‏ Ezekiel 30

Египет зэлүүд хооһон тала болохо

1Эзэн намда иигэжэ айладхаба:

2– Хүнэй үри Эзэкээл, лүндэн табижа, Египедэй арад түмэндэ иигэжэ дуулга: Бархиржа байгаад хашхаралдагты!
3Хилэнсэгтэ үдэр дүтэлөө,
Эзэнэй хэһээлтэ амасуулха үдэр!
Үндэһэ яһатадай хосорхо бүрэнхы саг дүтэлбэ.
4Египедтэ дайн дажар болохо,
Эфиопидо гай тодхор ушарха.
Египедэй зон, таанад алуулхат,
эд баялигтнай тоногдон абтаха,
гэр байратнай һандарха.

5Эфиопи, Ливи, Лидиһээ, Аравиһаа, Хүүбһээ, мүн тиихэдэ Хэлсээ баталһан оронһоо хүлһэлэн абагша сэрэгшэд дайн дажарта алдалан унаха.

6Таанадые аршалагшад бултадаа – хойто зүгэй Мигдоолһоо эхилээд, урда зүгэй Сиһээн хото хүрэтэр дайн дажарта алуулагдаха. Омогорходог хүсэтэй сэрэгтнай һалаха. Энэ болбол Би, Эзэн Бурхан, айладхана мүн! 7Газар дайдатнай дэлхэйн эгээл эзэгүй хооһон газар болохо, хотонуудтнай эгээл ехээр һандаранхай байха. 8Танай орон газарые Би шатаахаб. Аршалагшадтнай бүгэдэ хосорхо. Тиихэдэл таанад Намайе Эзэн гээд мэдэрхэт. 9Египедые хэһээжэ байһан тэрэ үдэртөө дүтэлжэ байгша гай тодхор тушаа соносхохыень Би юушье мэдээгүй, хашалгүй Эфиопиин улад зон руу элшэнэрые далайн онгосоор эльгээхэб. Тэдэ угаа ехээр һүрдэхэ. 10Египедэй улад зон, таанад угаа олонта. Гэбэшье Вавилооной Навуходоносор хааниие эльгээжэ, таанадые үсөөрүүлхэб. 11Тэрэ хэрзэгы шэрүүн сэрэгтэеэ хамта танай орон нютаг руу орожо, хооһолхо, һэлмэ далайн таанадта добтолоод, үхэһэн бэеэртнай дэлхэй дүүргэхэ. 12Нил мүрэниие хатаахаб, муу муухай зоной мэдэлдэ Египедэй газар уһа дамжуулхаб. Хариин зониие эльгээжэ, газарыетнай зэлүүд хооһон болгохоб. Энэ болбол Би, Эзэн, айладхана мүн!

13Эзэн Бурхан Египедэй зондо иигэжэ айладхана:

– Ноодто байгша онгонуудые болон хүрэгүүдые үгы хэхэб. Египедые хүтэлбэрилэн зонхилхо хүн танай дунда бэшэ олдохогүй. Ииигэжэ таанад бултадаа угаа ехээр һүрдэн айхат. 14Патроос хотые һандаргахаб, Цооһаниие галдахаб. Ниислэл хото Тэбээс мүн лэ һандаргагдаха. 15Египедэй хэрэм хото болохо Сииндэ уур сухалаа үзүүлхэб, Тэбээсэй олон зониие үсөөрүүлхэб. 16Египедые галдахаб, Сиин амяа табин шэшэрэн байха, Тэбээс хото һандарха, Ноодой зон дайсадһаа хододоо айжа байха. 17Оон болон Пи-Бээшэт хотонуудай залуу сэрэгшэд дайн дажарта алдалан унаха, бусад зониинь баряанда туугдан ошохо. 18Танай хүсэ шадалые бууруулжа, омогорходог хүсыетнай һалгаахадам, Тахпанхээс хото дээрэ харанхы бууха. Баряанда туугдан ошоходотнай бүрэгэр хара үүлэн орон нютагыетнай бүрхөөхэ. 19Египедые хэһээжэ дүүргэхэдэм, таанад Намайе Эзэн гээд ойлгохот.

20Баряанда туугдан ошоһоноймнай удаа арба нэгэдэхи жэлэй ябажа байхада, жэлэй түрүүшын һарын долоодохи үдэр Эзэн намтай хөөрэлдөө бэлэй:

21– Хүнэй үри Эзэкээл! Египедэй хаан фараоной гарые хухалааб. Хэншье тэрэниие орёогоо, боогоогүй, һэлмэ барижа шададаг болоторынь эдэгээгээгүй. 22Египедэй фараоной урдаһаа тулахаб, элүүр, мүн хухарһаншье гарнуудыень хоюулынь хухалхаб, тиигэжэ гарһаань һэлмэ унагаахаб гээд Намайе, Эзэн Бурханиие, айладхана гэжэ фараондо дуулга. 23Египедэй улад зониие бүхы дэлхэйгээр тараахаб. 24– 25Вавилооной хаанай засаг шанга болгохо, Египедэй урдаһаа далайхыень һэлмэ тэрээндэ үгэхэб. Египедэй фараон хүсэгүй боложо, шархатаһан хүндэл адли Вавилооной хаанай урда ёолохо. Тиихэдэ Намайе Эзэн гээд улад зон мэдэрхэ. 26Египедэй зониие хари гүрэнүүдээр сасан тараахаб, тиихэдэм тэдэ Минии, Эзэнэй, иигэжэ хэһээһые мэдэдэг болохо.