‏ Ezekiel 31

Египедэй фараоной эсэс аймшагтай байха

1Вавилоон руу сүлэлгэдэ туугдаһанаймнай удаа арба нэгэдэхи жэлэй ябажа байхада гурбадахи һарын түрүүшын үдэр Эзэн намда иигэжэ хандаба: 2– Хүнэй үри Эзэкээл! Египедэй фараондо болон албатандань иигэжэ дуулга:
шамдал адли хүсэ шадалтай хэншье байхагүй.
Мүнөө нэгэ иимэ түүхэ шагна.
3Ассиритэй сасуулха гү? Бата бэхи, һаглагар мүшэртэй,
угаа үндэр, оройнь үүлэн дунда байһан
хуша модон Ливаанда нэгэтэ байгаа бэлэй.
4Уһан тэрэниие ундалуулан ургуулжа, газарай гүн тэрэниие үндылгөө.
Хажуугаарнь урдагша гол горход
ойн бүхы мододые ундалуулдаг һэн.
5Харин энэ модон бусад мододһоо үндэр болоо,
гэшүүһэдынь олон, мүшэрнүүдынь ута бэлэй.
6Гэшүүһэд дээрэнь жэгүүртэн уурхай зохёожо,
мүшэрнүүд доронь ан арьяатан түрэжэ,
дэлхэйн олон арадууд һүүдэртэнь ажамидардаг һэн.
7Угаа һайхан модон бэлэй:
ута һаглагар мүшэртэй, үндэр,
газарай гүн уһан хүрэтэр үндэһэниинь ошодог һэн.
8Минии сэсэрлиг соо ямаршье хуша модон тэрээнтэй зэргэсэхэгүй.
Ямаршье нарһан тэрээндэл адли гэшүүһэгүй,
ямаршье агар модон тэрээндэл адли мүшэргүй,
юрэдөө, Минии сэсэрлигэй ямаршье модон
гоё һайханаараа тэрээндэ хүрэхэгүй һэн.
9Би тэрэниие олон һайхан мүшэрнүүдтэй болгооб,
Эдээмэй Минии сэсэрлигэй бүхы модод тэрээндэ атаархадаг бэлэй.
10Мүнөө Минии, Эзэн Бурханай, тэрэ модон тушаа
иигэжэ айладхаһые шагна, Египедэй фараон:
үүлэн хүрэтэр үндэр болоходоо
тэрэ модон бардамлажа эхилбэ.
11Тиимэһээ Би тэрэниие буруу гэжэ гэмнээд,
муу муухай ябадалайнь түлөө хэһээхыень
хариин хаанда дамжуулааб.

12Хариин хэрзэгы зон тэрэниие отолжо, унаһан газартань орхибо: гэшүүһэдынь, мүшэрнүүдынь хада уулаар, нюруу газараар унан тараа. Тэрэнэй һүүдэртэ амидарагша зон бултадаа тэндэһээ холодон ошобо.

13Унаһан модоной түгсүүл дээрэ шубуу шонхор байрлаба, гэшүүһэдээрнь ан арьяатан гэшхэн гүйлдэбэ.

14Уһаар оройдоошье дутангүй ургаашье хадаа ямаршье модон иимэ үндэр болохоёо, оройгоо үүлэд хүрэтэр үргэхэеэ бэшэ һанахагүй. Зоной нүгшэжэ, үхэлэй орон руу ошоһондол модон бүхэн мүн лэ һалаха юм.

15Тэрэнэй үхэлэй орон руу шэглэхэдэ Би, Эзэн Бурхан, тэрэ үдэрые гашуудалай үдэр болгохоб, гүн уһанда, гол горходто захирхадамни, тэдэ урдахаяа болёод байха. Ливаанай хада ууланууд гашуудан, харанхы бүрэнхы болохо. Хээрэ талын хамаг модод хатажа эхилхэ.

16Тэрэ модоной шууяа гарган унажа, Эдээмэй Минии тэрэниие үхэлэй орон руу шэглүүлхэдэ, дэлхэйн үндэһэ яһатад айн шэшэрэлдэхэ. Үхэлэй орондо оршогшо модод – Минии сэсэрлигэй болон Ливаанай эрхим модод тэрэ модоной унахада сэдьхэлээ ханаха, баясаха. 17Тэрэ модоной һүүдэртэ амидарагша зон мүн лэ үхэлэй орон руу ошоо.

18Египедэй фараон! Эдээмэй сэсэрлигэй али модонтой ши алдар солоороо, һүр жабхалангаараа зэргэсэхэ аргатайбши? Иимэ ушар шамтай болон улад зонтойш тохёолдохо. Дэлхэйн зонһоо эгээл хүсэтэй, үндэр байхадаш шамайе тэрэ модонтой жэшэхээр бэлэй. Эдээмэй Минии сэсэрлигэй мододой үхэн хатадагтал ши мүн лэ үхэхэш, үхэлэй орон руу эльгээгдэхэш, Бурхан гэжэ мэдэхэгүй, мүн дайн дажарта алуулһан зоной дунда хэбтэхэш. Энэ болбол Би, Эзэн Бурхан, айладхана мүн!