Eze 29 | BxrBBL2024 | STEP | Вавилоон руу сүлэлгэдэ туугдаһанаймнай удаа арбадахи жэлэй ябажа байхада арбадахи һарын арбан хоёрдохи үдэр Эзэн намда иигэжэ хандаа бэлэй:

‏ Ezekiel 29

Египедэй фараон тушаа уридшалан айладхаба

1 Вавилоон руу сүлэлгэдэ туугдаһанаймнай удаа арбадахи жэлэй ябажа байхада арбадахи һарын арбан хоёрдохи үдэр Эзэн намда иигэжэ хандаа бэлэй:

2 – Хүнэй үри Эзэкээл! Египедэй фараондо бүхы орон нютагынь өөртэйнь хамта хэһээгдэхэеэ байна гэжэ дуулга. 3 Иигэжэ тэрээндэ хэлэ: Египедэй фараон, голой дунда хэбтэжэ байгша мантан крокодил мэтэш, «энэ Нил мүрэн минии, би тэрэниие өөрөө бүтээгээб» гэжэ хэлэнэш. Харин Би, Эзэн Бурхан, шинии урдаһаа тулахаб! 4 Би шинии үүдэндэ дэгээ хэжэ, шамайе уһанһаа гарган татахаб. Голойшни бүхы загаһад хайрһандаш няалдажа, шамтай хамта гараха. 5 Тиигээд шамайе болон голойшни хамаг загаһадые элһэн сүл губида хаяхаб, ши хээрэ талада унахаш. Хэншье шамайе хүдөөлүүлхэгүй, ан арьяатан, шубуу шонхор бэеыеш таһа татан эдихэ. 6 Тиихэдэ Египедэй хүн бүхэн Намайе Эзэн гээд ойлгохо. Израилиин улад зоной таанадта, Египедэй арад түмэндэ, туһалха гээд найдаһаниинь хулһан таяг тулаһандал адли ямаршье туһагүй байшоо. 7 Тэдэнэй таанадта туһа эрин хандахада, ши хулһан таягай хухаржа, һуга руу хадхан ороһондол, таяг тулахада, хамаг ууса хадхаһандал болоош. 8 Тиимэһээ Би, Эзэн Бурхан, шам руу добтолхыень сэрэг эльгээхэм. Тэдэ зониииеш, адуу малыеш үгы хэхэ. 9 Иигэжэ танай, Египедэй, газар эзэгүй хооһон газар болохо. Эгээл тиихэдэ Минии, Эзэн Бурханай, энээниие үйлэдэһые мэдэхэт.

«Нил мүрэн минии, би тэрэниие байгуулааб» гэжэ хэлэнэш.

10 Тиимэһээ Би шинии болон голойш урдаһаа тулахаб! Би Египедэй газарые хойто зүгэй Мигдоол хотоһоо эхилээд, урда зүгэй Сиһээн хото хүрэтэр, юрэдөө, дууһан Эфиопиин хилэ хүрэтэр ханха зайдан хооһон тала болгохоб. 11 Тэрээгүүр хүншье, малшье гарахагүй, дүшэн жэлэй туршада амидын тэмдэг тэндэ үзэгдэхэгүй. 12 Дэлхэйн эгээл хооһон, эзэгүй газар тэрэ болохо. Египедэй хотонууд дүшэн жэлэй туршада һандаранхай хооһон хэбтэхэ. Арад зонииеш дэлхэй дээгүүр тараан сасахаб. 13 Дүшэн жэлэй үнгэрһэнэй удаа Би тарааһан орон нютагууд сооһоо улад зонииеш һөөргэнь бусаахаб. 14 Түрэһэн нютаг руунь, Египедэй урда зүгэй Патроос руу, тэдэниие асархаб. Гэбэшье тэдэ дорой байдалтай хан түрэ зандаа байха. 15 Хан түрэнүүдэй эгээл доройтонги байдалтайнь тэдэ байха, хэзээдэшье бусад арадуудые бэшэ зонхилхогүй. Би тэдэниие иимэ тулюур, хүсэгүй болгохоб. 16 Израиль тэдэнэй туһаламжаһаа бэшэ хэзээдэшье дулдыдажа байхагүй. Тиихэдэ Египедтэ найдаһамнай буруу байгаа гэжэ Израилиин зон ойлгохо. Тиигээд тэдэ Минии, Эзэн Бурханай, эдэ бүгэдые үйлэдэһые мэдэхэ.

Вавилооной хаан Навуходоносор Египедтэ добтолхо

17 Вавилоон руу сүлэгдэн туугдаһанаймнай удаа хорин долоодохи жэлэй ябажа байхада түрүүшын һарын нэгэндэ Эзэн намда иигэжэ хандаба:

18 – Хүнэй үри Эзэкээл! Вавилооной Навуходоносор хаан Тиир хотодо добтолоо. Ехэ ашаа үргэн ябахыень сэрэгээ баадхахадань, сэрэгшэдэйнь толгой хүндэ ашаанһаа халзан болоо, дала мүрэнүүдынь шалзараа. Гэбэшье Навуходоносор болон сэрэгынь хото эзэлжэ шадабагүй. 19 Харин мүнөө Би Египет орониие Вавилооной Навуходоносор хаанда үгэхэм. Тэрэ баялигынь тонон абажа, сэрэгтээ хүлһэн болгон үгэхэ. 20 Минии захиралтануудые дүүргэһэнэйнь түлөө Би тэрээндэ Египедые дамжуулхаб. Энэ болбол Би, Эзэн Бурхан, айладхаа мүн! 21 Тэрэ үдэр Израилиин арад түмэниие хүсэн түгэлдэр болгохоб. Эзэкээл, тэдээндэ Минии нэрэһээ айладхал дамжуулхые шамда зүбшөөхэб. Тиихэдэм тэдэ Минии, Эзэн Бурханай, эдэ бүгэдые үйлэдэһые мэдэхэ.