эдээр аралжаа наймаа ябуулжа, шинии угаа ехэ эд зөөриин наймаае нилээд гүйлгөө. 13Яваан, Тубаал, Мээшэх барлагуудаар, гуулин амһартануудаар шинии эд бараае андалдан абадаг бэлэйл. 14Бэйт-Тогармааһаа ерэһэн зон ажал хүдэлмэриин, дайн дажарай моридоор, элжэгэнүүдээр шинии эд бараае андалдан абадаг һэн. 15Дэдаанай зонтой аралжаа наймаа ябуулааш, далайн эрьеэр ажаһуудаг үндэһэ яһатад заанай яһаар, хара модоор эд барааешни андалдан абагша бэлэй. 16Араамай зон номин шулуугаар, хүхэ бэхэ үнгэтэй, мүн тиихэдэ шэрэжэ оёһон бүдөөр, гоё һайхан маалинга бүдөөр, шүрэ, рубин шулуунуудаар эд барааешни андалдан абагша һэн. 17Иудын хан түрэ болон Израиль эгээл эрхим шэниисэ Минниидһээ, бообо, зүгын бала, оливын тоһо, эдеэ буйлуулдаг, үнэр оруулдаг зүйлнүүдые шинии эд бараагай түлөө түлбэри болгон үгэдэг байгаа. 18Дамааскын зон шинии баян дэлгэр наймаае хаража, Хэлбооной үзэмэй дараһан архи, сагаан нооһо шамда дурадхан наймаалаа һэн. 19Даан болон Яваан Узаалай хажууда шамтай дабтаһан түмэрөөр, хангалтай хүжээр андалдан наймаа хээ. 20Дэдаанай зон эмээлэй тохомоор шамтай наймаа хэдэг һэн. 21Аравиин зон болон Кэдаарай зонхилогшод хурьгаар, хонёор, ямаагаар шамтай андалдан наймаа ябуулдаг байгаа. 22Шэбааһаа, Раамааһаа наймаашад эгээл эрхим халуун ногоогоор, үнэтэ шулуугаар, алтаар шинии эд бараа андалдан абадаг һэн. 23Харраан, Ханнээ, Ээдэн, Шэбаа, Ассири, Хилмаад хотонуудай наймаашадтай ши мүн лэ наймаа ябуулааш. 24Тэдэ шамда үнэтэй һайхан хубсаһа, хүхэ бэхэ үнгэтэй, мүн тиихэдэ шэрэжэ оёһон һайхан бүд, эреэ маряан хибһэн, шанга гүрэһэн олһо худалдаа бэлэй. 25Таршиишэй мантан томо онгосонууд шинии дураар барааеш зөөжэ байгаа. Хүндэ ашаатай, далайгаар тамаржа байһан онгосо мэтэ болоо бэлэйш.

26Һэлюуршэдшни шамайе далайн дунда һэлюурдэн абаашаа, гэбэшье зүүн зүгэй шанга һалхинда сохигдон ши һандарааш. 27Тэрэ һүйдхэлтэ үдэр бүхы эд баялиг, ашааншни, далайгаар тамарагшад, залууршадшни, эбдэрхэйеш заһагша дархашуулшни, наймаашад, бүхы сэрэгшэдшни бултадаа далайда шэнгэн хосороо һэн.

28Далайда шэнгэжэ байгааша зонойш оог хашхараае эрьеын зон шагнажа, ехэ һүрдөө бэлэй.

29Далайн бусад онгосонуудай бүхы һэлюуршэд, залууршад, юрэдөө, бүхы ажалшадынь онгосонуудһаа газарта бууба. 30Тэдэ шам тушаа гашуудан, уйлан, толгойдоо шорой сасан, үнэһэн соо хүльбэрхэ, иигэжэ гашуудалаа элирхэйлнэ. 31Толгойгоо халзан болотор хюһаад, гашуудалай шэрүүн таар хубсаһа үмдөөд, тэдэ шам тушаа сэдьхэл шэшэрмэ гашуунаар уйлаха. 32Гашуудан тэдэ иигэжэ уйлалдан дуулаха:

«Тиир, ши бусад хотонуудһаа мантан бэлэйш, харин мүнөө далайн оёорто абяа шэмээгүй хэбтэнэш. 33Олон арад түмэнүүд далайгаар ерэдэг ашаануудыеш баяртай угтан, хэрэгсэлээ хангадаг бэлэйл. Хаашуул хаа-хаанагүй шинии эд бараагаар баяжан байгаа. 34Харин мүнөө далайда хосороош, гүн уһанда шэнгэн һалааш, бүхы ашааншни, ажалшадшни шамтай хамта далай руу унаа. 35Далайн эрьеэр бүхы зон гай тодхорыеш хаража һүрдөө, хаашуулынь ехэ айжа, шэг шарайнь сухиигаа. 36Ши ошонгоо ошоош, хэтэ мүнхэдөө үгы болоош. Дэлхэйн бүхы наймаашад шинии аймшагтай хуби заяае хаража доһолоол».