‏ Ezekiel 28

Тиир хотын хаан тушаа уридшалан айладхаба

1Эзэн намда иигэжэ айладхаба:

2– Хүнэй үри Эзэкээл! Тиир хотын хаанда Минии иимэ үгэнүүдые дуулга: ши ехэ бардамлажа, өөрыгөө Бурхамби, далайгаар хүреэлэгдэнхэй Тиир хото минии хан шэрээ гэжэ хэлэнэш. Харин ши Бурхамби гэжэ өөрыгөө хэды тоолоошье һаа, Бурхан бэшэ, юрын лэ хүн гээшэш. 3Ши өөрыгөө Даниилһаа мэргэн ухаатайб, минии мэдэхэгүй юуншье байхагүй гэжэ тоолонош. 4Өөрынгөө мэргэн ухаагаар ухаалдижа, сандаа алта мүнгэ суглуулааш, арсалтагүй. 5Ухаатайгаар наймаа ябуулжа, баялигаа нэмээгээш, гэбэшье баялигһаа боложо бардамлажа эхилээш. 6Өөрыгөө Бурхантай адлиб гэжэ тоолоһонойш түлөө Би, Эзэн Бурхан, 7шам руу хариин хэрзэгы дайсадые асархаб. Тэдэ арай гэжэ олоһон эд баялигыеш үгы хэхэ. 8Шамайе тэдэ алаад, далай руу хаяха. 9Алууршадайнгаа урда «Би Бурхан гээшэб» гэжэ хэлэжэ байха гүш? Тэдэнэй сохин добтолон ороходо, ши бусад зондол адли ёоложо зобожо байхалши. 10Зон шамайе алаха, иигэжэ ши Намда шүтэдэггүй хүнүүдтэ алуулха болонош. Иигэжэ Би, Эзэн Бурхан, айладхаа мүн!

11Эзэн намда дахин айладхаба:

12– Хүнэй үри Эзэкээл, Тиир хотын хаанда гашуудалта дуу дуулажа, Минии, Эзэн Бурханай, иимэ айладхал тэрээндэ дуулга: хэзээ нэгэтэ ши дүрбэн тэгшэ түгэс, сэсэн мэргэн ухаатай, гоё һайхан байгаа бэлэйш. 13Ши диваажанай орондо, Эдээмэй сэсэрлигтэ амидаржа, үнэтэ шулуунуудаар бэеэ шэмэглэдэг һэнши. Рубин, топаз, ошор, берил, оникс, яспис, миндарга, номин, оюун болон алтаар хэгдэһэн зүүдхэлнүүдые үмдэдэг бэлэйш. Түрэһэн үдэршни тэдэ шамда зорюулагдан бүтээгдээ. 14Минии нангин хада дээрэ ши ажаһуудаг бэлэйш. Шамайе харууһалхын тула Би өөрынгөө херүүбые томилоо һэм. Туяа гэрэлээр сасаржа байһан үнэтэ шулуунуудай дундуур ябажа байгааш. 15Түрэһэн сагһаа хойшо ши сэхэ һайн ябадалтай байһан аад, муу муухай хэрэгүүдые үйлэдэжэ эхилээш. 16Аралжаа наймаа хүгжөөһөөр ши хүсэрхэдэг, нүгэл үйлэдэдэг болоош. Тиимэһээ Би Минии нангин хадаһаа буухыеш баадхааб. Шинии аршалагша байһан херүүб туяа гэрэлээр сасарһан үнэтэ шулуунуудһаа шамайе үлдөө һэн. 17Гоё һайхан байһандаа ши ехэрхэжэ эхилээш. Мэдээжэ, суутай болоһондоо ухааншни балартаба. Тиимэһээ Би шамайе газар руу хаяжа, бусад хаашуулда жэшээ болгон харуулаа һэм. 18Аралжаа наймаа хэхэдээ оло дахин зониие мэхэлжэ, ши нангин ордонуудаа бузарлааш. Тиимэһээ Би хотыеш галдажа, дууһан шатаагааб. Хотыншни оршодог байһан газарай мүнөө гансал үнэһэн тобороог болоод байһые хүн бүхэн харана. 19Ондоо арадууд угаа ехээр һүрдөө. Хэһээлтэш ехэ, иигэжэ ши хэтын хэтэдэ үгы болоош.

Сидоон хото тушаа уридшалан айладхаба

20Эзэн иигэжэ айладхаба:

21– Хүнэй үри Эзэкээл! Сидоон хотые гэмнэжэ хэлэ. 22Зондонь Минии иимэ үгэнүүдые дуулга: Би, Эзэн Бурхан, танай дайсамби! Таанадтай үйлэдэһэн хэрэгэйнгээ ашаар Би алдар солоёо элирхэйлхэб. 23Таанад руу тахал үбшэ эльгээхэб, үйлсэнүүдээр шуһан гол урдахуулхаб. Бүхы зүгһөө таанадые хүреэлэн, таанадта добтолхо, тиигээд алуулхат. Тиихэдээ Намайе Эзэн гэжэ ойлгохот.

Израильда һайн байдал үршөөгдэхэ

24Израильда дээрэлхүүгээр хандадаг байһан хажуугаархи үндэһэ яһатадынь саашадаа хадхуур, үүргэнэ мэтэ байхаяа болихо. Тиихэдэ Израилиин зон Намайе Эзэн Бурхан гээд мэдэдэг болохо. 25Эзэн Бурхан иигэжэ айладхана: тараһан арадуудайнь дундаһаа Израилиин улад зониие суглуулхаб, тиихэдэм үндэһэ яһатад Минии нангин байһые ойлгохо. Албатан Яковтаа үршөөһэн орон нютагтам Израилиин арад түмэн дахяад ажаһуудаг болохо. 26Тэдэ амар амгалан ажамидарха, гэр байрануудые бариха, үзэм модоной сэсэрлиг ургуулха. Израилиин арад зониие үзэн ядадаг хүршэ арадуудые Би шүүжэ, хэһээлтэ амасуулхаб. Тиихэдэм Израилиин Эзэн Бурхан байһыем бүгэдэ зон ойлгохо.